傳道書 第 7 章 - 台語漢字羅馬本

1

名聲比好的膏油卡好；人死的日比出世的日卡好。

2

去喪事的家，比去宴樂的家卡好；因為這是眾人的結局，活的人也欲將這事下佇心裡。

3

憂悶比笑卡好；因為面帶憂容，是互心快樂。

4

智慧的人的心佇喪事的家；愚戇的人的心佇快樂的家。

5

聽智慧的人的責備，比聽愚戇人的唱曲卡好。

6

戇人的笑，親像鼎下燒茦仔的聲；這也是空虛。

7

勒索會互智慧的人變做戇；賄賂會敗壞人的心術。

8

代誌的結局贏過代誌的起頭；心吞，贏過心驕傲。

9

你的心莫得躁急來受氣，因為受氣存佇戇人的心懷。

10

你呣通講：按怎樣前的日贏過現今的日？因為你按呢問，呣是出佇智慧。

11

智慧及產業平平好，對佇看見日光的人閣卡有利益。

12

因為智慧會致蔭人，錢銀也會致蔭人。獨獨智慧會保全伊本人的活命。這就是知識特色的利益。

13

你著想上帝所做；因為伊互伊彎的，是誰會互伊直？

14

亨通的日你著歡喜；抵著患難的日你著想；因為上帝互二項平平排，為著欲互人查出身後有甚麼事。

15

有義人行義，反轉滅無；有歹人行歹，反轉食長歲壽。我佇空虛的日攏有看見。

16

莫得行義甚多，莫得智慧過頭，啥事敗壞家己啊？

17

莫得行歹甚多，也莫得做戇人，啥事未到期來死啊？

18

你持守此個是好，彼個也呣通放手；因為敬畏上帝的人，欲脫離這一切的事。

19

智慧互智慧的人有能力贏過城內十個掌權的。

20

行好無犯罪的義人，世上實在無。

21

人所講的話，呣通攏總下佇心裡，驚了聽見你的奴僕咒詛你。

22

因為你的心家己知，你也曾多多擺咒詛別人。

23

我曾用智慧試驗這一切的事；我講，我欲做智慧的，總是這離開我遠遠。

24

所有的，是遠閣深深，是誰會測　啊？

25

我越轉想，我專心愛知，愛查考，也尋智慧及萬事的理由；閣愛知邪惡是愚戇，愚蠢是癲狂。

26

我閣查出一項比死卡苦，就是一等號的婦仁人：伊的心是活罩及羅網，伊的手是鎖鍊。凡若得著上帝歡喜的人得著閃避；總是有罪的人互伊掠著。

27

傳道者講：「看啊，我愛知伊的數額，一項一項比較伊，就尋著此個，

28

我的心愛尋伊也得著，佇一千人的中間我會尋著一個查甫人，佇許個人的中間，我無尋著一個婦仁人。」

29

看啊，我只有尋著此個，就是上帝創造人本是正直，總是尋出多多奇巧的計謀。