詩篇 第 22 章

1

(THR) Tāi-pı̍t ê si; kau hō͘ Ga̍k-koaⁿ; tiāu, ēng "Chá-khí sî ê lo̍k-bú".1) Góa ê Siōng-tè, góa ê Siōng-tè, siáⁿ-sū pàng-lī góa? Siáⁿ-sū lī-khui hn̄g-hn̄g, bô kiù góa; m̄-thiaⁿ góa âu-kiò ê ōe?

(BCL) 〔大衛的詩，交互樂官。調用「早起時的鹿母」。〕我的上帝，我的上帝！啥事放離我？啥事離開遠遠無救我？呣聽我喉叫的話？

2

(THR) Góa ê Siōng-tè ah, góa jı̍t--sî kiû-kiò, Lí bô thiaⁿ góa; Mî--sî kiû-kiò, góa ia̍h bô chēng-chēng.

(BCL) 我的上帝啊，我日時求叫，你無聽我，暝時求叫，我亦無靜靜。

3

(THR) Chóng-sī Lí sī sèng, Lí sī ēng Í-sek-lia̍t ê o-ló chòe chō-ūi--ê.

(BCL) 總是你是聖，你是用以色列的謳咾做座位者。

4

(THR) Góan ê lia̍t-chó͘ óa-khò Lí, In óa-khò Lí, Lí chiū chín-kiù in.

(BCL) 阮的列祖倚靠你；倚靠你，你就拯救。

5

(THR) In ai-kiû Lí, chiū tit-tio̍h chín-kiù; In óa-khò Lí chiū put-tì kiàn-siàu.

(BCL) 哀求你，就得著拯救；倚靠你，就不致見誚。

6

(THR) Chóng-sī góa sī thâng-thōa, m̄-sī lâng; Hō͘ lâng ki-chhì, hō͘ peh-sìⁿ khòaⁿ-khin.

(BCL) 總是我是蟲，呣是人，互人譏刺，互百姓看輕。

7

(THR) Hōan-nā khòaⁿ-kìⁿ góa ê, lóng thí-chhiò góa; In ngiauh-chhùi iô-thâu, kóng,

(BCL) 凡若看見我的攏恥笑我；譊嘴搖頭，講：

8

(THR) Tio̍h chiong pún-sin kau-tài Iâ-hô-hoa, I thang kiù--i; Iâ-hô-hoa kì-jiân hoaⁿ-hí i, I thang kiù--i.

(BCL) 著將本身交代耶和華，伊通救伊！耶和華既然歡喜伊，伊通救伊！

9

(THR) Chóng-sī Lí sī hō͘ góa chhut lāu-bú ê thai--ê, Góa tī lāu-bú ê heng-chêng, Lí hō͘ góa óa-khò Lí.

(BCL) 總是你是互我出老母的胎者；我佇老母的胸前，你互我倚靠你。

10

(THR) Góa tùi thai--nih chhut, chiū kau-tài Lí; Tùi góa chhut lāu-bú ê pak-tó͘, Lí sī góa ê Siōng-tè.

(BCL) 我對胎裡出就交代你；對我出老母的腹肚，你是我的上帝。

11

(THR) M̄-thang lī-khui góa hn̄g-hn̄g; in-ūi hōan-lān pek-kūn, Bô ū pang-chān góa ê.

(BCL) 呣通離開我遠遠！因為患難迫近，無有幫助我的。

12

(THR) Ū chōe-chōe gû-káng ûi-lûi góa; Pa-san ióng ê gû sì-bīn ûi-khùn góa.

(BCL) 有多多牛圍纍我，巴珊勇的牛四面圍困我。

13

(THR) In ǹg góa khui-chhùi, Chhin-chhiūⁿ teh peh-thiah, teh tōa-siaⁿ háu ê sai.

(BCL) 向我開嘴，親像擘拆，大聲哮的獅。

14

(THR) Góa chhin-chhiūⁿ chúi piàⁿ-chhut, Góa ê kut lóng thu̍t-lûn; Góa ê sim chhin-chhiūⁿ la̍h, Siau-iûⁿ tī pak-lāi.

(BCL) 我親像水傾出；我的骨攏脫輪；我的心親像蠟消溶佇腹內。

15

(THR) Góa ê cheng-le̍k ko͘-tâ, chhin-chhiūⁿ hāu-phiaⁿ-phè; Góa ê chı̍h liâm tī góa ê chiūⁿ-kiuⁿ; Lí hē góa tī sí-tōe ê thô͘-hún.

(BCL) 我的精力枯焦，親像瓦片坯；我的舌粘佇我的上　。你下我佇死地的土粉。

16

(THR) Káu ê lūi ûi góa; Pháiⁿ-tóng pau-ûi góa; In chha̍k góa ê chhiú, góa ê kha.

