列王紀下 第 20 章 - 台語漢字羅馬本

1

許個日的中間，希西家破病得欲死。亞摩斯的子先知以賽亞去見伊，對伊講：「耶和華按呢講：『你著設法你的家事，因為你得欲死，活。』」

2

伊就越轉面向壁，祈禱耶和華講：

3

「耶和華啊，求你記念我佇你的面前怎樣存完全的心，照誠實來行，閣做你所看做好的。」希西家就大聲啼哭。

4

以賽亞出去，猶未到中院，耶和華的話就臨到伊，講：

5

「你越倒轉給我的百姓的人君希西家講：你的祖大衛的上帝──耶和華按呢講：『我已經聽見你的祈禱，看見你的目屎，看啊！我欲醫好你；到第三日，你欲上去耶和華的殿。

6

我欲加添你的歲壽十五年，閣我欲救你及此個城脫離亞述王的手。我為著家己的緣故，閣為著我的奴僕大衛的緣故，欲保護此個城。』」

7

以賽亞講：「著提一塊無花果餅來。」就提來，貼佇仔，王就好。

8

希西家問以賽亞講：「耶和華欲醫好我，到第三日，我欲上去耶和華的殿，有甚麼兆頭？」

9

以賽亞講：「耶和華欲成伊所講的。這是耶和華欲互你的兆頭：你欲日影進前十度？抑是退後十度啊？」

10

希西家應講：「日影進前十度是卡快，無啦，著日影退後十度。」

11

先知以賽亞求叫耶和華，伊就互亞哈斯的日晷進前的日影，退後十度。

12

當時，巴比倫王巴拉但的子比羅達巴拉但聽見希西家破病，就送批信及禮物互希西家。

13

希西家聽使者的話，就將伊囥寶物的厝、金銀、香料、貴氣的油，及伊的軍藏局，及府庫內一切所有的，攏互看。伊的家中及伊全國的內面，希西家無一項無互看。

14

對按呢先知以賽亞來見希西家王，問伊講：「諸個人講甚麼？對叨落來見你？」希西家講：「對遠遠的所在就是對巴比倫來。」

15

以賽亞講：「佇你的家有看見甚麼？」希西家應講：「凡若我家中所有的攏有看見，我的財寶的中間無一項無互看見。」

16

以賽亞對希西家講：「你著聽耶和華的話，

17

看啊，日子欲到，凡若你家內所有的及你的列祖積聚到現今的，攏欲受搶到巴比倫，無留一項。這是耶和華講的。

18

閣對你本身所生的子孫，其中有的欲受掠去佇巴比倫的王宮當太監。」

19

希西家對以賽亞講：「你所傳耶和華的話是好！閣講，我猶佇的日若有太平堅固，豈呣是好？」

20

希西家其餘的事及伊的能力，伊怎樣掘池、開溝、引水入城，豈無攏記佇猶大列王的記錄嗎？

21

希西家及伊的列祖同睏。伊的子瑪拿西續接伊做王。