詩篇 第 14 章

1

(THR) Tāi-pı̍t ê si, kau hō͘ Ga̍k-koaⁿ.1) Gōng-lâng sim-lāi kóng, Bô ū Siōng-tè. In thàn siâ-ok, kiâⁿ khó-ò͘ⁿ ê sū; Bô chı̍t-lâng kiâⁿ-hó.

(BCL) 〔大衛的詩，交互樂官。〕戇人心內講：無有上帝。趁邪惡，行可惡的事；無一人行好。

2

(THR) Iâ-hô-hoa tùi thiⁿ àⁿ-lo̍h khòaⁿ sè-kan-lâng, Beh khòaⁿ ū bêng-lí--ê, Ū chhē-kiû Siōng-tè--ê á-bô.

(BCL) 耶和華對天俯落看世間人，欲看有明理者，有尋求上帝者抑無。

3

(THR) In lóng oai-chho̍ah, it-khài piàn-chòe ù-òe; Bô lâng kiâⁿ-hó, liân chı̍t-ê ia̍h bô.

(BCL) 攏歪斜，一概變做污穢；無人行好，連一個亦無。

4

(THR) Chòe-pháiⁿ ê lâng kiám lóng bōe hiáu-tit mah? In thun-chia̍h Góa ê peh-sìⁿ chhin-chhiūⁿ chia̍h piáⁿ, Ia̍h bô kiû-kiò Iâ-hô-hoa.

(BCL) 做歹的人豈攏曉得嗎？吞食我的百姓，親像食餅，亦無求叫耶和華。

5

(THR) In tī-hia tōa-tōa kiaⁿ-hiâⁿ; In-ūi Siōng-tè tī gī-lâng ê cho̍k-lūi-tiong.

(BCL) 佇遐大大驚惶，因為上帝佇義人的族類中。

6

(THR) Lín hō͘ sòng-hiong lâng ê kè-bô͘ pìⁿ-chòe kiàn-siàu, Chóng-sī Iâ-hô-hoa chòe i tô-siám ê só͘-chāi.

(BCL) 恁互喪鄉人的計謀變做見誚；總是耶和華做伊逃閃的所在。

7

(THR) Gōan Í-sek-lia̍t ê chín-kiù tùi Sek-an chhut! Iâ-hô-hoa kiù I siū-lia̍h ê peh-sìⁿ tò-tńg-lâi, Hit-sî Ngá-kok beh khòai-lo̍k, Í-sek-lia̍t beh hoaⁿ-hí.

(BCL) 願以色列的拯救對錫安出。耶和華救伊受掠的百姓倒轉來，彼時雅各欲快樂，以色列欲歡喜。

Bible Color Mark

• 台語漢字羅馬本
• 巴克禮全羅