詩篇 第 42 章

1

(THR) Khó-la̍h hō͘-è kà-sī ê si, kau hō͘ Ga̍k-koaⁿ.1) Siōng-tè ah, góa ê sim chhiat-chhiat him-bō͘ Lí, Chhin-chhiūⁿ lo̍k chhiat-chhiat him-bō͘ khoe-chúi.

(BCL) 〔可拉後裔教示的詩；交互樂官。〕上帝啊，我的心切切欣慕你，親像鹿切切欣慕溪水。

2

(THR) Góa ê sim chhùi-ta, him-bō͘ Siōng-tè, chiū-sī o̍ah ê Siōng-tè; Góa siáⁿ-sî ōe kàu Siōng-tè bīn-chêng, lâi kìⁿ I ah?

(BCL) 我的心嘴乾欣慕上帝，就是活的上帝；我啥時會到上帝面前來見伊啊？

3

(THR) Góa mî-jı̍t ēng góa ê ba̍k-sái chún pn̄g chia̍h, In tùi góa kóng bô soah, Lí ê Siōng-tè tī toh-lo̍h?

(BCL) 我暝日用我的目屎準飯食；對我講無息：你的上帝佇叨落？

4

(THR) Góa chá-chêng kap chèng-lâng chòe-tīn khì, chhōa in kàu Siōng-tè ê chhù; Ēng hoaⁿ-hí o-ló ê siaⁿ, tāi-ke siú choeh; Góa tui-liām chiah ê sū, góa ê sim ke̍k-kî pi-siong.

(BCL) 我早前及眾人做陣去，導到上帝的厝，用歡喜謳咾的聲，大家守節。我追念諸個事，我的心極其悲傷。

5

(THR) Góa ê sim ah, lí siáⁿ-sū ut-chut? Siáⁿ-sū tī góa ê lāi-bīn tio̍h-kip? Lí tio̍h ǹg-bāng Siōng-tè, In-ūi I ê bīn ǹg góa, lâi chín-kiù góa; só͘-í góa iáu-kú beh o-ló I.

(BCL) 我的心啊，你啥事鬱悴？啥事佇我的內面著急？你著向望上帝，因為伊的面向我來拯救我；所以我猶久欲謳咾伊。

6

(THR) Góa ê Siōng-tè ah, góa ê sim tī góa ê lāi-bīn ut-chut; Só͘-í góa tùi Iok-tàn ê tōe kap Hek-bûn, Ia̍h tùi Bí-sat ê soaⁿ kì-liām Lí.

(BCL) 我的上帝啊，我的心佇我的內面鬱悴，所以我對約但的地及黑門，亦對米薩的山記念你。

7

(THR) Lí ê pho̍k-pò͘ chhut-siaⁿ, chiū chhim-ian kap chhim-ian saⁿ kiò ìn; Lí ê pho-lōng, Lí ê tōa-éng, lóng im-ba̍t góa.

(BCL) 你的瀑布出聲，就深淵及深淵相叫應；你的波浪你的大湧攏淹密我。

8

(THR) Chóng-sī Iâ-hô-hoa jı̍t--sî beh si-chhut I ê chû-ài; Mî--sî I hō͘ góa chhiùⁿ-koa, Lâi kiû siúⁿ-sù góa o̍ah-miā ê Siōng-tè.

(BCL) 總是耶和華日時欲施出伊的慈愛；暝時，伊互我唱歌來求賞賜我活命的上帝。

9

(THR) Góa beh tùi Siōng-tè, góa ê chio̍h-pôaⁿ, kóng, Lí siáⁿ-sū bōe-kì-tit góa? Góa siáⁿ-sū in-ūi tùi-te̍k ê ap-pek, iu-būn lâi kiâⁿ ah?

(BCL) 我欲對上帝──我的石磐講：你啥事記得我？我啥事因為對敵的壓迫憂悶來行啊？

10

(THR) Góa ê tùi-te̍k ki-chhì góa, chhin-chhiūⁿ phah-chhùi góa ê kut-thâu; In tùi góa kóng bô soah, Lí ê Siōng-tè tī toh-lo̍h?

(BCL) 我的對敵譏刺我，親像拍碎我的骨頭，對我講無息：你的上帝佇叨落？

11

(THR) Góa ê sim ah, lí siáⁿ-sū ut-chut? Siáⁿ-sū tī góa ê lāi-bīn tio̍h-kip? Lí tio̍h ǹg-bāng Siōng-tè; in-ūi góa iáu-kú beh o-ló I; I sī góa ê bīn ê êng-kng, ia̍h sī góa ê Siōng-tè.

(BCL) 我的心啊，你啥事鬱悴？啥事佇我的內面著急？你著向望上帝，因為我猶久欲謳咾伊。伊是我的面的榮光，亦是我的上帝。

Bible Color Mark

• 台語漢字羅馬本
• 巴克禮全羅