歷代志下 第 26 章 - 台語漢字羅馬本

1

猶大眾百姓設立烏西雅續接伊的老父亞瑪謝做王，彼時伊十六歲。（

2

亞瑪謝王及伊的列祖同睏了後，烏西雅去以祿，互伊猶原歸猶大管轄。）

3

伊坐位的時十六歲，佇耶路撒冷做王共五十二年。伊的老母名叫耶可利雅，是耶路撒冷人。

4

烏西雅行耶和華所看做好的事，照伊的老父亞瑪謝一切所行的；

5

當通達上帝啟示的，撒迦利亞佇的日，烏西雅定著意思欲尋上帝；伊尋耶和華的時，上帝就互伊亨通。

6

伊出去攻擊非利士人，拆毀迦特的城牆、雅比尼的城牆，及亞實突的城牆；佇非利士人的中間，佇亞實突境內，起幾若個城。

7

上帝幫助伊攻擊非利士人及踮佇姑珥巴力的阿拉伯人，以及米烏尼人。

8

亞捫人進貢烏西雅。伊的名聲傳到埃及的交界，因為伊盡在強盛。

9

烏西雅佇耶路撒冷的角門及山谷門，及城牆轉彎的所在，起城樓，閣真堅固；

10

閣起守更樓佇曠野，閣開多多井佇低的地及平洋，因為伊有精牲真多；閣佇山地及好的田，伊有作穡人及料理葡萄園者，因為伊歡喜種作的事。

11

烏西雅閣有戰士一隊，照書記耶利及首領瑪西雅所點算的，佇王軍長的一個哈拿尼雅的手下，分隊出去交戰。

12

族長就是大能力的勇士，伊的總額共二千六百人，

13

佇的手下有過練的軍隊共三十萬七千五百人，攏是大能力，爭戰幫助王攻擊對敵的。

14

烏西雅為著就是伊的全軍備辦盾牌、槍、頭盔、戰甲，及弓，以及通甩的石，

15

閣佇耶路撒冷做機器，是奇巧的師傅所發明的，安佇城樓及城壔址來射箭發出大塊石。烏西雅的名聲傳到遠遠；因為伊得著非常的幫助，致到真強盛。

16

伊已經強盛，心就驕傲，致到腐敗，干犯耶和華──伊的上帝，因為伊入耶和華的殿，欲佇香壇燒香。

17

祭司亞撒利雅導耶和華勇敢的祭司八十人，隨伊入去。

18

就阻擋烏西雅王，給伊講：「烏西雅啊，燒香互耶和華呣是你的代誌，就是祭司亞倫的子孫的事，受設立來燒香的。你著出聖殿！因為你已經犯罪。你行此個事，耶和華上帝無欲互你得著榮光。」

19

烏西雅就受氣，手提香爐欲燒香。伊受氣祭司的時，佇耶和華殿內香壇邊許個祭司的面前，伊的頭額忽然起癩。

20

祭司頭亞撒利雅及眾祭司，看見伊頭額起癩，就趕伊出殿；伊家己也緊緊出去，因為耶和華拍伊。

21

烏西雅王起癩到伊死的日，因為伊癩另外厝徛起，及耶和華的殿絕斷。伊的子約坦管理王家，治理國民。

22

烏西雅其餘的事，對頭到尾亞摩斯的子先知以賽亞記伊。

23

烏西雅及伊的列祖同睏；因為講，伊是癩的。人埋葬伊佇屬列王的墓地，及伊的列祖做堆。伊的子約坦續接做王。