歌羅西書 第 2 章 - 台語漢字羅馬本

1

因為我愛恁知，我為著恁及許個住佇老底嘉的，以及見若佇肉體未曾見著我的面的，有怎樣爭戰；

2

通互in的心受安慰，佇仁愛相結聯，對充滿的曉悟得著一切的富有，來深知上帝的奧妙，就是基督；

3

凡若智慧及知識的寶貝，攏囥佇伊。

4

我講按呢，免得人用奇巧的話來迷惑恁。

5

因為我肉體離開恁，神及恁佇teh，歡喜看見恁的整齊，以及恁信靠基督的堅固。

6

所以恁既然接納主基督耶穌，就著照按呢tiam佇伊來行，

7

已經釘根佇伊，就直直受起造，對信來堅固，照恁所曾受的教示，滿滿感謝。

8

著謹慎，免得互人用伊的哲學及空空的無影話來迷惑恁，照人的遺傳，照世間的小學，呣是照基督。

9

因為上帝性質的豐盛攏齊備tiam佇伊，

10

恁tiam佇伊也得著豐盛。伊是一切辦政事掌權者的頭。

11

tiam佇伊恁也已經受割禮，呣是用手來行的割禮，就是基督的割禮，褪去肉體的身軀。

12

已經佇洗禮及伊同埋葬，就佇此個洗禮也及伊同起來，是對信上帝的功用，就是對死人中互伊起來的。

13

閣恁前為著罪過及肉體的無割禮來死的，今上帝互恁及基督同復活，已經赦免咱攏總的罪過；

14

擦消攻擊咱諸個規例的字樣，就是對敵咱的，釘伊佇十字架，來對中間除伊。

15

既然敗許個辦政事的、掌權的，就公行顯明in，佇十字架贏in來大悅。

16

所以，莫得因為所食所飲的，抑是為著節期、初一，以及安息日的緣故，互人擬議。

17

諸個攏是將來的事的影；若是形就是基督的。

18

莫得互人搶恁的報賞，in故意謙卑敬拜天使。倚靠in所有看見的，照in肉體的心志，干單teh phong風，

19

無連住佇彼個頭。全身是倚靠彼個頭，對諸個節及筋得著接應聯絡，照上帝所賞賜的長成來長成。

20

恁若及基督同死，脫離世間的小學，怎樣愈親像活佇世間，來家己降服佇諸個規例，親像講

21

「莫得提著、莫得試食、莫得摸著」？

22

諸個物攏是用了會敗壞的，是照人的條規及教示。

23

諸個規例是互人行自專的敬拜，家己謙卑，無惜身軀，名是有智慧，其實攏無功效通約束肉體的放縱。