詩篇 第 71 章

1

(THR) Iâ-hô-hoa ah, góa óa-khò Lí, Kiû Lí hō͘ góa éng-éng bô kiàn-siàu.

(BCL) 耶和華啊，我倚靠你；求你互我永永無見誚！

2

(THR) Chiàu Lí ê kong-gī chín-kiù góa, hō͘ góa thoat-lī; Àⁿ hī-khang thiaⁿ góa, lâi kiù góa.

(BCL) 照你的公義拯救我，互我脫離；俯耳孔聽我，來救我！

3

(THR) Kiû Lí chòe góa thang khiā-khí ê chio̍h-pôaⁿ, hō͘ góa siông-siông khì tiàm hia; Lí í-keng bēng-lēng beh kiù góa. In-ūi Lí sī góa ê soaⁿ-giâm, góa ê soaⁿ-chē.

(BCL) 求你做我通徛起的石磐，互我常常去踮遐；你已經命令欲救我，因為你是我的山巖，我的山寨。

4

(THR) Góa ê Siōng-tè ah, kiû Lí kiù góa thoat-lī pháiⁿ-lâng ê chhiú, Thoat-lī put-gī kap chân-jím ê lâng ê chhiú-thâu.

(BCL) 我的上帝啊，求你救我脫離歹人的手，脫離不義及殘忍的人的手頭。

5

(THR) In-ūi Chú Iâ-hô-hoa, Lí sī góa só͘ ǹg-bāng-ê; Tùi góa siàu-liân ê sî Lí sī góa só͘ óa-khò-ê.

(BCL) 因為主──耶和華，你是我所向望的；對我少年的時，你是我所倚靠的。

6

(THR) Góa tùi thai--nih hō͘ Lí hû-chhî, Hō͘ góa chhut lāu-bú ê pak-tó͘ ê, sī Lí; Góa beh siông-siông o-ló Lí.

(BCL) 我對胎裡互你扶持；互我出老母的腹肚的是你。我欲常常謳咾你！

7

(THR) Chōe-chōe lâng lia̍h góa chòe kî-kòai; Chóng-sī Lí sī góa kian-kò͘ tô-siám ê só͘-chāi.

(BCL) 多多人掠我做奇怪，總是你是我堅固逃閃的所在。

8

(THR) Góa móa-chhùi beh o-ló Lí, Thong-jı̍t beh êng-kng Lí.

(BCL) 我滿嘴欲謳咾你，通日欲榮光你。

9

(THR) Góa nî-lāu ê sî, kiû Lí m̄-thang pàng-sak góa; Góa khùi-la̍t soe-lám ê sî, kiû Lí m̄-thang lī-khui góa.

(BCL) 我年老的時，求你呣通放拺我！我氣力衰膦的時，求你呣通離開我。

10

(THR) In-ūi góa ê tùi-te̍k gī-lūn góa; Hiah-ê tng-tán beh hāi góa ê sìⁿ-miā--ê saⁿ-kap chham-siông,

(BCL) 因為我的對敵議論我；許個當等欲害我的生命者相及參詳，

11

(THR) Kóng, Siōng-tè í-keng pàng-sak i; Taⁿ tio̍h tui-kóaⁿ i, lia̍h i; in-ūi bô kiù i ê.

(BCL) 講：上帝已經放拺伊；今著追趕伊，掠伊！因為無救伊的。

12

(THR) Siōng-tè ah, kiû Lí m̄-thang lī-khui góa hn̄g-hn̄g; Góa ê Siōng-tè ah, kiû Lí kín-kín lâi pang-chān góa.

(BCL) 上帝啊，求你呣通離開我遠遠！我的上帝啊，求你緊緊來幫助我！

13

(THR) Gōan hiah-ê chòe góa sìⁿ-miā ê tùi-te̍k ê, siū kiàn-siàu bia̍t-bô; Gōan hiah ê kè-bô͘ hāi góa ê, siū lêng-jio̍k làu-khùi.

