以斯帖記 第 2 章 - 台語漢字羅馬本

1

諸個代誌以後，亞哈隨魯王的受氣息，就數念瓦實提及伊的所行，及伊怎樣降旨來辦伊。

2

對按呢跟隨王的人臣給伊講：「著給王尋娞的在室女幾若人。

3

王著派官員佇伊國內的逐省，互招集一切娞的在室女到書珊的王宮，到女院，交互王的太監希該，就是掌管女子的，也著供給清氣身軀的品料。

4

王所合意的女子通設立伊做王后，來替瓦實提。」王掠此個事做好，就按呢行。

5

書珊宮有一個猶大人，名叫末底改，是便雅憫人基士的曾孫，示每的孫，睚珥的子。

6

前巴比倫王尼布甲尼撒遷徙猶大王耶哥尼雅，末底改也對耶路撒冷受遷徙，佇彼幫受掠的人的中間。

7

伊培養伊的叔的查某子哈代沙（也名以斯帖），因為此個查某囝仔無父母。伊的面貌娞閣好看；伊的父母已經死，末底改就接納伊做家己的查某子。

8

王的命令及詔書已經宣佈，就聚集多多女子佇書珊的王宮，交佇希該的手；彼時以斯帖也送入王宮，交互管女子的希該的手。

9

此個女子得著希該歡喜伊，好款待伊，趕緊用清氣身軀的品料互伊及伊應該得著的份額，也對王宮將應該互伊的七個宮女互伊，搬徙伊及伊許個宮女到女院上好的所在。

10

以斯帖呣曾給人講伊是甚麼籍甚麼族，因為末底改教伊呣通給人講。

11

末底改逐日佇女院的頭前行來行去，愛知以斯帖平安抑無，及伊將來境遇怎樣。

12

照婦女的例預備十二月日：就是六月日用沒藥的油，六月日用香料及女子清氣身軀的別號物。清氣的日已經滿，眾女子就照次序入去見亞哈隨魯王。

13

女子入去見王是此款：對女院到王宮的時，見若伊所愛的攏互伊，伊續帶去。

14

下昏時入去，隔早起倒來第二個女院，交互王的太監，就是管理嬪妃的沙甲的手；若呣是王歡喜伊，閣提起伊的名來召伊，就無閣入去見王。

15

末底改接納做伊的查某子的以斯帖，就是伊的叔亞比孩的查某子，照次序著入去見王的時，除去王的太監掌管女子的希該所派互伊的，另外無討別物。見若看著以斯帖的攏歡喜伊。

16

亞哈隨魯王坐位第七年十月，就是提別月，以斯帖得著選入王宮見王。

17

王疼以斯帖贏過眾女子，伊佇王的目睭前得著恩典寵愛贏過眾在室女。王就用王后的冕旒戴佇伊的頭殼，設立伊做王后，來替瓦實提。

18

彼時王為許個大臣百官設大筵席，就是以斯帖的筵席，閣安撫逐省，照王的富足賞賜物件。

19

許個在室女第二擺聚集的時，末底改坐佇王的門。

20

以斯帖照末底改所命令的，未曾給人講伊是甚麼族，甚麼籍；因為以斯帖遵趁末底改的命令，親像前得著伊撫養的時一樣。

21

當許個日，就是末底改坐佇王的門的時，王的太監中有顧門者二人，辟探及提列，受氣，計謀欲害亞哈隨魯王。

22

末底改知彼個代誌，就給王后以斯帖講。以斯帖就用末底改的名，將彼個事講互王知；

23

究勘此個事，果然是實，就將二人吊佇柴裡，用此個事佇王的面前記載佇歷史的冊。