詩篇 第 61 章

1

(THR) Tāi-pı̍t ê si, kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí thiaⁿ góa ê kiû-kiò; Àⁿ-lo̍h thiaⁿ góa ê kî-tó.

(BCL) 〔大衛的詩，交互樂官。用絲弦的樂器。〕上帝啊，求你聽我的求叫，俯落聽我祈禱！

2

(THR) Góa ê sim sit-chì ê sî, chiū beh tùi tōe-ke̍k kiû-kiò Lí; Kiû Lí chhōa góa kàu hit-ê pí góa khah-kôaiⁿ ê chio̍h-pôaⁿ.

(BCL) 我的心失志的時，就欲對地極求叫你。求你導我到彼個比我卡高的石磐！

3

(THR) In-ūi Lí bat chòe góa tô-siám ê só͘-chāi. Chòe góa kian-kò͘ ê tâi, lâi thoat-lī tùi-te̍k.

(BCL) 因為你曾做我逃閃的所在，做我堅固的台，來脫離對敵。

4

(THR) Góa beh éng-óan tòa tī Lí ê pò͘-pîⁿ; Góa beh bih tī Lí sı̍t-ē ún-ba̍t ê só͘-chāi. [Sè-la̍h

(BCL) 我欲永遠住佇你的布棚！我欲匿佇你翅下隱密的所在！（細拉）

5

(THR) Siōng-tè ah, góa só͘ hē ê gōan, Lí ū thiaⁿ-kìⁿ; Lí ū chiong sán-gia̍p siúⁿ-sù kèng-ùi Lí ê miâ ê lâng.

(BCL) 上帝啊，我所下的願你有聽見；你有將產業賞賜敬畏你的名的人。

6

(THR) Lí beh ke-thiⁿ ông ê hè-siū; I ê nî-hè beh kàu tāi-tāi.

(BCL) 你欲加添王的歲壽；伊的年歲欲到代代。

7

(THR) I beh éng-óan chē-ūi tī Siōng-tè ê bīn-chêng; Gōan Lí pī-pān chû-ài kap sêng-sı̍t lâi pó-hō͘ i.

(BCL) 伊欲永遠坐位佇上帝的面前；願你備辦慈愛及誠實來保護伊！

8

(THR) Án-ni góa beh chhiùⁿ-koa o-ló Lí ê miâ, kàu éng-óan; Thang jı̍t-jı̍t siā góa ê gōan.

(BCL) 按呢，我欲唱歌謳咾你的名，到永遠，通日日謝我的願。

Bible Color Mark

• 台語漢字羅馬本
• 巴克禮全羅