詩篇 第 146 章

1

(THR) Lín tio̍h o-ló Iâ-hô-hoa. Góa ê sim ah, lí tio̍h o-ló Iâ-hô-hoa.

(BCL) 恁著謳咾耶和華！我的心啊，你著謳咾耶和華！

2

(THR) Góa it-seng beh o-ló Iâ-hô-hoa; Góa iáu-o̍ah ê sî, beh chhiùⁿ-koa o-ló góa ê Siōng-tè.

(BCL) 我一生欲謳咾耶和華！我猶活的時欲唱歌謳咾我的上帝！

3

(THR) Lín bo̍h--tit óa-khò kun-ông, bo̍h--tit óa-khò sè-kan lâng; In chı̍t-tiám-á bōe-ōe pang-chān.

(BCL) 恁莫得倚靠君王，莫得倚靠世間人；一點仔會幫助。

4

(THR) I chı̍t-ē tn̄g-khùi, chiū kui-thó͘; I só͘ kè-e̍k--ê, tī hit-jı̍t chiū siau-bia̍t.

(BCL) 伊一下斷氣，就歸土；伊所計劃的，佇彼日就消滅。

5

(THR) Ū Ngá-kok ê Siōng-tè chòe i ê pang-chān, Ǹg-bāng i ê Siōng-tè Iâ-hô-hoa ê, chit-hō lâng ū hok-khì;

(BCL) 有雅各的上帝做伊的幫助，向望伊的上帝──耶和華的，此號人有福氣！

6

(THR) I sī chhòng-chō thiⁿ, tōe, hái, kap kî-tiong ê bān-mı̍h; I pó-siú sêng-sı̍t kàu tī éng-óan;

(BCL) 伊是創造天、地、海，及其中的萬物；伊保守誠實，到佇永遠。

7

(THR) I ūi-tio̍h siū un-khut ê lâng sin-oan; Siúⁿ-sù chia̍h-mı̍h hō͘ iau-gō--ê. Iâ-hô-hoa tháu-pàng siū koaiⁿ-kaⁿ--ê;

(BCL) 伊為著受冤屈的人伸冤，賞賜食物互枵餓者。耶和華解放受關監者；

8

(THR) Iâ-hô-hoa khui chhiⁿ-mî-lâng ê ba̍k-chiu; Iâ-hô-hoa hû-khí siū ap-chè ê lâng; Iâ-hô-hoa thiàⁿ-sioh gī-lâng;

(BCL) 耶和華開睛暝人的目睭；耶和華扶起受壓制的人。耶和華疼惜義人。

9

(THR) Iâ-hô-hoa pó-hō͘ chhut-gōa lâng; Hû-chhî ko͘-jî kóaⁿ-hū; To̍k-to̍k pháiⁿ-lâng ê tō-lō͘, hō͘ i oan-khiau.

(BCL) 耶和華保護出外人，扶持孤兒寡婦，獨獨歹人的道路互伊彎曲。

10

(THR) Iâ-hô-hoa beh chòe ông kàu éng-óan; Sek-an ah, lí ê Siōng-tè beh chòe ông kàu bān-tāi. Lín tio̍h o-ló Iâ-hô-hoa.

(BCL) 耶和華欲做王，到永遠！錫安啊，你的上帝欲做王，到萬代！恁著謳咾耶和華！

Bible Color Mark

• 台語漢字羅馬本
• 巴克禮全羅