歷代志上 第 15 章 - 台語漢字羅馬本

1

大衛就為家己起幾若間厝佇大衛的城，閣為上帝的約櫃備辦一所在，給伊搭布棚。

2

彼時大衛講：「除去利未人以外，無人通扛上帝的約櫃；因為耶和華揀扛上帝的約櫃，閣服事伊直到永遠。」

3

大衛聚集以色列眾人到耶路撒冷，愛將耶和華的約櫃扛到伊所給伊備辦的所在。

4

大衛閣聚集亞倫的子孫及利未人。

5

哥轄的子孫中有頭人烏列及伊的兄弟一百二十人。

6

米拉利的子孫中有頭人亞帥雅及伊的兄弟二百二十人。

7

革順的子孫中有頭人約珥及伊的兄弟一百三十人。

8

以利撒反的子孫中有頭人示瑪雅及伊的兄弟二百人。

9

希伯崙子孫中有頭人以列及伊的兄弟八十人。

10

烏設的子孫中有頭人亞米拿達及伊的兄弟一百十二人。

11

大衛召祭司撒督及亞比亞他，以及利未人烏列、亞帥雅、約珥、示瑪雅、以列、亞米拿達諸個人來，

12

對講：「恁是利未人的族長，恁及恁的兄弟著家己清氣，才通將耶和華──以色列上帝的約櫃扛到我所給伊備辦的所在。

13

因為恁從前無按呢做，咱的上帝──耶和華已經責罰咱，因為咱無照定著的例尋伊。」

14

對按呢祭司及利未人清氣家己，欲將以色列的上帝──耶和華的約櫃扛上來。

15

利未的子孫就用槓，扛上帝的約櫃佇肩頭頂，照摩西趁耶和華的話所命令的。

16

大衛教利未的族長，分派唱歌的兄弟作樂用瑟及琴及鐃鈸，歡喜出聲來唱。

17

對按呢利未人分派約珥的子希幔及伊兄弟中比利家的子亞薩，及同族的兄弟米拉利的子孫中古沙雅的子以探。

18

閣有第二班的兄弟撒迦利雅、便雅設、示米拉末、耶悅、烏尼、以利押、比拿雅、瑪西雅、瑪他提雅、以利斐利戶、彌克尼雅，及顧門者俄別以東及耶利。

19

按呢，派唱歌者希幔、亞薩、以探拍鐃鈸出大聲；

20

派撒迦利雅、雅設、示米拉末、耶悅、烏尼，以利押、瑪西雅、比拿雅彈瑟，伊的聲音清亮；

21

閣派瑪他提雅、以利斐利戶、彌克尼雅、俄別以東、耶利、亞撒西雅做頭彈琴，調用第八。

22

利未人的頭人基拿尼雅是管理唱歌，閣教人唱歌，因為伊精通此個。

23

比利家、以利加拿是約櫃前顧門者。

24

祭司示巴尼、約沙法、拿單業、亞瑪賽、撒迦利雅、比拿亞、以利以謝佇上帝的約櫃前歕號頭。俄別以東及耶希亞也是約櫃前顧門者。

25

對按呢，大衛及以色列的長老，及千總攏去俄別以東的家歡喜扛耶和華的約櫃對遐上來。

26

上帝幫助扛耶和華約櫃的利未人，就獻公的牛七隻，公的羊七隻。

27

大衛穿幼苧布的長衫，扛約櫃的利未人及唱歌者，以及管理唱歌的基拿尼雅，連唱歌的人攏是按呢；大衛閣穿幼苧布的以弗得。

28

按呢，以色列眾人出大聲，歕哨角、歕號頭、拍鐃鈸、彈琴及瑟，扛耶和華的約櫃上來。

29

耶和華的約櫃到大衛城的時，掃羅的查某子米甲對窗仔內看，看見大衛王趒跳跳舞，心內就看輕伊。