列王紀下 第 9 章 - 台語漢字羅馬本

1

先知以利沙叫先知的學生一個，給伊講：「你縖腰，提一瓶油去基列的拉末。

2

到遐，著尋寧示的孫、約沙法的子耶戶，入去，互伊對伊的兄弟中起來，導伊入內房，

3

將瓶內的油斟佇伊的頭殼，講：『耶和華按呢講：我用油抹你做以色列的王。』你就著開門逃走，呣通延延。」

4

此個少年人就是少年的先知去基列的拉末。

5

到遐，看見眾軍長坐，伊就講：「軍長啊，我有代誌欲給你講。」耶戶講：「欲給阮中間甚麼人講？」應講：「軍長啊，就是你。」

6

伊就起來，入去厝內，少年人用油斟佇伊的頭殼，給伊講：「耶和華──以色列的上帝按呢講：『我用油抹你做耶和華的百姓以色列的王。

7

你著拍滅你的主人亞哈的家，互我通報應我的奴僕諸個先知的血，以及耶和華眾奴僕的血，就是佇耶洗別的手所做的。

8

因為亞哈全家欲攏滅無，我欲剪除屬亞哈的查甫丁，無論受拘束的抑是自由的，佇以色列中，

9

我欲互亞哈的家親像尼八的子耶羅波安的家，也親像亞希雅的子巴沙的家。

10

佇耶斯列的園，狗欲食耶洗別，無人埋葬伊。』」少年人就開門逃走。

11

耶戶出去，到伊的主人的奴僕遐，有一人問伊講：「攏平安無？此個狗者來尋你甚麼代誌啊？」伊給講：「恁識彼個人，也知伊所講的。」

12

講：「無影，你著給阮講。」應講：「伊按呢按呢給我講。伊講：『耶和華按呢講：我用油抹你做以色列的王。』」

13

趕緊逐人用家己的衫舖佇崎仔的頂層，下佇耶戶的下面；歕哨角講：「耶戶做王啦！」

14

按呢，寧示的孫、約沙法的子耶戶背叛約蘭。約蘭及以色列眾人曾把守基列的拉末，因為亞蘭王哈設的緣故；

15

總是約蘭王倒去耶斯列，醫治伊的傷，就是伊佇及亞蘭王哈設交戰的時，亞蘭人拍著伊的。耶戶講：「恁的意思若是按呢，就呣通容允人走出城去耶斯列報消息。」

16

耶戶就坐車去耶斯列，因為約蘭倒佇遐。猶大王亞哈謝已經落去覓約蘭。

17

有一個守望者徛佇耶斯列的樓頂，看見耶戶的軍隊來，就講：「我看見一陣軍隊。」約蘭講：「差一個騎馬者去接伊，續問伊講：平安嗎？」

18

騎馬者去接伊，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」守望者閣講：「使者到遐，總是無倒轉來。」

19

王閣差一個騎馬者去。伊到遐，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」

20

守望者閣講：「伊到遐，也無倒轉來；趕車的款親像寧示的孫耶戶趕，因為伊趕真狂。」

21

約蘭講：「套車！」就套伊的車。以色列王約蘭及猶大王亞哈謝出去逐個坐家己的車出去接耶戶，佇耶斯列人拿伯的園抵著伊。

22

約蘭見著耶戶就講：「耶戶啊，是平安嗎？」伊應講：「你的老母耶洗別的淫行邪術許多猶佇，豈會平安？」

23

約蘭就越轉伊的車走，給亞哈謝講：「亞哈謝啊，有謀反啦！」

24

耶戶盡力開弓，射著約蘭的飯匙骨中，箭對伊的心出去。伊就慄落車內。

25

耶戶給伊的軍長畢甲講：「你將伊佇耶斯列人拿伯的園裡。你著記得，你我相及坐車隨伊的老父亞哈的時，耶和華對伊所讖語的，

26

耶和華講：『我昨日有看見拿伯的血及伊的子的血』，耶和華閣講：『佇此區園我欲報應你。』今著將伊佇彼區園，照耶和華所講的。」

27

猶大王亞哈謝看見按呢，就對園的厝的路逃走。耶戶伊，講：「也著拍死伊佇車內。」到倚近以伯蓮上姑珥的山坪拍傷伊。伊走到米吉多，就死佇遐。

28

伊的奴僕用車載伊到耶路撒冷，葬佇伊的墓及伊的列祖，佇大衛的城。

29

佇亞哈的子約蘭十一年，亞哈謝起頭做猶大王。

30

耶戶到耶斯列；耶洗別聽見就畫目眉、梳頭，俯佇窗仔看。

31

耶戶入門的時，耶洗別講：「死主人的心利啊，平安嗎？」

32

耶戶抬頭向窗仔看，講：「是誰為我，是誰啊？」有二三個太監俯落看伊。

33

耶戶講：「給伊捙落來！」就捙伊落來。伊的血濺著牆壁及馬；就用腳踏伊。

34

耶戶入去，也食也飲，講：「恁去看彼個受咒詛的婦仁人續埋葬伊，因為伊是王的查某子。」

35

去欲葬伊，干單尋著伊的頭殼骨及腳，及手掌若定。

36

倒來回覆伊，耶戶就講：「這就是耶和華託伊的奴僕提斯比人以利亞所講的話，講：『佇耶斯列的園，狗欲食耶洗別的肉；

37

閣耶洗別的身屍欲佇耶斯列的園親像糞佇土面，致到人無欲講這是耶洗別。』」