詩篇 第 89 章

1

(THR) Í-su-la̍h lâng, Í-thàm, kà-sī ê si.1) Góa beh chhiùⁿ-koa o-ló Iâ-hô-hoa ê chû-ài kàu tī éng-óan. Beh ēng góa ê chhùi thôan Lí ê sìn-sı̍t kàu tāi-tāi.

(BCL) 〔以斯拉人以探教示的詩。〕我欲唱歌謳咾耶和華的慈愛，到佇永遠；欲用我的嘴傳你的信實到代代。

2

(THR) In-ūi góa bat kóng, Chû-ài beh siū kiàn-lı̍p kàu éng-óan; Lí beh chiong Lí ê sìn-sı̍t kian-kò͘ tī thiⁿ--nih.

(BCL) 因為我曾講：慈愛欲受建立到永遠；你欲將你的信實堅固佇天裡。

3

(THR) Góa kap Góa só͘ kéng ê lâng lı̍p-iok, Tùi Góa ê lô͘-po̍k Tāi-pı̍t chiù-chōa.

(BCL) 我及我所揀的人立約，對我的奴僕大衛咒誓：

4

(THR) Góa beh hō͘ lí ê hō͘-è kian-kò͘ kàu éng-óan, Koh hō͘ lí ê pó-chō kiàn-lı̍p kàu tāi-tāi. [Sè-la̍h

(BCL) 我欲互你的後裔，堅固到永遠；閣互你的寶座，建立到代代。（細拉）

5

(THR) Iâ-hô-hoa ah, chiah ê thiⁿ beh o-ló Lí ê kî-sū; Tī sèng--ê ê hōe-tiong, beh o-ló Lí ê sìn-sı̍t.

(BCL) 耶和華啊，諸個天欲謳咾你的奇事；佇聖者的會中，欲謳咾你的信實。

6

(THR) Tī khong-tiong chī-chūi ōe pí-tit Iâ-hô-hoa? Tōa kôan-lêng--ê ê chèng-kiáⁿ-tiong, chī-chūi ōe chhin-chhiūⁿ Iâ-hô-hoa?

(BCL) 佇空中是誰會比得耶和華？大權能者的眾子中，是誰會親像耶和華？

7

(THR) I tī sèng--ê ê gī-hōe tiong, sī tōa-tōa ū ui-giâm ê Siōng-tè; Pí it-chhè tī I sì-ûi ê, koh-khah thang kiaⁿ-ùi.

(BCL) 伊佇聖者的議會中，是大大有威嚴的上帝，比一切佇伊四圍的閣卡通驚畏。

8

(THR) Bān-kun ê Siōng-tè Iâ-hô-hoa ah, Toh-lo̍h chı̍t-ê tōa kôan-lêng--ê, chhin-chhiūⁿ Lí Iâ-hô-hoa? Lí ê sìn-sı̍t tī Lí ê sì-ûi.

(BCL) 萬軍的上帝──耶和華啊，叨落一個大權能者親像你耶和華？你的信實佇你的四圍。

9

(THR) Hái-chúi tiòng-kôaiⁿ, Lí kóan-hat--i; Hái-éng giâ--khí-lâi, Lí hō͘ i pîⁿ.

(BCL) 海水漲高你管轄伊；海湧夯起來，你互伊平。

10

(THR) Lí phah chhùi La̍h-hap-pek, chhin-chhiūⁿ í-keng thâi-sí ê lâng; Lí ēng ū khùi-la̍t ê chhiú phah-sòaⁿ Lí ê tùi-te̍k.

(BCL) 你拍碎拉哈伯，親像已經死的人；你用有氣力的手拍散你的對敵。

11

(THR) Thiⁿ sio̍k Lí, tōe ia̍h sio̍k Lí; Sè-kài kap kî-tiong só͘ chhiong-móa--ê, lóng sī Lí só͘ kiàn-lı̍p.

(BCL) 天屬你，地亦屬你；世界及其中所充滿的攏是你所建立。

12

(THR) Lâm-pak sī Lí só͘ chhòng-chō; Tha-po̍k kap Hek-bûn, in-ūi Lí ê miâ lâi hoaⁿ-hí.

