詩篇 第 51 章

1

(THR) Tāi-pı̍t kap Po̍at-sī-pa tâng-pâng í-āu, sian-ti Ná-tan lâi kìⁿ i, i chòe chit ê si; kau hō͘ Ga̍k-koaⁿ.1) Siōng-tè ah, chiàu Lí ê chû-ài lîn-bín góa; Chiàu Lí hong-sēng ê chû-pi chhat-siau góa ê kè-sit;

(BCL) 〔大衛及拔示巴同房以後，先知拿單來見伊；伊做此個詩，交互樂官。〕上帝啊，照你的慈愛憐憫我！照你豐盛的慈悲擦消我的過失！

2

(THR) Chiong góa ê chōe-ok it-chīn sóe-tû, Ia̍h sóe-chheng góa, kàu bô chōe.

(BCL) 將我的罪惡一盡洗除，亦洗清我到無罪！

3

(THR) In-ūi góa ka-kī chai góa ê kè-sit; Góa ê chōe siông-siông tī góa ê bīn-chêng.

(BCL) 因為，我家己知我的過失；我的罪常常佇我的面前。

4

(THR) Góa só͘ hōan-tio̍h--ê, chiū-sī tek-chōe Lí nā-tiāⁿ, Tī Lí ê ba̍k-chiu-chêng kiâⁿ chit-hō pháiⁿ; Tì-kàu Lí kóng-ōe ê sî, hián-bêng chòe-gī; Phòaⁿ-tòan ê sî, hián-bêng kong-tō.

(BCL) 我所犯著的，就是得罪你若定；佇你的目睭前行此號歹，致到你講話的時顯明做義，判斷的時顯明公道。

5

(THR) Góa sī tī chōe-ok-tiong siⁿ--ê, Tī chōe ê tiong-kan, góa ê lāu-bú hôai-īn góa.

(BCL) 我是佇罪惡中生者，佇罪的中間我的老母懷孕我。

6

(THR) Lí só͘ ài--ê sī sim-lāi sêng-sı̍t; Tī góa ê pak-lāi, Lí beh hō͘ góa tit-tio̍h tì-hūi.

(BCL) 你所愛的是心內誠實；佇我的腹內，你欲互我得著智慧。

7

(THR) Kiû Lí ēng giû-chhek-chháu sóe góa, góa chiū chheng-khì; Kiû Lí sóe góa, góa chiū pí seh khah-pe̍h.

(BCL) 求你用牛膝草洗我，我就清氣；求你洗我，我就比雪卡白。

8

(THR) Kiû Lí hō͘ góa tit-tio̍h thiaⁿ-kìⁿ hoaⁿ-hí khòai-lo̍k ê siaⁿ; Hō͘ Lí só͘ at-chı̍h ê kut thang hoaⁿ-hí.

(BCL) 求你互我得著聽見歡喜快樂的聲，互你所遏折的骨通歡喜。

9

(THR) Kiû Lí ng Lí ê bīn, bô khòaⁿ góa ê chōe, Chhat-siau góa it-chhè ê chōe-ok.

(BCL) 求你掩你的面無看我的罪，擦消我一切的罪惡。

10

(THR) Siōng-tè ah, kiû Lí kā góa chhòng-chō chheng-khì ê sim, Hō͘ góa ê lāi-bīn ū ōaⁿ-sin chèng-tı̍t ê sîn.

(BCL) 上帝啊，求你給我創造清氣的心，互我的內面有換新正直的神。

11

(THR) M̄-thang kóaⁿ góa, hō͘ góa lī-khui Lí ê bīn; M̄-thang tùi góa siu-hôe Lí sèng ê sîn.

(BCL) 呣通趕我，互我離開你的面；呣通對我收回你聖的神。

12

(THR) Kiû Lí hō͘ góa iû-gôan tit-tio̍h Lí kiù-un ê khòai-lo̍k; Siúⁿ-sù góa ū chū-iû ê sîn, lâi hû-chhî góa.

(BCL) 求你互我猶原得著你救恩的快樂，賞賜我有自由的神來扶持我，

13

(THR) Góa chiū chiong Lí ê tō-lō͘ chí-sī ū kè-sit ê lâng; Ū chōe ê lâng chiū beh kui-sūn Lí.

(BCL) 我就將你的道路指示有過失的人，有罪的人就欲歸順你。

14

(THR) Siōng-tè ah, Lí sī kiù góa ê Siōng-tè, Kiû Lí kiù góa thoat-lī thâi-lâng ê chōe; Góa ê chı̍h beh tōa-siaⁿ gîm-si o-ló Lí ê gī.

(BCL) 上帝啊，你是救我的上帝；求你救我脫離人的罪！我的舌欲大聲吟詩謳咾你的義。

15

(THR) Chú ah, kiû Lí khui góa ê chhùi-tûn; Góa ê chhùi chiū beh pò-iông Lí ê hó miâ-siaⁿ.

(BCL) 主啊，求你開我的嘴唇，我的嘴就欲報揚你的好名聲！

16

(THR) In-ūi Lí bô ài chè-mı̍h; nā ài, góa chiū beh hiàn; Sio-chè Lí ia̍h bô hoaⁿ-hí.

(BCL) 因為你無愛祭物，若愛，我就欲獻；燒祭，你亦無歡喜。

17

(THR) Siōng-tè só͘ ài ê chè, chiū-sī iu-siong ê sîn; Siōng-tè ah, iu-siong thòng-hóe ê sim, Lí bô beh khòaⁿ-khin i.

(BCL) 上帝所愛的祭就是憂傷的神；上帝啊，憂傷痛悔的心，你無欲看輕伊。

18

(THR) Kiû Lí chiàu Lí ê hó ì-sù, hó khóan-thāi Sek-an; Khí-chō Iâ-lō͘-sat-léng ê siâⁿ-chhiûⁿ.

(BCL) 求你照你的好意思好款待錫安，起造耶路撒冷的城牆。

19

(THR) Hit-sî Lí beh hoaⁿ-hí gī ê chè, kap sio-chè, í-kı̍p ka-nn̂g-chiah cheng-siⁿ ê sio-chè; Hit-sî lâng beh chiong kang ê gû hiàn tī Lí ê tôaⁿ.

(BCL) 彼時，你欲歡喜義的祭及燒祭以及加隆隻精牲的燒祭；彼時，人欲將公的牛獻佇你的壇。

Bible Color Mark

• 台語漢字羅馬本
• 巴克禮全羅