詩篇 第 104 章

1

(THR) Góa ê sim-sîn ah, lí tio̍h o-ló Iâ-hô-hoa. Iâ-hô-hoa góa ê Siōng-tè ah, Lí sī chì-tōa; Lí ēng chun-êng ui-giâm chòe-saⁿ lâi chhēng.

(BCL) 我的心神啊，你著謳咾耶和華！耶和華──我的上帝啊，你是至大！你用尊榮威嚴做衫來穿，

2

(THR) Lí chhēng kng-bêng chhin-chhiūⁿ gōa-saⁿ; Thí-khui thiⁿ chhin-chhiūⁿ tiùⁿ-pak.

(BCL) 你穿光明，親像外衫，展開天，親像帳幅，

3

(THR) I tī chúi-tiong an-tì I lâu-koh ê thong-îⁿ, Ēng hûn chòe I ê chhia, Ēng hong ê sı̍t lâi kiâⁿ;

(BCL) 伊佇水中安置伊樓閣的通楹，用雲做伊的車，用風的翅來行，

4

(THR) Ēng hong chòe I ê sù-chiá, Ēng iām-hé chòe I ê chhe-ēng;

(BCL) 用風做伊的使者，用炎火做伊的差用，

5

(THR) Chiong tōe hē tī i ê tōe-ki téng, Hō͘ i éng-éng bô iô-choah.

(BCL) 將地下佇伊的地基頂，互伊永永無搖泏。

6

(THR) Lí ēng chhim-ian chhin-chhiūⁿ i-chiûⁿ jia-khàm tōe-bīn; Chiah ê chúi im-kè soaⁿ-niá.

(BCL) 你用深淵親像衣裳，遮蓋地面；諸個水淹過山嶺。

7

(THR) Lí chı̍t-ē hoah, chúi chiū kín-kín cháu; Lí ê lûi chı̍t-ē tân, chúi chiū kín-kín lâu;

(BCL) 你一下喝，水就緊緊走；你的雷一下鳴，水就緊緊流。

8

(THR) Chhèng kàu soaⁿ-thâu, lo̍h kàu soaⁿ-kok, Kui tī Lí kā in tiāⁿ-tio̍h ê só͘-chāi.

(BCL) 淐到山頭，落到山谷，歸佇你給定著的所在。

9

(THR) Lí tiāⁿ-tio̍h kài-hān hō͘ chúi bōe-ōe pôaⁿ-kè, Bô koh tò-tńg-lâi jia-khàm tōe-bīn.

(BCL) 你定著界限，互水會過，無閣倒轉來遮蓋地面。

10

(THR) Hō͘ chúi-chôaⁿ chhèng-chhut tī soaⁿ-kok, Lâu tī soaⁿ-tiong;

(BCL) 互水泉淐出佇山谷，流佇山中，

11

(THR) Hō͘ soaⁿ--nih ê cháu-siù lóng ū thang lim, Iá-lû tit-tio̍h chí chhùi-ta.

(BCL) 互山裡的走獸攏有通飲，野驢得著止嘴乾。

12

(THR) Thiⁿ-tiong ê pe-chiáu hioh tī chúi-piⁿ, Háu tī chhiū-ki téng.

(BCL) 天中的飛鳥歇佇水邊，哮佇樹枝頂。

13

(THR) I tùi I ê lâu-koh-tiong kòan-ak soaⁿ-niá, Tùi Lí só͘ chòe ê hāu-kó tōe chiū chhiong-chiok.

(BCL) 伊對伊的樓閣中灌沃山嶺；對你所做的效果，地就充足。

14

(THR) I hō͘ chháu hoat-siⁿ, hō͘ cheng-siⁿ thang chia̍h, Iā ū chhài-soe chòe lâng ê lō͘-ēng, Hō͘ chia̍h-mı̍h tùi tōe--nih chhut.

(BCL) 伊互草發生，互精牲通食，也有菜蔬，做人的路用，互食物對地裡出，

15

(THR) Koh ū chiú hō͘ lâng ê sim hoaⁿ-hí, Ū iû lūn-te̍k lâng ê bīn, Ū chia̍h-mı̍h pó͘-ióng lâng ê sim-la̍t.

(BCL) 閣有酒互人的心歡喜，有油潤澤人的面，有食物保養人的心力。

16

(THR) Iâ-hô-hoa ê chhiū lóng tit-tio̍h chhiong-chiok ê lūn-te̍k; Chiū-sī I só͘ chai Lī-pa-lùn ê pek-hiuⁿ-chhiū.

(BCL) 耶和華的樹攏得著充足的潤澤，就是伊所栽黎巴嫩的柏香樹。

17

(THR) Pe-chiáu choh-siū tī hit lāi-bīn; Ho̍h khiā-khí tī siông-chhiū ê tiong-kan.

(BCL) 飛鳥作巢佇彼內面；鶴徛起佇松樹的中間。

18

(THR) Kôaiⁿ-soaⁿ sī hō͘ iá-soaⁿ-iûⁿ tiàm, Chio̍h-pôaⁿ sī sa-hoan siám-bih ê só͘-chāi.

