詩篇 第 132 章

1

(THR) Chiūⁿ kiā-á ê si.1) Iâ-hô-hoa ah, Tāi-pı̍t só͘ siū it-chhè ê khó͘-lān, Kiû Lí kì-liām i;

(BCL) 〔上崎仔的詩。〕耶和華啊，大衛所受一切的苦難求你記念伊！

2

(THR) I cháiⁿ-iūⁿ tùi Iâ-hô-hoa chiù-chōa, tùi Ngá-kok ê tōa Kôan-lêng--ê hē-gōan;

(BCL) 伊怎樣對耶和華咒誓，對雅各的大權能者下願，

3

(THR) Kóng, Góa tek-khak bô jı̍p góa ê ke ê pò͘-pîⁿ, Iā bô chiūⁿ góa ê bîn-chhn̂g;

(BCL) 講：我的確無入我的家的布棚，也無上我的眠床；

4

(THR) Góa bô iông-ún góa ê ba̍k-chiu khùn--khì, Iā bô iông-ún góa ê ba̍k-chiu-phê ha̍p-óa;

(BCL) 我無容允我的目睭睏去，也無容允我的目睭皮合倚；

5

(THR) Thèng-hāu góa ūi-tio̍h Iâ-hô-hoa chhē-tio̍h só͘-chāi, Ūi Ngá-kok ê tōa Kôan-lêng--ê chhē-tio̍h khiā-khí ê só͘-chāi.

(BCL) 聽候我為著耶和華尋著所在，為雅各的大權能者尋著徛起的所在。

6

(THR) Khòaⁿ ah, góan thiaⁿ-kìⁿ iok-kūi tī Í-hoat-tha; Góan tī chhiū-nâ ê chhân tú-tio̍h i.

(BCL) 看啊，阮聽見約櫃佇以法他，阮佇樹林的田抵著伊。

7

(THR) Góan beh jı̍p I khiā-khí ê só͘-chāi; Góan beh pài tī I ê kha-ta̍h-í chêng.

(BCL) 阮欲入伊徛起的所在，阮欲拜佇伊的腳踏椅前。

8

(THR) Iâ-hô-hoa ah, kiû Lí khí-lâi; Lí kap Lí ê khùi-la̍t ê iok-kūi saⁿ-kap jı̍p Lí hioh-khùn ê só͘-chāi.

(BCL) 耶和華啊，求你起來，你及你的氣力的約櫃相及入你歇睏的所在！

9

(THR) Gōan Lí ê chè-si chhēng kong-gī chòe saⁿ; Gōan Lí sèng ê peh-sìⁿ chhut hoaⁿ-hí ê siaⁿ.

(BCL) 願你的祭司穿公義做衫！願你聖的百姓出歡喜的聲！

10

(THR) Kiû Lí in-ūi Lí ê lô͘-po̍k Tāi-pı̍t ê iân-kò͘, Bo̍h-tit khì-sak Lí ê siū-boah-iû--ê.

(BCL) 求你因為你的奴僕大衛的緣故，莫得棄拺你的受抹油者！

11

(THR) Iâ-hô-hoa ēng sêng-sı̍t tùi Tāi-pı̍t chiù-chōa, Tek-khak bô hóan-hok, Kóng, Góa beh hō͘ lí só͘-siⁿ-ê chē tī lí ê pó-chō.

(BCL) 耶和華用誠實對大衛咒誓，的確無反覆，講：我欲互你所生的坐佇你的寶座。

12

(THR) Lí ê kiáⁿ nā siú Góa ê iok, Kap Góa só͘ beh kà-sī in ê hoat-tō͘, In ê kiáⁿ-sun beh éng-óan chē tī lí ê pó-chō.

(BCL) 你的子若守我的約及我所欲教示的法度，的子孫欲永遠坐佇你的寶座。

13

(THR) In-ūi Iâ-hô-hoa ū kéng Sek-an, Ài ēng i chòe pún-sin khiā-khí ê só͘-chāi;

(BCL) 因為耶和華有揀錫安，愛用伊做本身徛起的所在，

14

(THR) Kóng, Che sī Góa éng-óan hioh-khùn ê só͘-chāi; Góa beh tiàm tī-chia, In-ūi sī Góa só͘ ì-ài ê.

(BCL) 講：這是我永遠歇睏的所在；我欲踮佇遮，因為是我所意愛的。

15

(THR) Góa beh hō͘ i ê bí-niû hong-sēng, Góa beh ēng chia̍h-mı̍h hō͘ i ê sòng-hiong-lâng kàu-gia̍h.

(BCL) 我欲互伊的米糧豐盛，我欲用食物互伊的喪鄉人夠額。

16

(THR) Góa beh hō͘ i ê chè-si chhēng kiù-un chòe saⁿ; I sèng ê peh-sìⁿ beh chhut tōa hoaⁿ-hí ê siaⁿ.

(BCL) 我欲互伊的祭司穿救恩做衫，伊聖的百姓欲出大歡喜的聲！

17

(THR) Góa beh hō͘ Tāi-pı̍t ê kak tī-hia hoat-siⁿ; Góa ūi-tio̍h Góa ê siū-boah-iû--ê pī-pān kng-teng.

(BCL) 我欲互大衛的角佇遐發生；我為著我的受抹油者備辦光燈。

18

(THR) Góa beh hō͘ i ê tùi-te̍k chhēng kiàn-siàu chòe saⁿ; Chóng-sī i ê bián-liû beh tī i ê thâu-khak-téng hoat-chhut kng.

(BCL) 我欲互伊的對敵穿見誚做衫；總是伊的冕旒欲佇伊的頭殼頂發出光。

Bible Color Mark

• 台語漢字羅馬本
• 巴克禮全羅