撒母耳記上 第 9 章 - 台語漢字羅馬本

1

有一個便雅憫人，名叫基士，是便雅憫人亞斐亞的元孫，比歌拉的曾孫，洗羅的孫，亞別的子，是一個大氣力的勇士。

2

伊有一個子，名叫掃羅，勇壯、閣好生做，佇以色列中無一人會比得伊的好生做；身體比眾人卡高一個頭殼。

3

掃羅的老父基士拍呣見幾若隻驢母，基士給伊的子掃羅講：「你導一個奴僕起身去尋驢母。」

4

伊就經過以法蓮山地，及沙利沙的地，攏尋無；閣經過沙琳的地，也無佇遐；閣經過便雅憫的地，也尋無。

5

到蘇弗的地，掃羅給跟隨伊的奴僕講：「來啊，咱倒來去，驚了我的老父無掛慮驢，來煩惱咱。」

6

奴僕講：「看啊，此個城裡有一個上帝的奴僕，是人所尊重的，見伊所講的攏的確應驗。咱呣值著去伊遐，豈採伊會指示咱所行的路。」

7

掃羅給奴僕講：「咱若去，有甚麼通送彼人啊？因為咱袋仔內的食物攏了啦，也無禮物通送彼個上帝的奴僕，咱身邊猶有甚麼物無？」

8

奴僕閣應掃羅講：「我手裡有銀一舍客勒的四份一，我將此個來送彼個上帝的奴僕，請伊指示咱所行的路。」（

9

前以色列中，若有人去問上帝，就講：「咱來去見先見！」因為現今稱「先知」，前稱「先見」。）

10

掃羅給奴僕講：「你所講的話好，來啊，咱來去。」就去上帝的人所踮的城。

11

上山坪欲入城，就抵著幾若個少年的查某囝仔出來汲水，問講：「先見佇遮無？」

12

查某囝仔應講：「是啦，佇遮，看啊，伊佇你的頭前。趕緊去！伊今仔日抵仔到城，因為今仔日百姓佇山頭壇獻祭。

13

佇伊猶未上去山頭壇欲食桌的代先，恁一下入城就會抵著伊；因為伊猶未到，百姓無代先食，的確聽候伊代先祝福祭物，然後所請的人客才食。今恁上去，此時會抵著伊。」

14

二人就上城；已經入城，撒母耳出來，欲上高的所在就抵著。

15

掃羅未到的前一日，耶和華已經啟示撒母耳講：

16

「明仔再此時，我欲差一人對便雅憫地到你遮，你著給伊抹油做我的百姓以色列的頭。伊欲救我的百姓脫離非利士人的手；因為我的百姓哀求的聲透到我，我看顧。」

17

撒母耳看見掃羅的時，耶和華給伊講：「看啊，此人就是我所給你講的，伊欲管理我的百姓。」

18

掃羅佇城門裡倚近撒母耳，講：「請給我講，先見的厝佇叨落？」

19

撒母耳應掃羅講：「我就是先見。你佇我的頭前上去高的所在，因為恁今仔日欲及我食；明仔早起我欲互你去，你心內的事攏欲給你講。

20

你三日前拍呣見許個驢母，你呣免掛意，已經尋著啦。以色列眾人所欣慕的歸是誰啊？豈呣是歸你及你的老父的家嗎？」

21

掃羅應講：「我豈呣是便雅憫人以色列支派中極小可的嗎？便雅憫支派諸個家的中間我的家豈呣是極微細嗎？你啥事對我講此號話？」

22

撒母耳導掃羅及跟隨伊的人入客廳，互佇所請的人的中間坐大位；所請的約略有三十人。

23

撒母耳給廚房講：「我所交代你教你著收彼份，今通捧來。」

24

廚房就捧彼腿及頂面所有的，下佇掃羅的面前，撒母耳講：「你看，此個所留的，你著提起來食。因為我請百姓的時，刁故意給你留到定著的日。」彼日，掃羅就及撒母耳相及食。

25

對高的所在落來入城，撒母耳及掃羅佇厝頂講話。

26

早早起來，拍昲光的時，撒母耳佇厝頂。叫掃羅講：「起來啊，我欲送你倒去。」掃羅就起來，伊及撒母耳二人出去外面。

27

落去到城的角頭，撒母耳給掃羅講：「著吩咐奴僕代先咱去（奴僕就去）。」閣講：「你且徛，我欲互你聽上帝的話。」