(BCL) 願許個做我生命的對敵的，受見誚滅無；願許個計謀害我的，受凌辱漏氣。

14

(THR) Chóng-sī góa beh siông-siông ǹg-bāng, Góa beh ná-kú ná o-ló Lí,

(BCL) 總是我欲常常向望，我欲愈久愈謳咾你。

15

(THR) Lí ê kong-gī, í-kı̍p Lí ê chín-kiù sǹg-bōe-liáu, Góa ê chhùi thong-jı̍t beh kóng-khí.

(BCL) 你的公義以及你的拯救算了，我的嘴通日欲講起。

16

(THR) Góa beh lâi kóng Chú Iâ-hô-hoa tōa kôan-lêng ê sū; Góa toaⁿ-toaⁿ beh kóng-khí Lí ê gī.

(BCL) 我欲來講主──耶和華大權能的事；我單單欲講起你的義。

17

(THR) Siōng-tè ah, tùi góa siàu-liân ê sî Lí ū kà-sī góa; Kàu hiān-kim góa bat pò-iông Lí kî-biāu ê só͘-chòe.

(BCL) 上帝啊，對我少年的時，你有教示我；到現今，我曾報揚你奇妙的所做。

18

(THR) Siōng-tè ah, góa kàu nî-lāu; thâu-mn̂g-pe̍h ê sî, kiû Lí m̄-thang pàng-sak góa; Thèng-hāu góa chiong Lí ê khùi-la̍t chí-sī ē-tāi, Chiong Lí ê tōa kôan-lêng chí-sī it-chhè chiong-lâi ê lâng.

(BCL) 上帝啊，我到年老頭毛白的時，求你呣通放拺我！聽候我將你的氣力指示下代，將你的大權能指示一切將來的人。

19

(THR) Siōng-tè ah, Lí ê gī chin kôaiⁿ; Siōng-tè ah, Lí bat kiâⁿ tōa ê sū; Chī-chūi ōe chhin-chhiūⁿ Lí?

(BCL) 上帝啊，你的義真高；上帝啊，你曾行大的事，是誰會親像你！

20

(THR) Lí sī hō͘ góan le̍k-kè chōe-chōe tōa hōan-lān ê; Lí beh hō͘ góan koh-chài o̍ah; Iā beh kiù góan tùi tōe ê chhim-ian khí-lâi.

(BCL) 你是互阮歷過多多大患難的，你欲互阮閣再活，也欲救阮對地的深淵起來。

21

(THR) Kiû Lí hō͘ góa ná kôaiⁿ-tōa, Koh tò-tńg an-ùi góa.

(BCL) 求你互我愈高大，閣倒轉安慰我。

22

(THR) Góa ê Siōng-tè ah, góa beh tôaⁿ-sek o-ló Lí, O-ló Lí ê chin-sı̍t; Í-sek-lia̍t ê Sèng-ê ah, Góa beh tôaⁿ-khîm o-ló Lí.

(BCL) 我的上帝啊，我欲彈瑟謳咾你，謳咾你的真實！以色列的聖者啊，我欲彈琴謳咾你！

23

(THR) Góa chhiùⁿ-koa o-ló Lí ê sî, Góa ê chhùi-tûn, í-kı̍p Lí só͘ kiù-sio̍k góa ê lêng-hûn, beh hoaⁿ-hí chhut-siaⁿ.

(BCL) 我唱歌謳咾你的時，我的嘴唇以及你所救贖我的靈魂欲歡喜出聲；

24

(THR) Koh góa ê chı̍h kui-jı̍t beh káng-lūn Lí ê gī, In-ūi hiah ê kè-bô͘ hāi góa ê lâng í-keng kiàn-siàu siū lêng-jio̍k.

(BCL) 閣我的舌歸日欲講論你的義，因為許個計謀害我的人已經見誚受凌辱。

Bible Color Mark

• 台語漢字羅馬本
• 巴克禮全羅