詩篇 第 94 章

1

(THR) Iâ-hô-hoa sin-oan ê Siōng-tè ah, Sin-oan ê Siōng-tè ah, kiû Lí hián-chhut kng.

(BCL) 耶和華，伸冤的上帝啊；伸冤的上帝啊，求你顯出光！

2

(THR) Sím-phòaⁿ sè-kài ê Chú ah, kiû Lí khí--lâi; Hō͘ kiau-ngō͘ ê lâng siū eng-kai siū ê pò-èng.

(BCL) 審判世界的主啊，求你起來，互驕傲的人受應該受的報應！

3

(THR) Iâ-hô-hoa ah, Pháiⁿ-lâng beh jōa-kú ah? Pháiⁿ-lâng tek-sèng tāi-ia̍t, beh jōa-kú ah?

(BCL) 耶和華啊，歹人欲偌久啊？歹人得勝大悅欲偌久啊？

4

(THR) In sûi-piān kóng, kóng-chhut kiau-ngō͘ ê ōe; It-chhè kiâⁿ-pháiⁿ ê lâng lóng ka-kī phín-phóng.

(BCL) 隨便講，講出驕傲的話；一切行歹的人攏家己品嗙。

5

(THR) Iâ-hô-hoa ah, in ap-chè Lí ê peh-sìⁿ; Khó͘-chhó͘ Lí ê sán-gia̍p.

(BCL) 耶和華啊，壓制你的百姓，苦楚你的產業。

6

(THR) In thâi-sí chiú-kóaⁿ-lâng kap chhut-gōa lâng; Koh hāi-sí ko͘-jî.

(BCL) 死守寡人及出外人，閣害死孤兒。

7

(THR) In kóng, Iâ-hô-hoa tek-khak bô teh khòaⁿ; Ngá-kok ê Siōng-tè tek-khak bô tì-ì.

(BCL) 講：耶和華的確無看；雅各的上帝的確無致意。

8

(THR) Lín peh-sìⁿ-tiong cheng-siⁿ hit-khóan ê lâng tio̍h siūⁿ; Gû-gōng ê lâng kàu tī-sî chiah ū tì-hūi ah?

(BCL) 恁百姓中精牲彼款的人著想；愚戇的人到底時才有智慧啊？

9

(THR) An-tì hī-khang--ê, chóng bô I bô thiaⁿ-kìⁿ? Chhòng-chō ba̍k-chiu--ê, chóng bô I bōe khòaⁿ-kìⁿ mah?

(BCL) 安置耳孔者，總無伊無聽見？創造目睭者，總無伊看見嗎？

10

(THR) Kàu-tok lia̍t-pang ê, chiū-sī hō͘ lâng tit-tio̍h tì-sek--ê, Chóng bô I bōe hiáu pān-lí lâng mah?

(BCL) 教督列邦的，就是互人得著智識者，總無伊曉辦理人嗎？

11

(THR) Iâ-hô-hoa chai lâng ê sim-su, Chai in sī khang-khang.

(BCL) 耶和華知人的心思知是空空。

12

(THR) Iâ-hô-hoa ah, Lí só͘ kàu-tok koh ēng Lí ê lu̍t-hoat só͘ kà-sī--ê, Hit ê lâng ū hok-khì.

(BCL) 耶和華啊，你所教督、閣用你的律法所教示者，彼個人有福氣！

13

(THR) Beh hō͘ i tī hōan-lān ê jı̍t, tit-tio̍h pêng-an, Kàu tī ūi-tio̍h pháiⁿ-lâng khui hām-khiⁿ ê sî.

(BCL) 欲互伊佇患難的日得著平安；到佇為著歹人開陷坑的時。

14

(THR) In-ūi Iâ-hô-hoa tek-khak bô khì-sak I ê peh-sìⁿ; Ia̍h bô pàng-lī I ê sán-gia̍p.

(BCL) 因為耶和華的確無棄拺伊的百姓，亦無放離伊的產業。

15

(THR) In-ūi sím-phòaⁿ beh chiàu kong-gī, Sim chèng-tı̍t ê lâng beh lóng tè I.

(BCL) 因為審判欲照公義；心正直的人，欲攏隨伊。

16

(THR) Chī-chūi beh ūi góa khí--lâi kong-kek pháiⁿ-lâng? Chī-chūi beh ūi góa khiā--khí-lâi kong-kek kiâⁿ chōe-ok ê lâng?

(BCL) 是誰欲為我起來攻擊歹人？是誰欲為我徛起來攻擊行罪惡的人？

17

(THR) Nā m̄-sī Iâ-hô-hoa pang-chān góa, chiū góa ê sîn-hûn khòai-khòai tiàm tī léng-chēng ê tiong-kan.

(BCL) 若呣是耶和華幫助我，就我的神魂快快踮佇冷靜的中間。

18

(THR) Góa kóng, Góa ê kha tio̍h-tak; Iâ-hô-hoa ah, hit-sî Lí ê chû-ài hû-chhî góa.

(BCL) 我講我的腳著觸，耶和華啊，彼時你的慈愛扶持我。

19

(THR) Góa ê sim chōe-chōe iu-būn khòa-lū, Lí ê an-ùi chiū hō͘ góa ê sim-sîn khòai-lo̍k.

(BCL) 我的心多多憂悶掛慮，你的安慰，就互我的心神快樂。

20

(THR) Kan-ok ê chō-ūi, ká-chià lu̍t-lē, kè-bô͘ chân-hāi, Kiám ōe kap Lí kau-thong mah?

(BCL) 奸惡的座位！假藉律例計謀殘害，豈會及你交通嗎？

21

(THR) In tāi-ke chū-chı̍p, kong-kek gī-lâng ê sìⁿ-miā; Chiong bô-chōe ê lâng tēng sí-chōe.

(BCL) 大家聚集攻擊義人的生命，將無罪的人定死罪。

22

(THR) Chóng-sī Iâ-hô-hoa pêng-sî chòe góa ê kôaiⁿ-tâi; Góa ê Siōng-tè chòe góa tô-siám ê chio̍h-pôaⁿ.

(BCL) 總是耶和華平時做我的高台；我的上帝做我逃閃的石磐。

23

(THR) I hō͘ in ê chōe-ok kui tī in ê sin-chiūⁿ; In tī kiâⁿ-pháiⁿ ê sî, I beh châu-bia̍t in; Iâ-hô-hoa lán ê Siōng-tè beh châu-bia̍t in.

(BCL) 伊互的罪惡歸佇的身上。佇行歹的時，伊欲剿滅；耶和華──咱的上帝欲剿滅。

Bible Color Mark

• 台語漢字羅馬本
• 巴克禮全羅