帖撒羅尼迦後書 第 3 章 - 台語漢字羅馬本

1

兄弟啊，結尾來講：恁著替阮祈禱，互主的道理流行，得著榮光，親像佇恁中間一樣。

2

閣互阮得著脫離佇無理的歹人，因為人無攏有信。

3

主就是信實，伊欲堅固恁，閣保護恁免互彼個歹的陷害。

4

論到恁，阮佇主深信，阮所命令的，恁現今有行，後來也欲行伊。

5

願主導恁的心，入佇上帝的疼，及基督的吞。

6

兄弟啊，阮佇咱的主耶穌基督的名命令恁，見若兄弟無法度，無照阮所傳授的來行，恁著離開伊。

7

因為恁家己知著怎樣學阮。因為阮佇恁中間，未曾無法度，

8

也呣曾白白食人，反轉是著磨艱苦，暝日做工，免得拖累恁中間一人。

9

呣是因為阮無權，獨獨是愛用本身做恁的模樣，互恁學阮。

10

因為阮猶及恁佇的時，曾按呢命令恁講，若有人無欲做工，伊也著呣通食。

11

是阮聽見，恁中間有人所行無法度，攏無做工，干單做份外的事。

12

親像此號人阮佇主耶穌基督命令，閣勸，著恬靜做工，家己趁食。

13

兄弟啊，恁行好事呣通厭倦。

14

若有人無順服阮此張批所講的，恁著給伊記，也呣通及伊交陪，互伊家己見誚。

15

總是莫得看伊做仇讎，著警戒伊親像兄弟。

16

願平安的主逐時逐項事本身賞賜恁平安！願主及恁眾人佇！

17

我──保羅親筆請安恁。佇逐張批用此個做記號，我就是按呢寫。

18

願咱的主耶穌基督的恩典及恁眾人佇！