歷代志下 第 29 章 - 台語漢字羅馬本

1

希西家坐位的時二十五歲，佇耶路撒冷做王共二十九年。伊的老母名叫亞比雅，是撒迦利雅的查某子。

2

伊行耶和華所看做好的事，照伊的祖大衛一切所行的。

3

佇元年正月，開耶和華殿的門，修理伊。

4

伊召許個祭司及利未人來，聚集佇東勢闊的所在，

5

給講：「利未人啊，著聽我講：今恁著清氣家己，也著清氣耶和華──恁列祖的上帝的殿，對聖所傾出許個污穢。

6

因為咱的列祖有犯罪，行耶和華──咱的上帝所看做歹的事，離開伊，越轉伊的面，背耶和華徛起的所在，

7

閣關鎖兩廊的門，拍熄燈火，無佇聖所燒香，獻燒祭互耶和華──以色列的上帝。

8

所以，耶和華受氣臨到猶大及耶路撒冷，互漂流，互人卬愕、恥笑，親像恁親目所看見的。

9

因為按呢阮的父公受刀，阮的子查某子及阮的某也互人掠去。

10

今我的心欲及耶和華──以色列的上帝立約，互伊的大受氣越轉離開咱。

11

我諸個子啊，今呣通貧憚；因為耶和華揀恁徛佇伊的面前服事伊，擔當責任燒香互伊。」

12

對按呢，利未人哥轄族亞瑪賽的子瑪哈，亞撒利雅的子約珥；米拉利族亞伯底的子基士，耶哈利勒的子亞撒利雅；革順族薪瑪的子約亞，約亞的子伊甸；

13

以利撒反的族申利及耶利；亞薩族撒迦利雅及瑪探雅；

14

希幔族耶歇及示每；耶杜頓族示瑪雅及烏設攏起來；

15

聚集的兄弟，清氣家己，照王趁耶和華的話所命令的，入去洗清耶和華的殿。

16

祭司入耶和華殿的內面欲洗清伊，將耶和華殿內所有的污穢帶出去，到耶和華殿的院，利未人接伊，帶去外面到汲淪溪。

17

對正月初一日起手行清氣的事，彼月的初八日才到耶和華的兩廊，八日久清氣耶和華的殿，到正月十六日就明白。

18

對按呢，入去見希西家王，講：「阮已經將耶和華的歸間殿及燒祭的壇以及伊的器具，排列餅的桌，及伊的器具攏洗清；

19

閣亞哈斯王坐位犯罪的時所棄拺的器具，阮攏備辦，閣清氣伊。看啊，今攏佇耶和華的壇前。」

20

希西家王透早起來，聚集城內的首領攏上耶和華的殿；

21

牽七隻牛，七隻羊，七隻綿羊仔，七隻山羊，欲為國、為聖所、為猶大獻做贖罪的祭。王命令亞倫的子孫許個祭司，獻佇耶和華的壇，

22

就牛，祭司接彼個血灑佇壇裡，也羊，用血灑佇壇裡，閣綿羊仔，也用血灑佇壇裡；

23

用許個做贖罪祭的山羊牽到王及會眾的面前，就按手佇彼頂面。

24

祭司伊，用的血做贖罪的祭佇壇裡，為以色列眾人贖罪，因為王命令著用燒祭及贖罪祭為以色列眾人來獻。

25

王閣派利未人佇耶和華的殿提鈸，瑟琴，照大衛及王的先見迦得，及先知拿單所命令的，因為耶和華有託仗伊許個先知命令按呢。

26

利未人提大衛的樂器，祭司抬號頭，相及徛。

27

希西家命令獻燒祭佇壇裡，燒祭一下獻，就唱謳咾耶和華的歌，用號頭，閣用以色列王大衛的樂器來和伊。

28

會眾攏敬拜，唱歌的唱伊，歕號頭的歕伊，按呢到燒祭獻明白。

29

獻明白，王及一切相及佇的人攏俯頭敬拜。

30

希西家王及許個首領閣命令利未人用大衛及先見亞薩的詩，謳咾耶和華；就歡喜吟詩謳咾，俯頭敬拜。

31

希西家就應講：「恁已經家己分別歸互耶和華，著近前來帶物及謝恩祭到耶和華的殿。」會眾就帶祭物及謝恩祭來，見若甘心樂意的也帶燒祭來。

32

會眾所獻燒祭的額計共：牛七十隻，羊一百隻，綿羊仔二百隻，諸個攏是做燒祭獻互耶和華的；

33

閣有分別做聖的物，牛六百隻，綿羊三千隻。

34

總是祭司甚少，會一盡剝許個燒祭精牲的皮，所以的兄弟利未人幫助，到彼個代誌明白，閣聽候許個祭司家己清氣；因為利未人誠心家己清氣，贏過祭司。

35

燒祭及謝恩祭的油，及逐號燒祭所配的灌奠真多。按呢，耶和華殿內的事照次序排列。

36

希西家及眾百姓歡喜，因為上帝替百姓所備辦的，因為此個事忽然成。