(BCL) 南北是你所創造；他泊及黑門因為你的名來歡喜。

13

(THR) Lí ū tōa kôan-lêng ê chhiú, Lí ê chhiú ū la̍t, Lí ê chiàⁿ-chhiú kia̍h kôaiⁿ-kôaiⁿ.

(BCL) 你有大權能的手；你的手有力，你的正手抬高高。

14

(THR) Kong-pêng kap gī-lí sī Lí ê pó-chō ê tōe-ki; Chû-ài kap sêng-sı̍t kiâⁿ tī Lí ê bīn-chêng.

(BCL) 公平及義理是你的寶座的地基；慈愛及誠實行佇你的面前。

15

(THR) Ōe bat hoaⁿ-hí ê siaⁿ--ê, hit ê peh-sìⁿ ū hok-khì; Iâ-hô-hoa ah, in tī Lí ê bīn só͘ hoat-chhut ê kng teh kiâⁿ.

(BCL) 會識歡喜的聲者，彼個百姓有福氣！耶和華啊，佇你的面所發出的光行。

16

(THR) In jı̍t-jı̍t in-ūi Lí ê miâ lâi hoaⁿ-hí; In-ūi Lí ê kong-gī tit-tio̍h seng-kôaiⁿ.

(BCL) 日日因為你的名來歡喜，因為你的公義得著升高。

17

(THR) In-ūi Lí sī in khùi-la̍t ê êng-kng; Koh in-ūi Lí hoaⁿ-hí góan, góan ê kak beh tit-tio̍h kia̍h-kôaiⁿ.

(BCL) 因為你是氣力的榮光；閣因為你歡喜阮，阮的角欲得著抬高。

18

(THR) Góan ê tîn-pâi sio̍k tī Iâ-hô-hoa; Góan ê ông sio̍k tī Í-sek-lia̍t ê Sèng--ê.

(BCL) 阮的盾牌屬佇耶和華；阮的王屬佇以色列的聖者。

19

(THR) Tng-sî Lí tī īⁿ-siōng-tiong hoan-hù Lí sèng ê peh-sìⁿ, kóng, Góa ēng pang-chān ê la̍t, hē tī hit ê ū kôan-lêng--ê ê sin-chiūⁿ; Tùi peh-sìⁿ-tiong kéng--ê, Góa ko-seng--i.

(BCL) 當時，你佇異象中吩咐你聖的百姓，講：我用幫助的力下佇彼個有權能者的身上；對百姓中揀者我高升伊。

20

(THR) Góa chhē-tio̍h Góa ê lô͘-po̍k Tāi-pı̍t; Ēng Góa ê sèng-iû boah--i.

(BCL) 我尋著我的奴僕大衛，用我的聖油抹伊。

21

(THR) Góa ê chhiú beh siông-siông kap i tī-teh, Góa ê chhiú-kut ia̍h beh kian-kò͘--i.

(BCL) 我的手欲常常及伊佇；我的手骨亦欲堅固伊。

22

(THR) Tùi-te̍k bōe-ōe le̍k-sek i; Hiong-ok ê lâng bōe-ōe khó͘-chhó͘--i.

(BCL) 對敵會勒索伊；兇惡的人會苦楚伊。

23

(THR) Góa beh tī i ê bīn-chêng phah-chhùi i ê tùi-te̍k; Kong-kek hit ê òan-hūn i ê lâng.

(BCL) 我欲佇伊的面前拍碎伊的對敵，攻擊彼個怨恨伊的人。

24

(THR) Chóng-sī Góa ê sìn-sı̍t, kap Góa ê chû-ài, beh kap i tī-teh; In-ūi Góa ê miâ, i ê kak beh tit-tio̍h kia̍h-kôaiⁿ.

(BCL) 總是我的信實及我的慈愛欲及伊佇；因為我的名，伊的角欲得著抬高。

25

(THR) Góa beh hō͘ i ê chhiú chhun kàu hái; Chiàⁿ-chhiú chhun kàu chiah ê hô.