(BCL) 狗的類圍我，歹黨包圍我；鑿我的手，我的腳。

17

(THR) Góa ê kut-thâu, góa lóng ōe sǹg-tit; In teh khòaⁿ góa, teh siòng góa.

(BCL) 我的骨頭，我攏會算得；看我相我。

18

(THR) In pun góa ê saⁿ, Liam-khau góa ê i-ho̍k.

(BCL) 分我的衫，拈鬮我的衣服。

19

(THR) Iâ-hô-hoa ah, kiû Lí m̄-thang lī-khui góa hn̄g-hn̄g; Góa ê khùi-la̍t ah, kiû Lí kín-kín lâi pang-chān góa.

(BCL) 耶和華啊，求你呣通離開我遠遠！我的氣力啊，求你緊緊來幫助我！

20

(THR) Kiû Lí kiù góa ê sîn-hûn thoat-lī to-kiàm; Kiù góa ê sìⁿ-miā thoat-lī káu ê lūi ê sè-le̍k.

(BCL) 求你救我的神魂脫離刀劍，救我的生命脫離狗的類的勢力，

21

(THR) Kiù góa thoat-lī sai ê chhùi; Lí í-keng thiaⁿ góa, hō͘ góa thoat-lī iá-gû ê kak.

(BCL) 救我脫離獅的嘴；你已經聽我，互我脫離野牛的角。

22

(THR) Góa beh pò-iông Lí ê miâ tī góa ê hiaⁿ-tī; Góa beh o-ló Lí tī hōe-tiong.

(BCL) 我欲報揚你的名佇我的兄弟，我欲謳咾你佇會中。

23

(THR) Lín kiaⁿ-ùi Iâ-hô-hoa--ê, tio̍h o-ló I; Ngá-kok ê hō͘-è, lóng tio̍h êng-kng I. Í-sek-lia̍t ê hō͘-è, lóng tio̍h kèng-ùi I.

(BCL) 恁驚畏耶和華者著謳咾伊！雅各的後裔攏著榮光伊！以色列的後裔攏著敬畏伊！

24

(THR) In-ūi I bô khòaⁿ-khin, ia̍h bô iàm-chiān, khùn-khó͘ lâng ê khùn-khó͘; Ia̍h bô tùi i ng-bīn; I kiû-kiò I ê sî, I chiū thiaⁿ i.

(BCL) 因為伊無看輕，亦無厭賤困苦人的困苦，亦無對伊掩面；伊求叫伊的時，伊就聽伊。

25

(THR) Góa tī tōa chū-hōe ê tiong-kan só͘ o-ló--ê, sī tùi lí lâi; Góa beh tī kiaⁿ-ùi I ê lâng ê bīn-chêng, siā góa ê gōan.

(BCL) 我佇大聚會的中間所謳咾者是對你來；我欲佇驚畏伊的人的面前謝我的願。

26

(THR) Khiam-pi ê lâng beh tit-tio̍h chia̍h-pá; Chhē Iâ-hô-hoa ê lâng beh o-ló I; Gōan lín ê sim o̍ah kàu éng-óan.

(BCL) 謙卑的人欲得著食飽；尋耶和華的人欲謳咾伊。願恁的心活到永遠！

27

(THR) Tōe ê ke̍k-thâu lóng beh siàu-liām, lâi kui-sūn Iâ-hô-hoa; Lia̍t-pang ê bān-cho̍k lóng beh kèng-pài tī Lí ê bīn-chêng.

(BCL) 地的極頭攏欲數念，來歸順耶和華；列邦的萬族攏欲敬拜佇你的面前。

28

(THR) In-ūi kok sī Iâ-hô-hoa ê; I sī bān-kok ê chú-cháiⁿ.

(BCL) 因為國是耶和華的；伊是萬國的主宰。

29

(THR) Tōe-chiūⁿ it-chhè hó-hàn ê lâng beh lim chia̍h lâi kèng-pài; Kìⁿ-nā kui-thó͘ ê lâng, bōe-ōe pó-chôan sìⁿ-miā--ê, lóng beh phak-pài tī I ê bīn-chêng.

(BCL) 地上一切好漢的人欲飲食來敬拜；見若歸土的人──會保全生命者──攏欲仆拜佇伊的面前。

30

(THR) Ū hō͘-è beh ho̍k-sāi I; Chú ê tāi-chì beh thôan tī āu-tāi.

(BCL) 有後裔欲服事伊；主的代誌欲傳佇後代。

31

(THR) In beh lâi, ia̍h beh thôan I ê kong-gī, Hō͘ tit-beh chhut-sì ê peh-sìⁿ chai chit ê sū sī I chòe--ê.

(BCL) 欲來亦欲傳伊的公義互得欲出世的百姓，知此個事是伊做的。

Bible Color Mark

• 台語漢字羅馬本
• 巴克禮全羅