雅歌 第 6 章

1

(THR) Lí chit ê lú-kài-tiong tē-it súi-ê ah, Lí só͘ lôan-ài--ê khì toh-lo̍h? Lí só͘ lôan-ài--ê o̍at-tńg khì toh-lo̍h, Hō͘ góan thang kap lí khì chhē i?

(BCL) 你此個女界中第一娞的啊，你所戀愛者去叨落？你所戀愛者越轉去叨落，互阮通及你去尋伊。

2

(THR) Góa só͘ lôan-ài-ê lo̍h--khì i ê hn̂g, Kàu phang-hoe kui-pâi, tī hn̂g-lāi chhī iûⁿ-kûn, Koh bán pek-ha̍p-hoe.

(BCL) 我所戀愛者落去伊的園，到芳花歸排，佇園內飼羊群閣挽百合花。

3

(THR) Góa sio̍k góa só͘ lôan-ài-ê, góa só͘ lôan-ài-ê iā sio̍k góa; I tī pek-ha̍p-hoe ê tiong-kan chhī iûⁿ-kûn.

(BCL) 我屬我所戀愛者，我所戀愛者也屬我；伊佇百合花的中間飼羊群。

4

(THR) Góa só͘-thiàⁿ-ê ah, lí súi chhin-chhiūⁿ Tek-sat, Siⁿ-chòe hó chhin-chhiūⁿ Iâ-lō͘-sat-léng, Ui-gî chhin-chhiūⁿ kia̍h tōa-kî ê kun-tūi.

(BCL) 我所疼者啊，你娞親像得撒，生做好親像耶路撒冷，威儀親像抬大旗的軍隊。

5

(THR) Lí ê ba̍k-chiu m̄-thang khòaⁿ góa, In-ūi ōe to̍at góa ê sim-sîn; Lí ê thâu-mn̂g chhin-chhiūⁿ soaⁿ-iûⁿ kui-tīn, Tó tī Ki-lia̍t ê soaⁿ-piⁿ.

(BCL) 你的目睭呣通看我，因為會奪我的心神。你的頭毛親像山羊歸陣倒佇基列的山邊。

6

(THR) Lí ê chhùi-khí chhin-chhiūⁿ kui-tīn ê iûⁿ-bú, Sóe chheng-khì chiūⁿ-lâi; Ta̍k-chiah ū siang-siⁿ kiáⁿ, Bô chı̍t-chiah sit-lo̍h i ê kiáⁿ.

(BCL) 你的嘴齒親像歸陣的羊母，洗清氣上來，逐隻有雙生子，無一隻失落伊的子。

7

(THR) Lí ê pìn-piⁿ tī phè-lāi, Chhin-chhiūⁿ chı̍t-tè sia̍h-liû.

(BCL) 你的鬢邊佇帕內，親像一塊石榴。

8

(THR) Ū la̍k-cha̍p ê ông-hō͘, poeh-cha̍p ê pīn-hui, Iā ū sǹg-bōe-liáu ê kiong-lú.

(BCL) 有六十個王后八十個嬪妃，也有算了的宮女。

9

(THR) Góa ê kap, góa ê sûn-chôan-ê, sī to̍k-it ê; I sī i ê lāu-bú to̍k-siⁿ ê, Sī siⁿ--i-ê só͘ te̍k-pia̍t thiàⁿ; Chiah ê cha-bó͘-gín-ná khòaⁿ-kìⁿ, chiū o-ló i ū hok-khì; Ông-hō͘ pīn-hui khòaⁿ-kìⁿ, iā o-ló i.

(BCL) 我的鴿，我的純全者，是獨一的，伊是伊的老母獨生的，是生伊者所特別疼。諸個查某囝仔看見就謳咾伊有福氣；王后嬪妃看見也謳咾伊。

10

(THR) Hit-ê ǹg gōa-bīn khòaⁿ--chhut-lâi, chhin-chhiūⁿ chá-khí-sî ê kng, Súi chhin-chhiūⁿ ge̍h, chheng-kiat chhin-chhiūⁿ jı̍t, Ui-gî chhin-chhiūⁿ kia̍h tōa-kî ê kun-tūi ê, Sī chī-chūi ah?

(BCL) 彼個向外面看出來、親像早起時的光、娞親像月、清潔親像日，威儀親像抬大旗的軍隊的是是誰啊？

11

(THR) Góa lo̍h-khì ngī-khak ê ké-chí-hn̂g, Beh khòaⁿ soaⁿ-kok-tiong chhiⁿ-chhùi ê sı̍t-bu̍t, Beh khòaⁿ phû-tô hoat-íⁿ á-bē, Sia̍h-liû khui-hoe á-bē.

(BCL) 我落去硬殼的果子園，欲看山谷中青翠的植物，欲看葡萄發芛抑未，石榴開花抑未。

12

(THR) Bô phah-sǹg ê sî, góa ê sim an-tì góa, Tī chun-kùi ê lâng ê chhia.

(BCL) 無拍算的時，我的心安置我佇尊貴的人的車。

13

(THR) Tò-lâi ah, tò-lâi ah, Su-la̍h-bı̍t ah, Tò-lâi, tò-lâi, hō͘ góan khòaⁿ-kìⁿ lí. Lín ūi-hô beh khòaⁿ Su-la̍h-bı̍t, Chhin-chhiūⁿ khòaⁿ Má-hap-liām ê thiàu-bú ah?

(BCL) 倒來啊，倒來啊，書拉密啊；倒來，倒來，互阮看見你。恁為何欲看書拉密，親像看瑪哈念的跳舞啊？

Bible Color Mark

• 台語漢字羅馬本
• 巴克禮全羅