詩篇 第 90 章

1

(THR) Siōng-tè ê lâng Mô͘-se ê kî-tó.1) Chú ah, Lí ta̍k sè-tāi chòe góan khiā-khí ê só͘-chāi.

(BCL) 〔上帝的人摩西的祈禱。〕主啊，你逐世代做阮徛起的所在。

2

(THR) Chiah ê soaⁿ iáu-bē siⁿ-chhut, Tōe kap sè-kài Lí iáu-bē chō-chiâⁿ, Tùi éng-óan kàu éng-óan Lí sī Siōng-tè.

(BCL) 諸個山猶未生出，地及世界你猶未造成，對永遠到永遠，你是上帝。

3

(THR) Lí hō͘ lâng kui thó͘, Kóng, Lín sè-kan lâng, tio̍h o̍at-tò-tńg.

(BCL) 你互人歸土，講：恁世間人著越倒轉。

4

(THR) In-ūi chāi Lí khòaⁿ, chı̍t-chheng nî chhin-chhiūⁿ í-keng kè--khì ê chā-jı̍t; Koh chhin-chhiūⁿ mî-kan ê chı̍t-kiⁿ.

(BCL) 因為在你看，一千年親像已經過去的昨日，閣親像暝間的一更。

5

(THR) Lí chhin-chhiūⁿ ēng tōa-chúi kā in lâu--khì; in chhin-chhiūⁿ khùn chı̍t-chhíⁿ; Chá-khí-sî in chhin-chhiūⁿ hoat-siⁿ ê chháu.

(BCL) 你親像用大水給流去；親像睏一醒。早起時，親像發生的草，

6

(THR) Chá-khí-sî hoat-siⁿ bō͘-sēng; Ê-hng-sî siū-koah chiū ko͘-tâ.

(BCL) 早起時發生茂盛，下昏時收割就枯焦。

7

(THR) In-ūi góan tùi Lí ê siū-khì chiū siau-bia̍t, Koh góan tùi Lí ê hoat-sèng lâi kiaⁿ-hiâⁿ.

(BCL) 因為阮對你的受氣就消滅，閣阮對你的發性來驚惶。

8

(THR) Lí chiong góan ê chōe-ok pâi tī Lí ê bīn-chêng, Chiong góan ún-ba̍t ê pháiⁿ pâi tī Lí ê bīn ê kng-bêng-tiong.

(BCL) 你將阮的罪惡排佇你的面前，將阮隱密的歹排佇你的面的光明中。

9

(THR) Góan ê jı̍t-chí lóng keng-kè tī Lí ê tōa siū-khì; Góan ê nî-hè kè-liáu, chhin-chhiūⁿ thó͘ chı̍t ê khùi.

(BCL) 阮的日子攏經過佇你的大受氣；阮的年歲過了親像吐一個氣。

10

(THR) Góan it-seng ê nî-jı̍t sī chhit-cha̍p hè, Nā sī ióng-chòng thang kàu poeh-cha̍p hè, Chóng-sī kî-tiong só͘ khoa-kháu--ê, put-kò sī lô-khó͘ iu-chhiû; I kín-kín kè, góan chiū pe--khì.

(BCL) 阮一生的年日是七十歲，若是勇壯通到八十歲；總是其中所誇口的不過是勞苦憂愁，伊緊緊過，阮就飛去。

11

(THR) Chī-chūi chai Lí siū-khì ê kôan-sè, Ia̍h chiàu Lí eng-kai siū ê kèng-ùi, chai Lí ê siū-khì ah?

(BCL) 是誰知你受氣的權勢？亦照你應該受的敬畏知你的受氣啊？

12

(THR) Kiû Lí kà-sī góan, cháiⁿ-iūⁿ sǹg ka-kī ê jı̍t-chí; Hō͘ góan tit-tio̍h tì-hūi ê sim.

(BCL) 求你教示阮怎樣算家己的日子，互阮得著智慧的心。

13

(THR) Iâ-hô-hoa ah, beh kàu tī-sî nih? kiû Lí tò-tńg; Ūi-tio̍h Lí ê lô͘-po̍k lâi hôe-sim.

(BCL) 耶和華啊，欲到底時呢？求你倒轉，為著你的奴僕來回心。

14

(THR) Kiû Lí chá-khí-sî ēng Lí ê chû-ài hō͘ góan móa-chiok; Hō͘ góan chı̍t-sì-lâng hoaⁿ-hí khòai-lo̍k.

(BCL) 求你早起時用你的慈愛互阮滿足，互阮一世人歡喜快樂。

15

(THR) Kiû Lí chiàu Lí khó͘-chhó͘ góan ê jı̍t, Chiàu góan tú-tio̍h hōan-lān ê nî, hō͘ góan hoaⁿ-hí.

(BCL) 求你照你苦楚阮的日，照阮抵著患難的年，互阮歡喜。

16

(THR) Gōan Lí ê só͘-chòe tùi Lí ê lô͘-po̍k hián-hiān, Lí ê êng-kng tùi in ê kiáⁿ-sun hián-bêng.

(BCL) 願你的所做對你的奴僕顯現；你的榮光對的子孫顯明。

17

(THR) Gōan Chú góan ê Siōng-tè ê bí-biāu tiàm tī góan ê téng-bīn; Gōan Lí kian-kò͘ góan ê chhiú só͘ chòe ê kang, Góan ê chhiú só͘ chòe ê kang, gōan Lí kian-kò͘ i.

(BCL) 願主──阮的上帝的美妙踮佇阮的頂面。願你堅固阮的手所做的工；阮的手所做的工，願你堅固伊。

Bible Color Mark

• 台語漢字羅馬本
• 巴克禮全羅