列王紀下 第 24 章 - 台語漢字羅馬本

1

約雅敬的年間，巴比倫王尼布甲尼撒上來；約雅敬服事伊三年，後來反轉背逆伊。

2

耶和華差迦勒底的軍隊、亞蘭的軍隊、摩押的軍隊，及亞捫的軍隊來攻擊伊，閣差攻擊猶大欲滅伊，照耶和華託伊的奴僕諸個先知所講的。

3

此個事臨到猶大，實在是對耶和華的命令欲遷徙伊，離開伊的面前，這攏是因為瑪拿西的罪照伊一切所行的；

4

也為著伊留無罪的人的血，因為伊用無罪的人的血充滿耶路撒冷；此個罪耶和華呣肯赦免。

5

約雅敬其餘的事，見伊所行的豈無攏記佇猶大列王的記錄嗎？

6

約雅敬及伊的列祖同睏。伊的子約雅斤續接伊做王。

7

埃及王無閣對伊的地出來；因為巴比倫有王取見屬埃及王的地，對埃及小河到伯拉河。

8

約雅斤坐位的時十八歲，佇耶路撒冷做王三月日。伊的老母名叫尼護施她，是耶路撒冷人以利拿單的查某子。

9

約雅斤行耶和華所看做歹的事，照伊的老父一切所行。

10

彼時，巴比倫王尼布甲尼撒的人臣上來耶路撒冷，圍困彼個城。

11

當伊的人臣圍困城的時，巴比倫王尼布甲尼撒就來。

12

猶大王約雅斤出城到巴比倫王遐，伊及伊的老母、及伊的人臣、首領、太監攏去，巴比倫王掠伊。佇伊做王第八年。

13

閣將耶和華殿內的寶物及王宮的寶物攏對遐提去，將以色列王所羅門所造耶和華殿內的金器攏拍破，照耶和華所講的話；

14

閣將耶路撒冷的眾百姓及眾首領，以及所有大權能的勇士，共一萬人，連一切的工匠、鐵匠攏掠去；除國內極喪鄉的人以外，無剩一個；

15

也帶約雅斤到巴比倫、及太后、后妃、太監及國內的大官，攏掠伊對耶路撒冷到巴比倫；

16

閣將一切的勇士七千人及工匠、鐵匠一千人，攏是勇壯會上陣的，巴比倫王攏掠伊到巴比倫。

17

巴比倫王設立約雅斤的叔瑪探雅做王續接伊，換伊的名叫西底家。

18

西底家坐位的時二十一歲，佇耶路撒冷做王十一年。伊的老母名哈慕她，是立拿人耶利米的查某子。

19

伊行耶和華所看做歹的事，照約雅敬一切所行的。

20

耶路撒冷及猶大抵著諸個事，是因為耶和華發出受氣欲對伊的面前趕出。