詩篇 第 6 章

1

(THR) Tāi-pı̍t ê si, kau hō͘ Ga̍k-koaⁿ; ēng si-hiân ê ga̍k-khì; tiāu, ēng tē poeh.1) Iâ-hô-hoa ah, m̄-thang tī Lí ê siū-khì-tiong chek-pī góa, Ia̍h m̄-thang tī Lí tōa siū-khì-tiong khiàn-chek góa.

(BCL) 〔大衛的詩，交互樂官。用絲弦的樂器，調用第八。〕耶和華啊，呣通佇你的受氣中責備我，亦呣通佇你大受氣中譴責我！

2

(THR) Iâ-hô-hoa ah, kiû Lí khó-lîn góa, in-ūi góa soe-lám; Iâ-hô-hoa ah, kiû Lí i-tī góa, in-ūi góa ê kut-thâu ngia̍uh-ngia̍uh-chhoah.

(BCL) 耶和華啊，求你可憐我，因為我衰膦。耶和華啊，求你醫治我，因為我的骨頭愕愕惙。

3

(THR) Góa ê sim tōa-tōa kiaⁿ-hiâⁿ; Iâ-hô-hoa ah, Lí beh kàu tī-sî chiah kiù góa?

(BCL) 我的心大大驚惶。耶和華啊，你欲到底時才救我？

4

(THR) Iâ-hô-hoa ah, kiû Lí o̍at-tò-tńg kiù góa ê sìⁿ-miā; Ūi-tio̍h Lí ê chû-ài lâi kiù góa.

(BCL) 耶和華啊，求你越倒轉救我的生命！為著你的慈愛來救我。

5

(THR) In-ūi sí-bô ê tiong-kan, bô kì-liām Lí; Im-hú ê tiong-kan, chī-chūi kám-siā Lí?

(BCL) 因為，死無的中間無記念你，陰府的中間是誰感謝你？

6

(THR) Góa in-ūi haiⁿ-haiⁿ-chhan lâi ià-siān; Góa ta̍k-mî lâu ba̍k-sái, im góa ê bîn-chhn̂g, Sip-thàu góa ê jio̍k-á.

(BCL) 我因為哼哼孱來厭倦；我逐暝流目屎淹我的眠床，濕透我的褥仔。

7

(THR) Góa in-ūi iu-būn, ba̍k-chiu phah-pháiⁿ; Koh in-ūi góa it-chhè ê tùi-te̍k, lâi ba̍k-chiu hoe.

(BCL) 我因為憂悶目睭拍歹，閣因為我一切的對敵來目睭花。

8

(THR) Lín it-chhè chòe pháiⁿ ê lâng, tio̍h lī-khui góa; In-ūi Iâ-hô-hoa thiaⁿ-kìⁿ góa thî-khàu ê siaⁿ.

(BCL) 恁一切做歹的人，著離開我！因為耶和華聽見我啼哭的聲。

9

(THR) Iâ-hô-hoa ū thiaⁿ góa ê khún-kiû; Iâ-hô-hoa beh chiap-la̍p góa ê kî-tó.

(BCL) 耶和華有聽我的懇求；耶和華欲接納我的祈禱。

10

(THR) Góa ê tùi-te̍k lóng beh kiàn-siàu, tōa-tōa kiaⁿ-hiâⁿ; In beh thè tò-tńg, hut-jiân kiàn-siàu.

(BCL) 我的對敵攏欲見誚，大大驚惶；欲退倒轉，忽然見誚。

Bible Color Mark

• 台語漢字羅馬本
• 巴克禮全羅