詩篇 第 50 章

1

(THR) A-sat ê si.1) Chôan-lêng ê Siōng-tè Iâ-hô-hoa ū kóng-chhut ōe, lâi tiàu thiⁿ-ē; Tùi jı̍t-chhut kàu jı̍t-lo̍h ê só͘-chāi.

(BCL) 〔亞薩的詩。〕全能的上帝──耶和華有講出話來召天下，對日出到日落的所在。

2

(THR) Tùi chiâu-chn̂g súi ê Sek-an, Siōng-tè ū hoat-chhut kng.

(BCL) 對齊全娞的錫安，上帝有發出光。

3

(THR) Góan ê Siōng-tè beh lâi, koat-tòan bô chēng-chēng; Ū hé tī I ê bīn-chêng teh sio, Ū hong tī I ê sì-ûi chin thàu.

(BCL) 阮的上帝欲來，決斷無靜靜。有火佇伊的面前燒；有風佇伊的四圍真透。

4

(THR) I beh kiò téng-bīn ê thiⁿ kap tōe; Ūi-tio̍h beh sím-phòaⁿ I ê peh-sìⁿ;

(BCL) 伊欲叫頂面的天及地；為著欲審判伊的百姓，

5

(THR) Kóng, Tio̍h chio-chı̍p Góa sèng ê peh-sìⁿ lâi Góa chia, Chiū-sī hiah-ê ēng chè-sū kap Góa lı̍p-iok ê lâng.

(BCL) 講：著招集我聖的百姓來我遮，就是許個用祭祀及我立約的人。

6

(THR) Chiah ê thiⁿ beh hián-bêng I ê kong-gī; In-ūi Siōng-tè pún-sin sī chòe sím-phòaⁿ--ê. [Sè-la̍h

(BCL) 諸個天欲顯明伊的公義，因為上帝本身是做審判者。（細拉）

7

(THR) Góa ê peh-sìⁿ ah, lín tio̍h thiaⁿ, Góa beh kóng; Í-sek-lia̍t ah, Góa beh kéng-kài lí; Góa sī Siōng-tè, lí ê Siōng-tè.

(BCL) 我的百姓啊，恁著聽，我欲講！以色列啊，我欲警戒你；我是上帝，你的上帝！

8

(THR) Góa bô in-ūi lí ê chè-sū chek-pī lí; Lí ê sio-chè siông-siông tī Góa ê bīn-chêng.

(BCL) 我無因為你的祭祀責備你；你的燒祭常常佇我的面前。

9

(THR) Góa bô tùi lí ê chhù chhú kang ê gû, Ia̍h bô tùi lí ê tiâu chhú kang ê soaⁿ-iûⁿ.

(BCL) 我無對你的厝取公的牛，亦無對你的　取公的山羊。

10

(THR) In-ūi chhiū-nâ-lāi ê pah-siù, Chheng-soaⁿ ê cheng-siⁿ, lóng sī Góa ê.

(BCL) 因為，樹林內的百獸，千山的精牲攏是我的。

11

(THR) Soaⁿ-tiong ê pe-chiáu, Góa lóng chai; Khòng-iá ê cháu-siù ia̍h lóng sio̍k tī Góa.

(BCL) 山中的飛鳥，我攏知；曠野的走獸亦攏屬佇我。

12

(THR) Góa nā iau, bô beh kā lí kóng; In-ūi sè-kài kap kî-tiong só͘ chhiong-móa ê, lóng sī Góa ê.

(BCL) 我若枵，無欲給你講，因為世界及其中所充滿的攏是我的。

13

(THR) Góa kiám beh chia̍h gû-káng ê bah, Á-sī lim soaⁿ-iûⁿ-káng ê huih mah?

(BCL) 我豈欲食牛的肉？抑是飲山羊的血嗎？

14

(THR) Lí tio̍h ēng kám-siā chòe chè, hiàn hō͘ Siōng-tè; Koh tio̍h tùi Chì-kôaiⁿ--ê, siā lí ê gōan;

(BCL) 你著用感謝做祭獻互上帝，閣著對至高者謝你的願，

15

(THR) Tī hōan-lān ê jı̍t tio̍h kiû-kiò Góa; Góa beh kiù lí, lí ia̍h beh êng-kng Góa.

(BCL) 佇患難的日著求叫我；我欲救你，你亦欲榮光我。

16

(THR) Nā-sī Siōng-tè tùi pháiⁿ-lâng kóng, Lí thái-thó káⁿ thôan Góa ê lu̍t-lē, Chhùi kóng-khí Góa ê iok ah?

(BCL) 若是上帝對歹人講：你豈可敢傳我的律例，嘴講起我的約啊？

17

(THR) Kî-sı̍t lí iàm-chiān kà-sī, Chiong Góa ê ōe hiat tī lí ê ka-chiah-āu.

(BCL) 其實你厭賤教示，將我的話佇你的尻脊後。

18

(THR) Lí khòaⁿ-kìⁿ chha̍t, chiū kap i tâng-sim; Koh kap kiâⁿ kan-îm ê lâng saⁿ-kap ū hūn.

(BCL) 你看見賊就及伊同心，閣及行姦淫的人相及有份。

19

(THR) Lí hō͘ lí ê chhùi siông-siông kóng pháiⁿ-ōe, Lí ê chı̍h chō-chok kan-chà.

(BCL) 你互你的嘴常常講歹話；你的舌造作奸詐。

20

(THR) Lí chē-teh húi-pòng lí ê hiaⁿ-tī; Bû-lōa lí ê tâng-pau.

(BCL) 你坐誹謗你的兄弟，誣賴你的同胞。

21

(THR) Lí kiâⁿ chiah ê sū, Góa chēng-chēng bô kóng; Lí phah-sǹg Góa tú-tú kap lí chı̍t-iūⁿ. Kî-sı̍t Góa beh chek-pī lí; chiong chiah ê sū pâi tī lí ê ba̍k-chiu-chêng.

(BCL) 你行諸個事，我靜靜無講，你拍算我抵抵及你一樣；其實我欲責備你，將諸個事排佇你的目睭前。

22

(THR) Lín bōe-kì-tit Siōng-tè ê lâng, tio̍h siūⁿ chit ê sū, Bián-tì Góa chiong lín thiah-chhùi, bô lâng chín-kiù.

(BCL) 恁記得上帝的人，著想此個事，免致我將恁拆碎，無人拯救。

23

(THR) Kìⁿ-nā ēng kám-siā hiàn chòe chè-ê, chiū-sī êng-kng Góa; Kín-sīn kiâⁿ ê lâng, Góa beh hō͘ i khòaⁿ-kìⁿ Siōng-tè ê kiù-un.

(BCL) 見若用感謝獻做祭的就是榮光我；謹慎行的人，我欲互伊看見上帝的救恩。

Bible Color Mark

• 台語漢字羅馬本
• 巴克禮全羅