詩篇 第 80 章

1

(THR) A-sat ê si; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Í-sek-lia̍t ê bo̍k-chiá ah, chhōa Iok-sek chhin-chhiūⁿ iûⁿ-kûn--ê, kiû Lí àⁿ hī-khang thiaⁿ; Chē tī ki-lō͘-peng ê téng-bīn--ê, kiû Lí hoat-chhut Lí ê kng.

(BCL) 〔亞薩的詩，交互樂官。調用做干證的百合花。〕以色列的牧者啊，導約瑟親像羊群者，求你俯耳孔聽！坐佇兵的頂面者，求你發出你的光！

2

(THR) Tī Í-hoat-liân, Piān-ngá-bín, Má-ná-se ê bīn-chêng, tián-chhut Lí ê kôan-lêng, Lâi kiù góan.

(BCL) 佇以法蓮、便雅憫、瑪拿西的面前，展出你的權能，來救阮。

3

(THR) Siōng-tè ah, hō͘ góan tò-tńg; Hō͘ Lí ê bīn hoat-chhut kng, góan chiū tit-tio̍h kiù.

(BCL) 上帝啊，互阮倒轉，互你的面發出光，阮就得著救！

4

(THR) Bān-kun ê Siōng-tè Iâ-hô-hoa ah, Lí ǹg Lí ê peh-sìⁿ ê kî-tó hoat-chhut siū-khì, beh jōa-kú ah?

(BCL) 萬軍的上帝──耶和華啊，你向你的百姓的祈禱發出受氣，欲偌久啊？

5

(THR) Lí ēng ba̍k-sái chòe chia̍h-mı̍h, hō͘ in chia̍h; Koh niû chōe-chōe ba̍k-sái hō͘ in lim.

(BCL) 你用目屎做食物互食，閣量多多目屎互飲。

6

(THR) Lí hō͘ keh-piah-kok in-ūi góan lâi saⁿ-chiⁿ, Góan ê tùi-te̍k saⁿ-kap teh chhiò.

(BCL) 你互隔壁國因為阮來相爭；阮的對敵相及笑。

7

(THR) Bān-kun ê Siōng-tè ah, hō͘ góan tò-tńg, Hō͘ Lí ê bīn hoat-chhut kng, góan chiū tit-tio̍h kiù.

(BCL) 萬軍的上帝啊，互阮倒轉，互你的面發出光，阮就得著救！

8

(THR) Lí tùi Ai-kı̍p sóa chı̍t-châng phû-tô-chhiū, Kóaⁿ-chhut lia̍t-pang, lâi chai--i,

(BCL) 你對埃及徙一欉葡萄樹，趕出列邦，來栽伊。

9

(THR) Lí tī i ê thâu-chêng piàⁿ-khang thó͘-tōe; I ê kun tèng chhim, chiū siⁿ-thòaⁿ móa-tōe.

(BCL) 你佇伊的頭前傾空土地，伊的根釘深，就生湠滿地。

10

(THR) I ê iáⁿ jia-ba̍t chiah ê soaⁿ, I ê ki chhin-chhiūⁿ chin-hó ê peh-hiuⁿ-chhiū.

(BCL) 伊的影遮密諸個山，伊的枝親像真好的柏香樹。

11

(THR) Hoat-chhut i ê ki, chhun kàu tōa-hái, I ê tîn thòaⁿ kàu Tōa-hô.

(BCL) 發出伊的枝，伸到大海，伊的藤，湠到大河。

12

(THR) Lí siáⁿ-sū thiah-húi i ê lî-pa, Chhut-chāi it-chhè kè-lō͘ ê lâng bán--i?

(BCL) 你啥事拆毀伊的籬笆，出在一切過路的人挽伊？

13

(THR) Chhiū-nâ-lāi chhut-lâi ê soaⁿ-ti chau-that--i, Khòng-iá ê cháu-siù chia̍h--i.

(BCL) 樹林內出來的山豬蹧躂伊；曠野的走獸食伊。

14

(THR) Bān-kun ê Siōng-tè ah, kiû Lí tò-tńg; Tùi thiⁿ àⁿ-lo̍h khòaⁿ, chiàu-kò͘ chit châng phû-tô-chhiū,

(BCL) 萬軍的上帝啊，求你倒轉！對天俯落看，照顧此欉葡萄樹，

15

(THR) Pó-hō͘ Lí chiàⁿ-chhiú só͘ chai--ê, Kap Lí ūi ka-kī só͘ kian-kò͘ ê ki.

(BCL) 保護你正手所栽的，及你為家己所堅固的枝。

16

(THR) I í-keng siū hé sio, siū to chhò; Ūi-tio̍h Lí ê bīn ê siū-khì, in chiū bia̍t-bô.

(BCL) 伊已經受火燒，受刀剉；為著你的面的受氣，就滅無。

17

(THR) Gōan Lí ê chhiú hōaⁿ tī Lí chiàⁿ-pêng ê lâng, Chiū-sī Lí ūi ka-kī só͘ kian-kò͘ ê jîn-chú.

(BCL) 願你的手按佇你正旁的人，就是你為家己所堅固的人子。

18

(THR) Án-ni, góan chiū bô tò-thè lī-khui Lí; Kiû Lí hō͘ góan tit-tio̍h o̍ah, góan chiū beh kiû-kiò Lí ê miâ.

(BCL) 按呢，阮就無倒退離開你；求你互阮得著活，阮就欲求叫你的名。

19

(THR) Bān-kun ê Siōng-tè Iâ-hô-hoa ah, hō͘ góan tò-tńg; Hō͘ Lí ê bīn hoat-chhut kng, góan chiū tit-tio̍h kiù.

(BCL) 萬軍的上帝──耶和華啊，互阮倒轉，互你的面發出光，阮就得著救！

Bible Color Mark

• 台語漢字羅馬本
• 巴克禮全羅