撒母耳記上 第 5 章 - 台語漢字羅馬本

1

非利士人帶上帝的約櫃對以便以謝扛到亞實突。

2

非利士人將上帝的櫃扛入大袞的廟，下佇大袞的身邊。

3

隔早起，亞實突的人起來，看見大袞跋倒佇耶和華的櫃前，面仆佇地裡，就將大袞閣祀佇伊的原位。

4

閣隔日透早起來，看見大袞跋倒佇耶和華的櫃前，面仆佇地裡，閣大袞的頭及二支手掌攏折佇戶椗頂，只有剩大袞啒啒的身軀。（

5

為著按呢，大袞的祭司及一切入亞實突、大袞的廟的人攏無踏大袞的戶椗，直到今仔日。）

6

耶和華的手重重拍亞實突人，敗壞，互發仔症。就是亞實突及伊的境內攏是按呢。

7

亞實突人看見按呢，就講：「以色列上帝的櫃呣通踮佇咱中間，因為伊的手重重拍咱及咱的上帝大袞」；

8

就差人請非利士許個首領來聚集遐，講：「以色列上帝的櫃咱著怎樣設法啊？」應講：「通將以色列上帝的櫃運去迦特。」就將以色列上帝的櫃運到遐。

9

運到了後，耶和華的手攻擊彼個城，互彼個城的人真大亂，閣拍城內的人無論大細，攏發仔症。

10

就將上帝的櫃送到以革倫。上帝的櫃到以革倫，以革倫的人就喝講：「將以色列上帝的櫃運到咱遮，欲害死咱及咱的百姓！」

11

就差人聚集非利士攏總的首領，講：「以色列上帝的約櫃著送伊去互伊倒去本所在，免得伊害死咱及咱的百姓！」彼時通城有致到死的擾亂，因為上帝的手佇遐拍真重；

12

無死的人攏抵著仔症。城中啼哭的聲，透到天裡。