詩篇 第 139 章

1

(THR) Tāi-pı̍t ê si, kau hō͘ Ga̍k-koaⁿ.1) Iâ-hô-hoa ah, Lí í-keng kàm-chhat góa, bat góa.

(BCL) 〔大衛的詩，交互樂官。〕耶和華啊，你已經鑑察我，識我。

2

(THR) Góa chē--lo̍h-khì, góa peh--khí-lâi, Lí lóng chai; Lí tùi hn̄g-hn̄g chai góa ê liām-thâu.

(BCL) 我坐落去，我絔起來，你攏知；你對遠遠知我的念頭。

3

(THR) Góa kiâⁿ-lō͘, góa tó tī bîn-chhn̂g, Lí lóng siông-sè chai; Góa it-chhè só͘-kiâⁿ--ê, Lí iā chhim-chai.

(BCL) 我行路，我倒佇眠床，你攏詳細知；我一切所行的，你也深知。

4

(THR) Iâ-hô-hoa ah, góa ê chhùi só͘ kóng ê ōe, Lí bô chı̍t-kù m̄-chai.

(BCL) 耶和華啊，我的嘴所講的話，你無一句呣知。

5

(THR) Lí tī góa ê chêng-āu ûi góa, Hōaⁿ-chhiú tī góa ê téng-bīn.

(BCL) 你佇我的前後圍我，按手佇我的頂面。

6

(THR) Chit khóan ê chai-bat kî-biāu, góa bōe-ōe chhek-to̍k; Chin-kôaiⁿ, góa bōe-ōe kàu.

(BCL) 此款的知識奇妙，我會測　，真高，我會到。

7

(THR) Góa beh khì toh-lo̍h, siám-pī Lí ê sîn? Góa beh cháu-khì toh-lo̍h, siám-pī Lí ê bīn?

(BCL) 我欲去叨落閃避你的神？我欲走去叨落、閃避你的面？

8

(THR) Góa nā chiūⁿ thiⁿ, Lí tī-hia; Góa nā khùn tī im-kan, Lí ia̍h tī-hia.

(BCL) 我若上天，你佇遐；我若睏佇陰間，你亦佇遐。

9

(THR) Góa nā thí-khui chheng-chá ê sı̍t, Pe kàu hái ê ke̍k-thâu lâi khiā-khí;

(BCL) 我若展開清早的翅，飛到海的極頭來徛起，

10

(THR) Chiū nā tī-hia, Lí ê chhiú ia̍h beh ín-chhōa góa, Lí ê chiàⁿ-chhiú ia̍h beh khan góa.

(BCL) 就若佇遐，你的手亦欲引導我；你的正手亦欲牽我。

11

(THR) Góa nā kóng, Ou-àm beh jia-khàm góa, Koh sì-ûi ê kng beh pìⁿ-chòe àm-mî;

(BCL) 我若講：黑暗欲遮蓋我，閣四圍的光欲變做暗暝；

12

(THR) Chiū o͘-àm ia̍h bōe-ōe jia-khàm góa, hō͘ Lí bô khòaⁿ-kìⁿ; Ou-àm mî chhin-chhiūⁿ jı̍t--sî hoat-kng. Ou-àm kap kng-bêng, chāi Lí khòaⁿ lóng sī chı̍t-iūⁿ.

(BCL) 就黑暗亦會遮蓋我，互你無看見，黑暗暝親像日時發光。黑暗及光明，在你看攏是一樣。

13

(THR) In-ūi góa ê chōng-hú, sī Lí só͘ chhòng-chō--ê; Góa tī lāu-bú ê pak-tó͘-lāi, Lí ū pì-iū góa.

(BCL) 因為我的臟腑是你所創造的；我佇老母的腹肚內，你有庇佑我。

14

(THR) Góa beh kám-siā Lí, in-ūi góa siū-chō kî-biāu thang kiaⁿ; Lí ê só͘-chòe kî-biāu; Che sī góa ê sim chhim chai--ê.

(BCL) 我欲感謝你，因為我受造，奇妙通驚；你的所做奇妙，這是我的心深知的。

15

(THR) Góa tī àm-tiong siū-chō, Tī tōe ê chin-tóe siū liân-lo̍k, Hit-sî góa ê hêng-thé bô ún-môa tī Lí.

(BCL) 我佇暗中受造，佇地的真底受聯絡；彼時，我的形體無隱瞞佇你。

16

(THR) Góa bē chiâⁿ-hêng ê thé-chit, Lí ê ba̍k-chiu í-keng khòaⁿ-kìⁿ, Só͘ tiāⁿ-tio̍h ê jı̍t, iáu-bē ū chı̍t-jı̍t, Lóng kì tī Lí ê chheh.

(BCL) 我未成形的體質，你的目睭已經看見；所定著的日，猶未有一日，攏記佇你的冊。

17

(THR) Siōng-tè ah, Lí ê ì-sù tùi tī góa, kàu chiah pó-pòe! Hit ê siàu-gia̍h, kàu chiah chōe!

(BCL) 上帝啊，你的意思對佇我到即寶貝！彼個數額到即多！

18

(THR) Góa nā beh sǹg--i, pí hái-soa khah-chōe; Góa khùn cheng-sîn ê sî, iû-gôan kap Lí saⁿ-kap tī-teh.

(BCL) 我若欲算伊，比海沙卡多；我睏精神的時，猶原及你相及佇。

19

(THR) Siōng-tè ah, Lí tek-khak beh châu-bia̍t pháiⁿ-lâng; Só͘-í lín chiah ê ài hō͘ lâng lâu-huih--ê, tio̍h lī-khui góa khì.

(BCL) 上帝啊，你的確欲剿滅歹人；所以，恁諸個愛互人流血者，著離開我去！

20

(THR) In-ūi in kóng pháiⁿ-ōe, tú-tak Lí; Lí ê tùi-te̍k ia̍h lām-sám chheng Lí ê miâ.

(BCL) 因為講歹話抵觸你；你的對敵亦濫糝稱你的名。

21

(THR) Iâ-hô-hoa ah, òan-hūn Lí--ê, góa kiám bô òan-hūn in mah? Khí-lâi kong-kek Lí--ê, góa kiám bô iàm-chiān in mah?

(BCL) 耶和華啊，怨恨你者，我豈無怨恨嗎？起來攻擊你者，我豈無厭賤嗎？

22

(THR) Góa chīn-chāi òan-hūn in, lia̍h in chòe góa ê tùi-te̍k.

(BCL) 我盡在怨恨，掠做我的對敵。

23

(THR) Siōng-tè ah, kiû Lí kàm-chhat góa, chai góa ê sim-su; Chhì-giām góa, chai góa ê ì-sù.

(BCL) 上帝啊，求你鑑察我，知我的心思，試驗我，知我的意思，

24

(THR) Khòaⁿ góa ū sím-mı̍h pháiⁿ só͘-kiâⁿ bô, Chhōa góa kiâⁿ éng-o̍ah ê lō͘.

(BCL) 看我有甚麼歹所行無，導我行永活的路。

Bible Color Mark

• 台語漢字羅馬本
• 巴克禮全羅