帖撒羅尼迦後書 第 1 章 - 台語漢字羅馬本

1

保羅、及西拉，以及提摩太批寄互帖撒羅尼迦人的教會，就是佇咱的父──上帝及主耶穌基督的。

2

願恁對父上帝及主耶穌基督得著恩典、平安。

3

兄弟啊，阮應該為著恁常常感謝上帝，這本是合宜的；因為恁的信益發長大，閣恁眾人逐個相疼的心攏充足。

4

致到阮佇上帝諸個教會將恁來誇口，因為恁佇一切的窘逐及所受的患難中，有存吞及信的心。

5

這就是上帝公義審判明的憑據，互恁通算做會堪得佇上帝的國；就是恁為著伊受苦的。

6

因為上帝照公義，欲用患難報應許個互恁抵著患難的人；

7

也欲互恁諸個受患難的人及阮同得著安息。就是佇主耶穌及伊有權能的天使，佇火焰中對天顯現的時，

8

來報冤佇許個呣識上帝及呣順服咱的主耶穌的福音的。

9

此號人欲受刑罰，就是永遠的滅無，離開主的面前及伊權能的榮光。

10

當主臨到的日，就是伊欲佇諸個聖徒得著榮光，也佇彼日伊欲佇攏總信的人得著謳咾。因為阮對恁所干證的，恁有信。

11

為著按呢，阮也常常替恁祈禱，願咱的上帝看恁做會堪得佇所受的召，閣用權能來圓滿一切所欣慕的好，及對信所做的工；

12

互咱的主耶穌的名佇恁得著榮光，恁也佇伊得著榮光，照咱的上帝及主耶穌基督的恩。