約翰一書 第 2 章 - 台語漢字羅馬本

1

我的細子啊，我寫諸個互恁，是欲互恁無犯罪。若有人犯罪，就佇父的面前咱有保惠師，就是義人耶穌基督。

2

伊為著咱的罪做挽回的祭，閣呣若為著咱的罪，也是為著通世間。

3

咱若守伊的命令，對按呢就知咱識伊。

4

人若講「我識伊」，也無守伊的命令，是白賊的人，真理也無佇伊。

5

見若守伊的道理的，就上帝的疼佇伊真正有齊全。對按呢，咱知咱佇伊。

6

人若家己講佇伊，就著照伊所行的去行。

7

所疼的兄弟啊，我無寫新的命令互恁，就是恁對起頭所有舊的命令；彼個舊的命令就是恁所曾聽見的道理。

8

又閣，我寫新的命令互恁，此個代誌佇伊是真，佇恁也是真；因為黑暗過，真光已經照。

9

人若講家己佇光明，也怨恨伊的兄弟，就伊到今是佇黑暗。

10

人若疼伊的兄弟，伊是徛起佇光，也佇伊無跋倒的因由。

11

獨獨人若怨恨伊的兄弟，伊是佇暗，閣行佇暗，也呣知所去的，因為此個暗互伊的目睭睛暝。

12

細子啊，我寫批互恁，因為恁的罪為著伊的名已經赦免。

13

老大啊，我寫互恁，因為恁識彼個對起頭就有的。少年人啊，我寫互恁，因為恁已經卡贏彼個歹者。細子啊，我曾寫互恁，因為恁識父。

14

老大啊，我曾寫互恁，因為恁識彼個對起頭就有的。少年人啊，我曾寫互恁；因為恁勇健，也上帝的道理佇恁；也恁已經卡贏彼個歹者。

15

莫得疼此世間以及世間的物。人若疼此世間，就父的疼無佇伊。

16

因為，見若佇世間的，肉體的私慾，及目睭的私慾，及人生的驕傲，呣是對父，是對世間。

17

閣世間及伊的私慾過去，獨獨行上帝的旨意的，永遠佇。

18

細子啊，這是路尾的時。親像恁曾聽見，有彼個對敵基督的來；現今有出多多對敵基督的，對按呢咱知是路尾的時。

19

對咱出去，獨獨呣是屬咱的；因為若是屬咱的，就會長長及咱；出去，是欲顯明攏呣是屬咱的。

20

閣恁對聖者受抹油，續知一切的代誌。

21

我批寫互恁，是呣是因為恁呣識真理。因為恁識伊，也因為一切的白賊攏呣是對真理。

22

白賊的是是誰？豈呣是無認耶穌做基督的嗎？無認父及子的，此個就是彼個對敵基督的。

23

見若無認子的，也無有父；認子的，也有父。

24

恁對起頭所聽見的，著互伊長長佇恁。若是對起頭所聽的佇恁，就恁也欲佇子及父。

25

此個也是伊所應允咱的應允，就是永活。

26

我寫諸個互恁，是論許個迷惑恁的。

27

恁對伊所受的抹油長長佇恁，也呣免人教恁，獨獨因為伊的抹油教示恁萬項事。也是真實，呣是白賊；也照伊曾教示恁的，恁長長佇伊。

28

今，細子啊，恁著長長佇伊。按呢，伊若顯現，才互咱佇伊閣臨到的時會好膽；也佇伊的面前無見誚。

29

恁若知伊是公義，就知見若行義的人也是伊生的。