歷代志下 第 8 章 - 台語漢字羅馬本

1

到二十年尾，就是所羅門起耶和華的殿及王宮完工的時。

2

所羅門閣起戶蘭所互所羅門許個城，互以色列人住佇遐。

3

所羅門去到哈馬瑣巴，攻取伊。

4

伊閣佇曠野起達莫，及佇哈馬所起許個府庫的城，

5

閣起頂伯和崙，下伯和崙是險要的城，有牆，有門，有楗；

6

閣起巴拉及所羅門所有府庫的城，及下車的城及馬兵的城，及所羅門佇耶路撒冷、佇黎巴嫩，及佇伊所治理的全地，為家己的快樂所愛起的，攏起伊。

7

論到所剩的百姓赫人、亞摩利人、比利洗人、希未人、耶布斯人，呣是屬佇以色列的，

8

就是佇此地方所剩的後裔，以色列人無一盡滅者，所羅門派做苦工，到今仔日。

9

總是以色列人，所羅門無互做奴僕做伊的工，是做伊的戰士，軍長的首領、車長、馬兵長。

10

所羅門王的大官，管理百姓者，二百五十人。

11

所羅門帶法老的查某子對大衛的城，上到伊所給伊起的厝；因為講：「我的某呣通徛起佇以色列王大衛的厝，因為耶和華的櫃所到的所在攏是聖地。」

12

所羅門佇耶和華的壇，就是佇兩廊的頭前所起的，獻燒祭互耶和華；

13

照摩西所命令佇安息日、月的初一，一年三擺所定著的節，就是除酵節、七七節、搭寮仔節，照逐日所應該獻的來獻。

14

閣照伊的老父大衛的例，定著祭司的班列，來做伊的工，閣定著利未人盡的職，互謳咾，閣佇祭司的面前服事照逐日所應該做的；閣設立顧門者，照的班列佇逐個門，這是上帝的奴僕大衛所命令的。

15

王所命令許個祭司及利未人，無論管府庫抑是別項事，攏無違逆。

16

所羅門起耶和華的殿，對下地基到成功的日，工料攏代先備辦。按呢，耶和華的殿攏起好。

17

彼時，所羅門去以東地到佇海墘的以旬迦別及以祿。

18

希蘭託伊的奴僕，差船隻及知影海路的奴僕到伊遐。及所羅門的奴僕到俄斐，對遐得著金四百五十他連得，運到所羅門王遐。