(BCL) 我欲互伊的手伸到海，正手伸到諸個河。

26

(THR) I beh chheng-ho͘ Góa kóng, Lí sī góa ê pē, Sī góa ê Siōng-tè, sī kiù góa ê chio̍h-pôaⁿ.

(BCL) 伊欲稱呼我講：你是我的父，是我的上帝，是救我的石磐。

27

(THR) Góa ia̍h beh siat-lı̍p i chòe tōa-kiáⁿ, Chòe sè-chiūⁿ tē-it kôaiⁿ ê kun-ông.

(BCL) 我亦欲設立伊做大子，做世上第一高的君王。

28

(THR) Góa beh ūi-tio̍h i pó-chûn Góa ê chû-ài kàu éng-óan; Góa kap i só͘ lı̍p ê iok, tek-khak bô piàn-ōaⁿ.

(BCL) 我欲為著伊保存我的慈愛，到永遠；我及伊所立的約的確無變換。

29

(THR) Góa ia̍h beh pó-chûn i ê hō͘-è kàu tāi-tāi; Hō͘ i ê pó-chō chhin-chhiūⁿ thiⁿ ê kú.

(BCL) 我亦欲保存伊的後裔到代代，互伊的寶座親像天的久。

30

(THR) Siat-sú i ê kiáⁿ-sun pàng-sak Góa ê lu̍t-hoat; Bô kiâⁿ Góa ê hoat-tō͘;

(BCL) 設使伊的子孫放拺我的律法，無行我的法度；

31

(THR) Pōe-biū Góa ê lu̍t-lē, Bô siú Góa ê kài-bēng;

(BCL) 悖謬我的律例，無守我的誡命，

32

(THR) Góa chiū beh ēng kóaiⁿ-á chek-ho̍at in ê kè-sit; Ēng piⁿ chek-ho̍at in ê chōe-ok.

(BCL) 我就欲用柺仔責罰的過失，用鞭責罰的罪惡。

33

(THR) Chóng-sī Góa tek-khak bô chiong góa ê chû-ài it-chīn tùi i siu-hôe; Ia̍h tek-khak bô hō͘ Góa ê sìn-sı̍t hòe-bô.

(BCL) 總是我的確無將我的慈愛一盡對伊收回，亦的確無互我的信實廢無。

34

(THR) Góa tek-khak bô sit Góa ê iok, Ia̍h bô kóe-ōaⁿ Góa ê chhùi só͘ kóng--ê.

(BCL) 我的確無失我的約，亦無改換我的嘴所講的。

35

(THR) Góa chı̍t-pái kí ka-kī ê sèng-kiat lâi chiù-chōa, Góa koat-tòan bô tùi Tāi-pı̍t kóng pe̍h-chha̍t;

(BCL) 我一擺指家己的聖潔來咒誓：我決斷無對大衛講白賊！

36

(THR) I ê hō͘-è beh thôan kàu éng-óan; I ê pó-chō tī Góa ê bīn-chêng, chhin-chhiūⁿ jı̍t ê kú-tn̂g;

(BCL) 伊的後裔欲傳到永遠；伊的寶座佇我的面前親像日的久長，

37

(THR) Ia̍h chhin-chhiūⁿ ge̍h ê éng-óan kiàn-lı̍p; Koh chhin-chhiūⁿ thiⁿ-téng khak-sı̍t ê kan-chèng. [Sè-la̍h

(BCL) 亦親像月的永遠建立，閣親像天頂確實的干證。（細拉）

38

(THR) Chóng-sī Lí ū siū-khì Lí ê siū-boah-iû--ê, Iàm-chiān khì-sak i.

(BCL) 總是你有受氣你的受抹油者，厭賤棄拺伊。

39

(THR) Lí í-keng iàm-ò͘ⁿ kap Lí ê lô͘-po̍k só͘ lı̍p ê iok, Chiong i ê bián-liû chau-that tī tōe--nih.

(BCL) 你已經厭惡及你的奴僕所立的約，將伊的冕旒蹧躂佇地裡。

40

(THR) Lí í-keng thiah i it-chhè ê lî-pa; Hō͘ i ê ōe-só͘ pìⁿ chòe pha-hng ê só͘-chāi.