(BCL) 高山是互野山羊踮；石磐是沙番閃匿的所在。

19

(THR) I ēng ge̍h lâi tiāⁿ-tio̍h sî-choeh; Jı̍t-thâu iā chai thang lo̍h.

(BCL) 伊用月來定著時節；日頭也知通落。

20

(THR) Lí hō͘ i àm, chiū chòe mî--sî; Hit-sî chhiū-nâ-lāi ê pah-siù chiū lóng pê--chhut-lâi.

(BCL) 你互伊暗就做暝時，彼時樹林內的百獸就攏爬出來。

21

(THR) Sai-á-thûn háu, beh jiàu mı̍h-chia̍h, Tùi Siōng-tè thó in ê chia̍h-mı̍h.

(BCL) 獅仔肫哮，欲抓物食，對上帝討的食物。

22

(THR) Jı̍t-thâu chı̍t-ē chhut, in chiū cháu--khì bih, Tó tī in ê tōng-lāi.

(BCL) 日頭一下出，就走去匿，倒佇的洞內。

23

(THR) Lâng chhut-khì chòe-kang, Tio̍h-bôa kàu ê-hng-sî.

(BCL) 人出去做工，著磨到下昏時。

24

(THR) Iâ-hô-hoa ah, Lí só͘ chō--ê cháiⁿ-iūⁿ hiah chōe! Lóng sī Lí ēng tì-hūi chō-chiâⁿ--ê; Piàn-tōe móa-móa Lí ê pù-ū.

(BCL) 耶和華啊，你所造的怎樣許多！攏是你用智慧造成的；遍地滿滿你的富有。

25

(THR) Hia ū hái, tōa koh khoah, Kî-tiong ū sǹg-bōe-liáu ê tōng-bu̍t, Tōa-sòe ê o̍ah-mı̍h lóng ū.

(BCL) 遐有海，大閣闊；其中有算了的動物，大細的活物攏有。

26

(THR) Tī-hia ū chûn teh kiâⁿ; Ū Lí só͘ chhòng-chō ê tōa-hî iû-lâi iû-khì.

(BCL) 佇遐有船行，有你所創造的大魚游來游去。

27

(THR) Chiah-ê lóng teh thèng-hāu Lí, Thang chiàu-sî hō͘ in chia̍h-mı̍h.

(BCL) 諸個攏聽候你通照時互食物。

28

(THR) Lí hō͘ in, in chiū khioh--khí-lâi; Lí thí-khui Lí ê chhiú, in tit-tio̍h hó-mı̍h kàu-pá.

(BCL) 你互，就拾起來；你展開你的手，得著好物夠飽。

29

(THR) Lí ng Lí ê bīn, in chiū khòa-lū; Lí chiong in ê khùi siu-hôe, in chiū sí-bô, Lâi kui tī thô͘-hún.

(BCL) 你掩你的面，就掛慮；你將的氣收回，就死無，來歸佇土粉。

30

(THR) Lí hoat-chhut Lí ê sîn, in chiū siū chhòng-chō; Lí hō͘ tōe-bīn ōaⁿ chòe sin.

(BCL) 你發出你的神，就受創造；你互地面換做新。

31

(THR) Gōan Iâ-hô-hoa ê êng-kng éng-óan tī-teh; Gōan Iâ-hô-hoa ūi-tio̍h I só͘-chō--ê lâi hoaⁿ-hí.

(BCL) 願耶和華的榮光永遠佇！願耶和華為著伊所造的來歡喜！

32

(THR) I khòaⁿ tōe, tōe chiū tín-tāng; I bong soaⁿ, soaⁿ chiū chhut-ian.

(BCL) 伊看地，地就振動；伊摸山，山就出煙；

33

(THR) Góa beh chı̍t-sì-lâng ǹg Iâ-hô-hoa gîm-si; Góa iáu o̍ah ê sî beh ǹg góa ê Siōng-tè chhiùⁿ-koa o-ló.

(BCL) 我欲一世人向耶和華吟詩！我猶活的時，欲向我的上帝唱歌謳咾！

34

(THR) Gōan I lia̍h góa ê chēng-chēng-siūⁿ chòe ha̍h-ì; Góa beh in-ūi Iâ-hô-hoa hoaⁿ-hí.

(BCL) 願伊掠我的靜靜想做合意！我欲因為耶和華歡喜！

35

(THR) Gōan chōe-jîn tùi sè-chiūⁿ siau-bia̍t, Gōan pháiⁿ-lâng lóng bô--khì; Góa ê sim-sîn ah, tio̍h o-ló Iâ-hô-hoa; Lín tio̍h o-ló Iâ-hô-hoa.

(BCL) 願罪人對世上消滅！願歹人攏無去！我的心神啊，著謳咾耶和華！恁著謳咾耶和華！

Bible Color Mark

• 台語漢字羅馬本
• 巴克禮全羅