詩篇 第 30 章

1

(THR) Chit ê si sī hiàn kiong-tiān ê koa; Tāi-pı̍t chòe--ê.1) Iâ-hô-hoa ah, góa beh chun-tiōng Lí chòe chì-kôaiⁿ, in-ūi Lí bat thê-po̍at góa, Bô hō͘ góa ê kiû-siû tùi góa khoa-kháu.

(BCL) 〔此個詩是獻宮殿的歌，大衛做的。〕耶和華啊，我欲尊重你做至高，因為你曾提拔我，無互我的仇讎對我誇口。

2

(THR) Iâ-hô-hoa góa ê Siōng-tè ah, Góa bat kiû-kiò Lí, Lí chiū i-hó góa.

(BCL) 耶和華──我的上帝啊，我曾求叫你，你就醫好我。

3

(THR) Iâ-hô-hoa ah, Lí bat kiù góa ê lêng-hûn tùi im-kan khí--lâi. Lí hō͘ góa o̍ah-teh, bián-tì jı̍p bōng.

(BCL) 耶和華啊，你曾救我的靈魂對陰間起來，你互我活，免致入墓。

4

(THR) Iâ-hô-hoa sèng ê peh-sìⁿ ah, lín tio̍h chhiùⁿ-koa o-ló I, Kì-liām I ê sèng miâ lâi kám-siā I.

(BCL) 耶和華聖的百姓啊，恁著唱歌嘔咾伊，記念伊的聖名來感謝伊。

5

(THR) In-ūi I ê siū-khì put-kò ba̍k-nih-kú; I ê un-tián sī it-seng ê kú; Kui-mî sui-jiân ū thî-khàu, Chá-khí sî chiū ū hoaⁿ-hí.

(BCL) 因為，伊的受氣不過目久；伊的恩典是一生的久，歸暝雖然有啼哭，早起時就有歡喜。

6

(THR) Lūn-kàu góa, góa tī heng-thong ê sî chiū kóng, Góa éng bōe iô-choah.

(BCL) 論到我，我佇亨通的時，就講：我永搖泏。

7

(THR) Iâ-hô-hoa ah, Lí bat si-un, hō͘ góa ê soaⁿ khiā-chāi kian-kò͘, Lí ng Lí ê bīn, góa chiū peh-pak.

(BCL) 耶和華啊，你曾施恩，互我的山豎在堅固；你掩你的面，我就迫腹。

8

(THR) Iâ-hô-hoa ah, góa kiû-kiò Lí; Góa tùi Iâ-hô-hoa kiû un, kóng,

(BCL) 耶和華啊，我求叫你；我對耶和華求恩，講：

9

(THR) Góa lâu-huih, góa jı̍p bōng, ū siáⁿ lī-ek? Tîn-ai kiám ōe o-ló Lí? kiám ōe pò-iông Lí ê chin-sı̍t mah?

(BCL) 我流血，我入墓，有啥利益？塵埃豈會謳咾你，豈會報揚你的真實嗎？

10

(THR) Iâ-hô-hoa ah, kiû Lí thiaⁿ góa, lîn-bín góa; Iâ-hô-hoa ah, kiû Lí pang-chān góa.

(BCL) 耶和華啊，求你聽我，憐憫我！耶和華啊，求你幫助我！

11

(THR) Lí í-keng chiong góa ê thî-khàu piàn-chòe thiàu-bú; Lí chiong góa ê môa-saⁿ thǹg--khì, ēng hoaⁿ-hí kā góa hâ;

(BCL) 你已經將我的啼哭變做跳舞，你將我的麻衫褪去，用歡喜給我縖，

12

(THR) Thang hō͘ góa ê sim-sîn chhiùⁿ-koa, o-ló Lí, ia̍h bô chēng-chēng. Iâ-hô-hoa góa ê Siōng-tè ah, góa beh kám-siā Lí, kàu éng-óan.

(BCL) 通互我的心神唱歌謳咾你，亦無靜靜。耶和華──我的上帝啊，我欲感謝你，到永遠！

Bible Color Mark

• 台語漢字羅馬本
• 巴克禮全羅