啟示錄 第 10 章

1

(THR) Góa koh khòaⁿ-kìⁿ pa̍t ê tōa khùi-la̍t ê thiⁿ-sài tùi thiⁿ kàng-lo̍h, chhēng hûn chòe saⁿ, thâu-khak téng ū khēng, i ê bīn chhin-chhiūⁿ jı̍t-thâu, kha chhin-chhiūⁿ hé-thiāu.

(BCL) 我閣看見別個大氣力的天使對天降落，穿雲做衫，頭殼頂有虹，伊的面親像日頭，腳親像火柱。

2

(THR) Chhiú tiong ū sòe-sòe kńg ê chheh, í-keng hian-khui ê, i chiàⁿ kha ta̍h tī hái-nı̍h, tò kha ta̍h tī tōe-nı̍h,

(BCL) 手中有細細卷的冊，已經掀開的。伊正腳踏佇海裡，倒腳踏佇地裡，

3

(THR) tōa siaⁿ âu-kiò, chhin-chhiūⁿ sai teh háu, i âu-kiò ê sî hit chhit ê lûi chiū chhut in ê siaⁿ.

(BCL) 大聲喉叫，親像獅哮。伊喉叫的時，彼七個雷就出的聲。

4

(THR) Chhit ê lûi í-keng chhut siaⁿ, góa beh siá i; to̍k-to̍k thiaⁿ-kìⁿ tùi thiⁿ ū siaⁿ kóng, Chhit ê lûi só͘ kóng ê, lí tio̍h hong-ba̍t, bo̍h-tit siá i.

(BCL) 七個雷已經出聲，我欲寫伊，獨獨聽見對天有聲講：「七個雷所講的，你著封密，莫得寫伊。」

5

(THR) Góa só͘ khòaⁿ-kìⁿ khiā tī hái kap tōe-nı̍h ê thiⁿ-sài, kia̍h-khí i ê chiàⁿ chhiú ǹg thiⁿ,

(BCL) 我所看見徛佇海及地裡的天使，抬起伊的正手向天，

6

(THR) kí chhòng-chō thiⁿ kap thiⁿ-nı̍h ê mı̍h, tōe kap tōe-nı̍h ê mı̍h, hái kap hái-nı̍h ê mı̍h, o̍ah kàu tāi-tāi bô kiông-chīn ê, lâi chiù-chōa kóng, í-āu bô koh ū sî-jı̍t;

(BCL) 指創造天及天裡的物，地及地裡的物，海及海裡的物，活到代代無窮盡的，來咒誓講：「以後無閣有時日。」

7

(THR) to̍k-to̍k tī tē chhit ê thiⁿ-sài chhut siaⁿ ê jı̍t, tng i beh pûn hō-thâu ê sî, Siōng-tè ê ò-biāu chiū chiâⁿ, chiàu I só͘ thôan hō͘ I ê lô͘-po̍k, hiah ê sian-ti ê hok-im.

(BCL) 獨獨佇第七個天使出聲的日，當伊欲歕號頭的時，上帝的奧妙就成，照伊所傳互伊的奴僕許個先知的福音。

8

(THR) Góa chêng só͘ thiaⁿ-kìⁿ tùi thiⁿ ê siaⁿ, taⁿ koh thiaⁿ-kìⁿ i tùi góa kóng ōe, kóng, Hit ê khiā tī hái kap tōe-nı̍h ê thiⁿ-sài, chhiú-tiong só͘ the̍h hian-khui ê chheh, lí tio̍h khì the̍h i.

(BCL) 我前所聽見對天的聲，今閣聽見伊對我講話，講：「彼個徛佇海及地裡的天使，手中所提掀開的冊，你著去提伊。」

9

(THR) Góa sûi-sî khì chiū-kūn hit ê thiⁿ-sài, kā i kóng tio̍h ēng hit kńg sòe-sòe ê chheh hō͘ góa. I chiū kā góa kóng, Lí the̍h-khì chia̍h i; i beh hō͘ lí ê pak-tó͘ khó͘, tī lí ê chhùi-lāi beh tiⁿ chhin-chhiūⁿ bı̍t.

(BCL) 我隨時去就近彼個天使，給伊講：「著用彼卷細細的冊互我。」伊就給我講：「你提去食伊，伊欲互你的腹肚苦，佇你的嘴內欲甜親像蜜。」

10

(THR) Góa chiū tùi hit ê thiⁿ-sài ê chhiú the̍h sòe kńg chheh lâi chia̍h i; tī góa chhùi-lāi kó-jiân tiⁿ chhin-chhiūⁿ bı̍t; í-keng thun-lo̍h-khì, góa ê pak-tó͘ chiū khó͘.

(BCL) 我就對彼個天使的手提細卷冊來食伊，佇我嘴內果然甜親像蜜，已經吞落去，我的腹肚就苦。

11

(THR) In kā góa kóng, Lí tio̍h koh chhàm-gú lâi lūn-khí chōe-chōe peh-sìⁿ, chōe-chōe pang kok, chōe-chōe khiuⁿ-kháu, chōe-chōe kun-ông ê sū.

(BCL) 給我講：「你著閣讖語來論起多多百姓，多多邦國，多多腔口，多多君王的事。」

Bible Color Mark

• 台語漢字羅馬本
• 巴克禮全羅