列王紀下 第 22 章 - 台語漢字羅馬本

1

約西亞坐位的時八歲，佇耶路撒冷做王共三十一年。伊的老母名叫耶底大，是波斯加人亞大雅的查某子。

2

伊行耶和華所看做好的事，行伊的祖大衛一切的路，無偏左右。

3

約西亞十八年，王差米書蘭的孫、亞薩利的子──書記沙番到耶和華的殿，吩咐伊講：

4

「你上去見祭司頭希勒家，教伊算許個帶入耶和華殿的銀，就是管門者對百姓所收的，

5

互交互做工人，就是管理耶和華殿的，互轉交耶和華殿內做工的人，通修理殿破壞的所在，

6

就是轉交木匠，起造的，及土匠，閣買柴料，及過拍的石，來修理殿，

7

總是交過的手的銀，無及算，因為做代誌誠實。」

8

祭司頭希勒家給書記沙番講：「我佇耶和華殿內偶然得著律法的冊。」希勒家將冊交互沙番，沙番就讀伊。

9

書記沙番到王遐，回覆王講：「你的奴僕已經將所得著佇殿內的銀傾出來，交互辦理耶和華殿的做工人。」

10

書記沙番閣給王講：「祭司希勒家有提一本冊互我。」沙番就佇王的面前讀伊。

11

王聽見律法冊的話，就拆裂伊的衫，

12

王吩咐祭司希勒家及沙番的子亞希甘、米該亞之子亞革波、書記沙番及王的近臣亞撒雅，講：

13

「恁去為我、為百姓、為猶大眾人，將所拾著此本冊的話問耶和華；因為耶和華大受氣咱，是因為咱的列祖無聽趁此個冊的話，無照一切所記載論咱的來行。」

14

對按呢，祭司希勒家及亞希甘、亞革波、沙番、亞撒雅攏去見女先知戶勒大。伊是哈珥哈斯的孫、特瓦的子；管理禮服彼個沙龍的某。伊踮佇耶路撒冷第二區。及伊講。

15

伊給講：「耶和華──以色列的上帝按呢講：『恁去回覆彼個差恁來見我的人講，

16

耶和華按呢講：看啊我欲降災禍佇此所在及佇遮徛起的百姓，就是猶大王所讀彼本冊的話。

17

因為棄拺我，燒香佇別個上帝，用的手所做的激我的受氣，所以我受氣此所在，親像火無息，』

18

總是，差恁來問耶和華的猶大王，恁著按呢給伊講：『耶和華──以色列的上帝按呢講：論到你所聽見的話，

19

就是聽見我攻擊此所在及徛起佇遮的百姓所講、欲互伊拋荒受咒詛，你的心就軟，你家己謙卑佇耶和華的面前，閣拆裂你的衫，佇我的面前啼哭，我也有聽見，這是耶和華講的。

20

所以我欲互你歸你的列祖，你欲平安歸墓；我所欲降落佇此所在一切的災禍，你的目睭的確看見。』」就倒轉去回覆王。