歷代志下 第 15 章 - 台語漢字羅馬本

1

上帝的神臨到俄德的子亞撒利雅。

2

伊出去迎接亞撒，給伊講：「亞撒及猶大、便雅憫的眾人啊，著聽我的話：恁及耶和華佇，伊也及恁佇；恁若尋伊，伊欲互恁尋著；總是恁若棄拺伊，伊也欲棄拺恁。

3

以色列人久久無真的上帝，無教示的祭司，也無律法；

4

總是佇患難的時歸向耶和華──以色列的上帝，來尋伊，伊就互伊尋著。

5

彼時，出入的人得著平安，列國徛起的百姓攏抵著大擾亂；

6

國攻擊國，城攻擊城，攏相毀壞，因為上帝用逐樣患難擾亂。

7

今恁著勇健，手呣通軟落去，因為恁的所做欲得著報賞。」

8

亞撒已經聽見諸個話及先知俄德的讖語，就壯膽，佇猶大便雅憫全地，及伊所取以法蓮山地許個城，除去攏總可惡的物，閣佇耶和華兩廊前新起耶和華的壇；

9

閣聚集猶大、便雅憫的眾人，及以法蓮、瑪拿西、西緬出外佇中間的人。因為對以色列出來歸亞撒的真多，是為著看見耶和華──伊的上帝及伊佇。

10

亞撒王十五年三月，攏聚集佇耶路撒冷。

11

彼日佇所帶來許個搶的物的中間，用牛七百隻、羊七千隻獻互耶和華。

12

就立約，欲盡心盡性尋耶和華──列祖的上帝。

13

見若無尋耶和華──以色列的上帝的，無論大細、男女，著互伊死。

14

就用大聲用歡喜來喝，用號頭用哨角，來對耶和華咒誓。

15

猶大眾人為著所咒的誓歡喜；因為盡心咒誓，閣盡意尋耶和華，耶和華也互尋著，就佇四境賞賜平安。

16

亞撒王貶伊的媽瑪迦太后的位，因為伊為亞舍拉曾裝可惡的像。亞撒剉伊的像，搥伊到碎碎，燒伊佇汲倫溪邊。

17

獨獨許個山頭壇猶未對以色列中除去，總是亞撒的心一世人專一。

18

亞撒將伊的老父所分別做聖、及伊本身所分別做聖的金銀及器具攏帶入上帝的殿。

19

對此時到亞撒三十五年無閣有交戰的事。