詩篇 第 56 章

1

(THR) Hui-lī-sū lâng tī Ka-te̍k lia̍h-tio̍h Tāi-pı̍t, hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "hn̄g-hn̄g bô siaⁿ ê kap"1) Siōng-tè ah, kiû Lí khó-lîn góa, in-ūi lâng beh thun-chia̍h góa; Thong-jı̍t kong-kek, ap-chè góa.

(BCL) 〔非利士人佇迦特掠著大衛。彼時，伊做此個金的詩，交互樂官。調是用「遠遠無聲的鴿」。〕上帝啊，求你可憐我，因為人欲吞食我，通日攻擊壓制我。

2

(THR) Góa ê tùi-te̍k thong-jı̍t beh thun-chia̍h góa, In-ūi khí kiau-ngō͘ kong-kek góa ê lâng chin chōe.

(BCL) 我的對敵通日欲吞食我，因為起驕傲攻擊我的人真多。

3

(THR) Góa tī kiaⁿ-hiâⁿ ê sî, Góa beh óa-khò Lí.

(BCL) 我佇驚惶的時我欲倚靠你。

4

(THR) Góa khò Siōng-tè, góa beh o-ló I ê ōe; Góa í-keng óa-khò Siōng-tè, góa chiū bô kiaⁿ. Sio̍k tī hiat-khì--ê beh siáⁿ hoat-tit góa ta-ôa?

(BCL) 我靠上帝，我欲謳咾伊的話；我已經倚靠上帝，我就無驚。屬佇血氣者欲啥法得我奈何？

5

(THR) In thong-jı̍t kóe-chho̍ah góa ê ōe; In tùi góa só͘-siūⁿ--ê, lóng sī beh hāi góa.

(BCL) 通日改斜我的話；對我所想的攏是欲害我。

6

(THR) In chū-chı̍p, bâi-ho̍k, teh siòng góa ê kha-pō͘, Chhin-chhiūⁿ tng-tán beh hāi góa ê sìⁿ-miā.

(BCL) 聚集，埋伏相我的腳步，親像當等欲害我的生命。

7

(THR) In chòe-pháiⁿ kiám ōe tô-thoat mah? Siōng-tè ah, kiû Lí tī siū-khì-tiong, hō͘ chèng peh-sìⁿ tūi-lo̍h.

(BCL) 做歹豈會逃脫嗎？上帝啊，求你佇受氣中互眾百姓墮落！

8

(THR) Góa ê liû-lo̍k, Lí lóng kì-siàu; Kiû Lí chiong góa ê ba̍k-sái siu tī Lí ê phê-lông; Che kiám bô lóng kì tī Lí ê chheh mah?

(BCL) 我的流落，你攏記數；求你將我的目屎收佇你的皮囊。這豈無攏記佇你的冊嗎？

9

(THR) Góa kiû-kiò ê jı̍t, góa ê tùi-te̍k lóng beh o̍at-tńg-sin thè--khì; Siōng-tè ūi góa, che sī góa só͘ chai.

(BCL) 我求叫的日，我的對敵攏欲越轉身退去。上帝為我，這是我所知。

10

(THR) Góa khò Siōng-tè, góa beh o-ló I ê ōe; Góa khò Iâ-hô-hoa, góa beh o-ló I ê ōe.

(BCL) 我靠上帝，我欲謳咾伊的話；我靠耶和華，我欲謳咾伊的話。

11

(THR) Góa í-keng óa-khò Siōng-tè, góa chiū bô kiaⁿ; Lâng beh siáⁿ hoat-tit góa ta-ôa?

(BCL) 我已經倚靠上帝，我就無驚。人欲啥法得我奈何！

12

(THR) Siōng-tè ah, góa tùi Lí só͘ hē ê gōan tī góa ê sin-chiūⁿ; Góa beh ēng siā-un ê chè hiàn hō͘ Lí.

(BCL) 上帝啊，我對你所下的願佇我的身上；我欲用謝恩的祭獻互你。

13

(THR) In-ūi Lí kiù góa ê o̍ah-miā thoat-lī sí-bô; Lí kiám-m̄-sī pó-hō͘ góa ê kha bô po̍ah-tó mah? Hō͘ góa tī Siōng-tè ê bīn-chêng, kiâⁿ tī o̍ah-miā ê kng tiong mah?

(BCL) 因為你救我的活命脫離死無。你豈呣是保護我的腳無跋倒嗎，互我佇上帝的面前，行佇活命的光中嗎？

Bible Color Mark

• 台語漢字羅馬本
• 巴克禮全羅