哥林多後書 第 10 章 - 台語漢字羅馬本

1

我保羅，相見面的時就佇恁中間做卑微，相離開的時就向恁做好膽的，今用基督的溫柔、純良家己勸恁。

2

有人拍算阮是照肉體來行，我拍算決意著用好膽來辦；求恁莫得互我佇相對面的時有此號決意的好膽。

3

因為阮雖然佇肉體來行，呣是照肉體來交戰。

4

因為阮交戰的器具呣是屬佇肉體，是佇上帝的面前有氣力夠額，通來攻破諸個堅固的營寨，

5

凡若諸個計謀，以及攏總高高的物，所舉起來阻擋人識上帝的，阮攏毀壞伊，將攏總的念頭掠來，互伊順服基督。

6

閣已經備辦便，聽候恁完全順服，才來責罰攏總的無順服的。

7

恁看目前啊！若有人靠家己是屬基督的，伊著閣家己想，看伊怎樣屬基督，阮也是按呢。

8

主所賞賜阮的權，是欲建立恁，呣是欲敗壞恁；阮就若為著此個權略仔過頭誇口，也不致見誚。

9

免得我親像用批互恁驚；

10

因為有人講：「伊的批　重閣有力，若是相對面的時，身軀軟茈，講話俗俗。」

11

彼號人著想，阮相離開的時，批裡講話是甚麼款，相對面的時，做事也是按呢。

12

有人家己謳咾，阮呣敢及掠平及比並。若是用家己批評家己，也用家己比並家己，是無智識。

13

若是阮無欲誇口過份的事，就是照上帝所派互阮限定的份額，此個份額恁也在內。

14

因為阮呣是過份，那親像呣應該到佇恁的；是阮傳基督的福音也曾到佇恁。

15

阮呣是過份來誇口別人的著磨；就是向望恁信愈深，就阮佇恁中間照我的份額，會開闊到滿出去，

16

來傳福音到佇恁界外的地；無用別人份內已經做便的事來誇口。

17

誇口的人，著用主來誇口。

18

因為呣是家己謳咾的人上取，就是主所謳咾的上取。