詩篇 第 116 章

1

(THR) Góa thiàⁿ Iâ-hô-hoa, In-ūi I thiaⁿ góa ê siaⁿ, góa ê khún-kiû.

(BCL) 我疼耶和華，因為伊聽我的聲，我的懇求。

2

(THR) I í-keng àⁿ hī-khang thiaⁿ góa; Só͘-í góa chı̍t-sì-lâng beh kiû-kiò I.

(BCL) 伊已經俯耳孔聽我，所以我一世人欲求叫伊。

3

(THR) Sí-bô ê soh tîⁿ-tio̍h góa, Im-kan ê thòng-khó͘ khîⁿ-tio̍h góa; Góa tú-tio̍h hōan-lān iu-khó͘.

(BCL) 死無的索纏著我；陰間的痛苦擒著我；我抵著患難憂苦。

4

(THR) Góa chiū kiû-kiò Iâ-hô-hoa ê miâ, kóng, Iâ-hô-hoa ah, taⁿ kiû Lí kiù góa ê sìⁿ-miā.

(BCL) 我就求叫耶和華的名，講：耶和華啊，今求你救我的生命！

5

(THR) Iâ-hô-hoa ū un-hūi, ū kong-gī; Góan ê Siōng-tè ū chû-pi.

(BCL) 耶和華有恩惠，有公義；阮的上帝有慈悲。

6

(THR) Iâ-hô-hoa pó-hō͘ gōng-tı̍t ê lâng; Góa kàu tī pi-bî ê tōe-ūi, I chiū kiù góa.

(BCL) 耶和華保護戇直的人；我到佇卑微的地位，伊就救我。

7

(THR) Góa ê sîn-hûn ah, tio̍h kui tī lí an-hioh ê só͘-chāi, In-ūi Iâ-hô-hoa ēng tōa-un khóan-thāi lí.

(BCL) 我的神魂啊！著歸佇你安息的所在，因為耶和華用大恩款待你，

8

(THR) In-ūi Lí kiù góa ê sìⁿ-miā bián-tit sí-bô; Kiù góa ê ba̍k-chiu bián lâu ba̍k-sái; Kiù góa ê kha bián po̍ah-tó.

(BCL) 因為你救我的生命免得死無，救我的目睭免流目屎，救我的腳免跋倒。

9

(THR) Góa beh tī Iâ-hô-hoa ê bīn-chêng, Kiâⁿ tī o̍ah-lâng ê tōe.

(BCL) 我欲佇耶和華的面前行佇活人的地。

10

(THR) Góa sìn, só͘-í kóng; Góa siū ke̍k-tōa ê khùn-khó͘;

(BCL) 我信，所以講；我受極大的困苦。

11

(THR) Góa bat tio̍h-kip lâi kóng, Lâng lóng sī hu-ké.

(BCL) 我曾著急來講：人攏是虛假！

12

(THR) Iâ-hô-hoa siúⁿ-sù góa it-chhè ê tōa-un, Góa beh ēng sím-mı̍h pò-tap I?

(BCL) 耶和華賞賜我一切的大恩我欲用甚麼報答伊？

13

(THR) Góa beh phâng-khí kiù-un ê poe, Kiû-kiò Iâ-hô-hoa ê miâ.

(BCL) 我欲捧起救恩的杯，求叫耶和華的名。

14

(THR) Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê gōan.

(BCL) 我欲佇伊眾百姓的面前對耶和華謝我的願。

15

(THR) Iâ-hô-hoa khòaⁿ I sèng ê peh-sìⁿ ê sí, Chòe chin pó-pòe.

(BCL) 耶和華看伊聖的百姓的死做真寶貝。

16

(THR) Iâ-hô-hoa ah, góa sı̍t-chāi sī Lí ê lô͘-po̍k; Góa sī Lí ê lô͘-po̍k, sī Lí lú-pī ê kiáⁿ; Lí í-keng tháu-khui khún-pa̍k góa ê soh.

(BCL) 耶和華啊，我實在是你的奴僕；我是你的奴僕，是你女婢的子。你已經解開捆縛我的索。

17

(THR) Góa beh ēng kám-siā ê chè hiàn hō͘ Lí; Koh beh kiû-kiò Iâ-hô-hoa ê miâ.

(BCL) 我欲用感謝的祭獻互你，閣欲求叫耶和華的名。

18

(THR) Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê gōan.

(BCL) 我欲佇伊眾百姓的面前，對耶和華謝我的願，

19

(THR) Tī Iâ-hô-hoa chhù ê īⁿ-lāi, Tī lí Iâ-lō͘-sat-léng ê tiong-kan; Lín tio̍h o-ló Iâ-hô-hoa.

(BCL) 佇耶和華厝的院內，佇你耶路撒冷的中間。恁著謳咾耶和華！

Bible Color Mark

• 台語漢字羅馬本
• 巴克禮全羅