提摩太後書 第 1 章 - 台語漢字羅馬本

1

對上帝的旨意，照佇基督耶穌活命的應允，做基督耶穌的使徒保羅，

2

批寄互我所疼的子提摩太。願你對父上帝及咱的主基督耶穌得著恩典、憐憫、平安！

3

我感謝上帝，就是我續接列祖用清氣的良心所服事的。佇祈禱的時，我數念你無息，

4

記得你的流目屎，暝日欣慕見著你，互我滿心歡喜。

5

念著你心內無假的信，此個信是代先佇你的外媽羅以及你的老母友妮基，我深信此個信也是佇你。

6

為著此個緣故我點醒你，愛你將上帝對我的按手所互你的恩賜閣奮志，親像互火閣炎一樣。

7

因為上帝所賞賜咱的，呣是驚惶的心神，就是權能、仁愛、守己的心神。

8

所以給咱的主做干證莫得掠做見誚，也莫得掠我做主的囚犯來見誚；著照上帝的權能，為著福音相及受苦。

9

伊救咱，用聖的召召咱，呣是照咱的行做，是照伊家己的旨意及恩典；此個恩典就是永世代的代先，佇基督耶穌賞賜咱的，

10

若是現今對咱的救主基督耶穌的顯現來表明的。伊已經廢無死，閣對福音，互活命及敗壞的攏顯明。

11

我為著此個受設立做宣傳的，做使徒，做教師。

12

為著此個緣故，我也受諸個艱苦。若是我無掠做見誚；因為我識我所信的，也深信伊會保守我所交託伊的，到佇彼日。

13

你對我所聽見許個端正的話的模樣，著用佇基督耶穌的信及仁愛，來執守伊。

14

所交託你的好事，你著倚靠佇咱的聖神來顧守伊。

15

凡若佇亞西亞的人已經背我，這是你所知，其中有腓吉路、黑摩其尼。

16

願主憐憫阿尼色弗的家；因為伊沓沓補我的精神，也無掠我掛鐵鍊做見誚，

17

伊佇羅馬的時，殷勤尋我到見著。

18

願主互伊佇彼日對主來得著憐憫。也伊佇以弗所用偌多項服事我，你也明明知。