詩篇 第 110 章

1

(THR) Tāi-pı̍t ê si.1) Iâ-hô-hoa tùi góa ê chú kóng, Lí chē Góa ê iū-pêng, Thèng-hāu Góa hō͘ lí ê tùi-te̍k chòe Lí ê kha-ta̍h.

(BCL) 〔大衛的詩。〕耶和華對我的主講：你坐我的右旁，聽候我互你的對敵做你的腳踏。

2

(THR) Iâ-hô-hoa beh tùi Sek-an chhun-chhut lí ū lêng-le̍k ê kóaiⁿ; Lí tio̍h tī lí tùi-te̍k ê tiong-kan chiáng-kôan.

(BCL) 耶和華欲對錫安伸出你有能力的枴；你著佇你對敵的中間掌權。

3

(THR) Lí chhut-kun ê jı̍t, lí ê peh-sìⁿ beh ēng sèng-kiat ê chng-thāⁿ chòe saⁿ, kam-sim hiàn ka-kī; Lí ê chòng-teng kui-óa lí, chhin-chhiūⁿ chá-khí-sî só͘ kiat ê lō͘-chúi.

(BCL) 你出軍的日，你的百姓欲用聖潔的妝飾做衫，甘心獻家己；你的壯丁歸倚你親像早起時所結的露水。

4

(THR) Iâ-hô-hoa í-keng chiù-chōa, tek-khak bô thè-hóe, kóng, Lí éng-óan chòe chè-si, Chiàu Be̍k-ki-sé-tek ê pan-lia̍t.

(BCL) 耶和華已經咒誓，的確無退悔，講：你永遠做祭司照麥基洗德的班列。

5

(THR) Tī lí chiàⁿ-pêng ê Chú, Tng I siū-khì ê jı̍t, beh phah-pāi lia̍t-ông.

(BCL) 佇你正旁的主，當伊受氣的日，欲拍敗列王。

6

(THR) I beh tī lia̍t-pang-tiong lâi sím-phòaⁿ, I beh hō͘ sin-si piàn-móa ta̍k só͘-chāi; I beh tī chōe-chōe kok phah-phòa tùi-te̍k ê thâu-khak.

(BCL) 伊欲佇列邦中來審判，伊欲互身屍遍滿逐所在；伊欲佇多多國拍破對敵的頭殼。

7

(THR) I beh lim lō͘-piⁿ ê khoe-chúi; In-ūi án-ni, i beh kia̍h-khí thâu.

(BCL) 伊欲飲路邊的溪水，因為按呢伊欲抬起頭。

Bible Color Mark

• 台語漢字羅馬本
• 巴克禮全羅