彼得前書 第 5 章 - 台語漢字羅馬本

1

所以恁中間的長老我苦勸，我也同做長老，也做基督受苦的干證，也相及有份欲顯現的榮光：

2

恁著照顧佇恁中間上帝的羊群，來監督伊；呣是對勉強，是甘心照上帝；呣是為著呣合宜的錢，是對歡喜的意思；

3

也呣是佇所交代恁的做主，是做羊群的模樣。

4

就大牧者顯現的時，恁欲得著衰退榮光的冕旒。

5

按呢恁少年人，著降服長老。恁大家也攏著用謙遜做衫穿，來相服事；因為上帝抵敵驕傲者，施恩互謙卑者。

6

所以，著家己謙卑，佇上帝大氣力的手下，互伊到時高升恁。

7

恁用凡所掛慮的交付伊，因為伊關心佇恁。

8

著節制，著警醒。恁的對敵就是魔鬼，親像哮的獅，四界行，尋所通吞食者。

9

恁對信堅固著抵當伊，知恁眾兄弟佇世間也經過此樣的苦難。

10

閣萬項恩典的上帝就是曾佇基督召恁，得著伊永遠的榮光的，佇恁暫時受苦的了後，家己欲互恁齊全、堅固、勇健。

11

權能歸伊，到代代。阿們！

12

我看西拉做盡忠的兄弟，對伊寫短短的批互恁，來苦勸恁，也干證此個是上帝真的恩。恁著徛在佇此個。

13

佇巴比倫相及受揀選的，以及我的子馬可請安恁。

14

恁著用仁愛的相唚來相請安。願恁佇基督的人攏得平安！