啟示錄 第 20 章

1

(THR) Góa koh khòaⁿ-kìⁿ thiⁿ-sài tùi thiⁿ lo̍h-lâi, chhiú-nı̍h ū chhim-ian ê só-sî, kap tōa tiâu thih-liān.

(BCL) 我閣看見天使對天落來，手裡有深淵的鎖匙及大條鐵鍊。

2

(THR) Chiū lia̍h hit bé lêng, chiū-sī lāu chôa, iā sī Mô͘-kúi kap Sat-tàn, pa̍k i chı̍t-chheng nî kú.

(BCL) 就掠彼尾龍，就是老蛇，也是魔鬼及撒但，縛伊一千年久，

3

(THR) hiat i lo̍h chhim-ian, koaiⁿ-ba̍t, ēng ìn hong tī hit téng-bīn, hō͘ i bô thang koh bê-he̍k lia̍t-pang, thèng-hāu chı̍t-chheng nî móa; í-āu tek-khak chiām-sî tháu-pàng.

(BCL) 伊落深淵，關密，用印封佇彼頂面，互伊無通閣迷惑列邦。聽候一千年滿，以後的確暫時解放。

4

(THR) Góa koh khòaⁿ-kìⁿ hiah ê chō-ūi, iā ū chē tī hit téng-bīn ê, ū tit-tio̍h sím-phòaⁿ ê kôan hō͘ in: koh khòaⁿ-kìⁿ hiah ê ūi-tio̍h chòe Iâ-so͘ ê kan-chèng kap ūi-tio̍h Siōng-tè ê tō lâi siū thâi-thâu ê lâng ê lêng-hûn, í-kı̍p m̄ bat pài siù kap siù ê siōng, iā bô siū i ê kì-hō tī thâu-hia̍h á-sī tī chhiú-nı̍h ê, chiah-ê lóng tit-tio̍h o̍ah, lâi kap Ki-tok chòe ông chı̍t chheng nî.

(BCL) 我閣看見許個座位，也有坐佇彼頂面的，有得著審判的權互。閣看見許個為著做耶穌的干證，及為著上帝的道來受頭的人的靈魂，以及呣曾拜獸及獸的相，也無受伊的記號佇頭額抑是佇手裡的，諸個攏得著活，來及基督做王一千年。

5

(THR) Kî-û ê sí-lâng bô o̍ah, thèng-hāu hit ê chı̍t chheng nî móa. Che sī thâu chı̍t pái ê koh-o̍ah.

(BCL) （其餘的死人無活，聽候彼個一千年滿。）這是頭一擺的復活。

6

(THR) Ū hūn tī chit ê thâu chı̍t pái ê koh-o̍ah ê ū hok-khì ah, sī sèng ah; tē jī pái ê sí kóan in bōe tio̍h: in beh chòe Siōng-tè kap Ki-tok ê chè-si, iā beh kap I chòe ông chı̍t chheng nî.

(BCL) 有份佇此個頭一擺的復活的有福氣啊，是聖啊！第二擺的死管著。欲做上帝及基督的祭司，也欲及伊做王一千年。

7

(THR) Hit ê chı̍t chheng nî móa, Sat-tàn beh siū tháu-pàng chhut i ê kaⁿ,

(BCL) 彼個一千年滿，撒但欲受解放出伊的監，

8

(THR) chiū chhut-lâi bê-he̍k tōe-chiūⁿ sì-hng ê lia̍t-pang, chiū-sī Kok kap Má-kok, chū-chı̍p in lâi kau-chiàn; in ê siàu-gia̍h chhin-chhiūⁿ hái soa.

(BCL) 就出來迷惑地上四方的列邦，就是各及瑪各，聚集來交戰。的數額親像海沙。

9

(THR) In chiū khí-lâi piàn-móa chôan tōe, sòa ûi-khùn sèng-tô͘ ê iâⁿ, kap tit-tio̍h thiàⁿ ê siâⁿ; chiū ū hé tùi thiⁿ kàng-lo̍h, lâi bia̍t in.

(BCL) 就起來遍滿全地，續圍困聖徒的營及得著疼的城，就有火對天降落，來滅。

10

(THR) Bê-he̍k in ê Mô͘-kúi siū hiat-lo̍h hé kap jiû-n̂g ê ô͘, tī hia iā ū siù kap ké ê sian-ti ; in beh mî-jı̍t siū khó͘-chhó͘, tāi-tāi bô chīn.

(BCL) 迷惑的魔鬼受落火及硫磺的湖，佇遐也有獸及假的先知。欲暝日受苦楚，代代無盡。

11

(THR) Góa koh khòaⁿ-kìⁿ chı̍t ê pe̍h-sek tōa ê chō-ūi kap chē hit téng-bīn ê, tōe kap thiⁿ tùi I ê bīn-chêng tô-cháu bô koh ū in ê ūi-chhù.

(BCL) 我閣看見一個白色大的座位及坐彼頂面的；地及天對伊的面前逃走，無閣有的位處。

12

(THR) Góa iā khòaⁿ-kìⁿ sí-lâng tōa kap sòe lóng khiā tī chō-ūi chêng; chiah ê chheh chiū hian-khui; koh ū pa̍t pún chheh hian-khui, chiū-sī o̍ah-miā chheh; sí-lâng chiū chiàu in ê só͘ kiâⁿ, pîn chiah ê chheh só͘ kì-chài lâi siū sím-phòaⁿ.

(BCL) 我也看見死人大及細攏徛佇座位前。諸個冊就掀開，閣有別本冊掀開，就是活命冊。死人就照的所行，憑諸個冊所記載來受審判。

13

(THR) Hái chiū kau-chhut i tiong-kan ê sí-lâng; sí kap im-hú iā kau in tiong-kan ê sí-lâng. Ta̍k lâng chiū chiàu in ê só͘ kiâⁿ siū sím-phòaⁿ.

(BCL) 海就交出伊中間的死人；死及陰府也交中間的死人；逐人就照的所行受審判。

14

(THR) Sí kap im-hú iā hiat-lo̍h hé-ô͘. Chit-ê chiū-sī tē jī pái ê sí, chiū-sī hé-ô͘.

(BCL) 死及陰府也落火湖；此個就是第二擺的死就是火湖。

15

(THR) Nā ū lâng bô kì miâ tī o̍ah-miā chheh ê, iā hiat-lo̍h hé-ô͘.

(BCL) 若有人無記名佇活命冊的，也落火湖。

Bible Color Mark

• 台語漢字羅馬本
• 巴克禮全羅