撒母耳記上 第 7 章 - 台語漢字羅馬本

1

基列耶琳人來，帶耶和華的約櫃上去，到佇山頂亞比拿達的厝，分別伊的子以利亞撒顧守耶和華的約櫃。

2

約櫃佇基列耶琳日子久久。歷過二十年，以色列全家追念耶和華。

3

撒母耳給以色列全家講：「恁若一心歸順耶和華，就著對恁中間除去外邦的上帝及亞斯他錄，堅心歸向耶和華，單單服事伊。伊欲救恁脫離非利士人的手。」

4

以色列人就除去諸個巴力及亞斯他錄，單單服事耶和華。

5

撒母耳講：「著聚集以色列眾人佇米斯巴，我欲替恁祈禱耶和華。」

6

就聚集佇米斯巴，汲水傾佇耶和華的面前，佇彼日禁食，佇遐講：「阮有得罪耶和華。」撒母耳就佇米斯巴判斷以色列人。

7

非利士人聽見以色列人聚集佇米斯巴，非利士的首領就上來欲攻擊以色列人。以色列人聽見，就驚非利士人。

8

以色列人給撒母耳講：「願你替阮求叫耶和華──咱的上帝無息，互伊救咱脫離非利士人的手。」

9

撒母耳就用一隻食奶的羊仔歸隻燒獻互耶和華做燒祭，撒母耳替以色列人求叫耶和華；耶和華應伊。

10

撒母耳獻燒祭的時，非利士人進前來，欲及以色列人交戰。佇彼日，耶和華起大聲的雷攻擊非利士人，拍亂，就輸佇以色列人的面前。

11

以色列人對米斯巴出來，追趕非利士人，拍，直到伯甲的下面。

12

撒母耳用一塊石徛佇米斯巴及善的中間，叫伊的名以便以謝，講：「到此霎耶和華幫助咱。」

13

對此霎，非利士人就屈服，呣敢閣入以色列人的境內。撒母耳一生的日，耶和華的手攻擊非利士人。

14

非利士人所有取以色列人的城，對以革倫到迦特，攏還以色列人。許個境界，以色列人也對非利士人的手收倒轉。彼時以色列人及亞摩利人和好。

15

撒母耳一生做以色列的士師。

16

伊逐年巡視伯特利、吉甲、米斯巴諸個所在判斷以色列人。

17

就倒轉去到拉瑪，因為伊的家佇遐；也佇遐判斷以色列人，也佇遐給耶和華起一座壇。