(BCL) 你已經拆伊一切的籬笆，互伊的衛所變做拋荒的所在。

41

(THR) Kè-lō͘ lâng lóng chhiúⁿ-the̍h i; I chiâⁿ-chòe keh-piah kok só͘ lêng-jio̍k--ê.

(BCL) 過路人攏搶提伊；伊成做隔壁國所凌辱者。

42

(THR) Lí hō͘ i ê tùi-te̍k ê chiàⁿ-chhiú kia̍h-kôaiⁿ; Hō͘ i ê kiû-siû lóng hoaⁿ-hí.

(BCL) 你互伊的對敵的正手抬高；互伊的仇讎攏歡喜。

43

(THR) Lí hō͘ i ê to-kiàm tó-mî, Hō͘ i tī kau-chiàn ê sî khiā-bōe-tiâu.

(BCL) 你互伊的刀劍倒鋩，互伊佇交戰的時徛住，

44

(THR) Lí hō͘ i ê êng-hián bô--khì, Chiong i ê pó-chō chhia-tó tī tōe--nih.

(BCL) 你互伊的榮顯無去，將伊的寶座捙倒佇地裡。

45

(THR) Lí kiám-chió i chheng-liân ê jı̍t-chí; Koh hō͘ i móa-móa kiàn-siàu. [Sè-la̍h

(BCL) 你減少伊青年的日子，閣互伊滿滿見誚。（細拉）

46

(THR) Iâ-hô-hoa ah, Lí beh jōa-kú ka-kī khǹg-ba̍t, kàu éng-óan mah? Lí ê siū-khì chhin-chhiūⁿ hé to̍h, beh jōa-kú ah?

(BCL) 耶和華啊，你欲偌久？家己囥密到永遠嗎？你的受氣親像火欲偌久啊？

47

(THR) Kiû Lí kì-tit góa ê sî-kan, cháiⁿ-iūⁿ hiah té-chió; Lí chhòng-chō it-chhè ê sè-kan lâng, hō͘ in kàu hiah khang-hu ah!

(BCL) 求你記得我的時間怎樣許短少；你創造一切的世間人，互到許空虛啊！

48

(THR) Sím-mı̍h lâng ōe tn̂g-tn̂g o̍ah, bô kìⁿ-tio̍h sí, Ōe kiù i ê lêng-hûn thoat-lī im-kan ê kôan-pèng ah? [Sè-la̍h

(BCL) 甚麼人會長長活無見著死、會救伊的靈魂脫離陰間的權柄啊！（細拉）

49

(THR) Chú ah, Lí chêng pîn Lí ê sìn-sı̍t, tùi Tāi-pı̍t chiù-chōa--ê, Hiah ê chû-ài taⁿ tī toh-lo̍h?

(BCL) 主啊，你前憑你的信實對大衛咒誓者許個慈愛今佇叨落？

50

(THR) Chú ah, kiû Lí kì-liām Lí ê lô͘-po̍k só͘ siū ê lêng-jio̍k, Kì-liām góa cháiⁿ-iūⁿ chiong it-chhè kiông-sēng ê peh-sìⁿ ê lêng-jio̍k chûn tī góa ê sim-lāi;

(BCL) 主啊，求你記念你的奴僕所受的凌辱，記念我怎樣將一切強盛的百姓的凌辱存佇我的心內。

51

(THR) Iâ-hô-hoa ah, Lí ê tùi-te̍k ēng chit ê lêng-jio̍k, Chiū-sī lêng-jio̍k Lí siū boah-iû--ê ê chong-chek.

(BCL) 耶和華啊，你的對敵用此個凌辱，就是凌辱你受抹油者的　跡。

52

(THR) Tio̍h o-ló Iâ-hô-hoa kàu éng-óan. A-bēng, koh A-bēng.

(BCL) 著謳咾耶和華，到永遠。阿們！閣阿們！

Bible Color Mark

• 台語漢字羅馬本
• 巴克禮全羅