詩篇 第 143 章

1

(THR) Tāi-pı̍t ê si.1) Iâ-hô-hoa ah, kiû Lí thiaⁿ góa ê kî-tó, àⁿ hī-khang thiaⁿ góa ê khún-kiû; Chiàu Lí ê sìn-sı̍t, chiàu Lí ê kong-gī, lâi ìn góa.

(BCL) 〔大衛的詩。〕耶和華啊，求你聽我的祈禱，俯耳孔聽我的懇求，照你的信實照你的公義來應我。

2

(THR) Kiû Lí bo̍h-tit sím-mn̄g Lí ê lô͘-po̍k, In-ūi tī Lí ê bīn-chêng, o̍ah-teh ê lâng, bô chı̍t-ê chheng-chòe-gī.

(BCL) 求你莫得審問你的奴僕；因為佇你的面前，活的人無一個稱做義。

3

(THR) Tùi-te̍k khún-pek góa, Chiong góa ê sìⁿ-miā, phah-tó tī tōe--nih; Hō͘ góa tiàm tī o͘-àm ê só͘-chāi, chhin-chhiūⁿ sí kú-kú ê lâng chı̍t-iūⁿ.

(BCL) 對敵窘迫我，將我的生命拍倒佇地裡，互我踮佇黑暗的所在，親像死久久的人一樣。

4

(THR) Só͘-í góa ê sîn-hûn tī góa ê lāi-bīn hūn-khì; Góa ê sim tī góa ê lāi-bīn chhiⁿ-chhìn.

(BCL) 所以，我的神魂佇我的內面昏去；我的心佇我的內面凄凊。

5

(THR) Góa kì-tit kó͘-chá ê jı̍t; Siàu-liām Lí it-chhè ê só͘-kiâⁿ; Chēng-chēng siūⁿ Lí ê chhiú ê só͘-chòe.

(BCL) 我記得古早的日，數念你一切的所行，靜靜想你的手的所做。

6

(THR) Góa ǹg Lí kia̍h-khí chhiú, Góa ê sim him-bō͘ Lí, chhin-chhiūⁿ khòng-hān ê tōe chı̍t-iūⁿ. [sè-la̍h

(BCL) 我向你抬起手；我的心欣慕你，親像亢旱的地一樣。（細拉）

7

(THR) Iâ-hô-hoa ah, kiû Lí kín-kín ìn góa; Góa ê sim-sîn hùi-liáu-liáu; M̄-thang tùi góa ng bīn; Bián-tit góa chhin-chhiūⁿ lo̍h-bōng ê lâng.

(BCL) 耶和華啊，求你緊緊應我！我的心神費了了！呣通對我掩面，免得我親像落墓的人。

8

(THR) Kiû Lí hō͘ góa chá-khí-sî thiaⁿ-kìⁿ Lí chû-ài ê siaⁿ, In-ūi góa óa-khò Lí; Kiû Lí hō͘ góa chai eng-kai kiâⁿ ê lō͘. In-ūi góa ê sim gióng-bōng Lí.

(BCL) 求你互我早起時聽見你慈愛的聲，因為我倚靠你；求你互我知應該行的路，因為我的心仰望你。

9

(THR) Iâ-hô-hoa ah, kiû Lí kiù góa thoat-lī góa ê tùi-te̍k; Góa cháu--khì bih tī Lí hia.

(BCL) 耶和華啊，求你救我脫離我的對敵！我走去匿佇你遐。

10

(THR) Lí sī góa ê Siōng-tè, kiû Lí kà-sī góa kiâⁿ Lí ê chí-ì; Lí ê sîn sī hó, kiû Lí chhōa góa tī pîⁿ-tı̍t ê tōe.

(BCL) 你是我的上帝，求你教示我行你的旨意。你的神是好；求你導我佇平直的地。

11

(THR) Iâ-hô-hoa ah, kiû Lí ūi-tio̍h Lí ê miâ hō͘ góa o̍ah; Chiàu Lí ê kong-gī, chhōa góa chhut hōan-lān-tiong.

(BCL) 耶和華啊，求你為著你的名互我活，照你的公義，導我出患難中，

12

(THR) Chiàu Lí ê chû-ài, tû-khì góa ê tùi-te̍k, Châu-bia̍t it-chhè khó͘-chhó͘ góa ê lâng; In-ūi góa sī Lí ê lô͘-po̍k.

(BCL) 照你的慈愛除去我的對敵，剿滅一切苦楚我的人，因為我是你的奴僕。

Bible Color Mark

• 台語漢字羅馬本
• 巴克禮全羅