箴言 第 6 章

1

(THR) Góa ê kiáⁿ, lí nā ūi-tio̍h chhù-piⁿ chòe tiong-pó, Thòe gōa-lâng tah-èng;

(BCL) 我的子，你若為著厝邊做中保，替外人答應，

2

(THR) Lí chiū hō͘ chhùi-lāi ê ōe tauh--tio̍h, Hō͘ chhùi-lāi ê ōe khîⁿ--tio̍h.

(BCL) 你就互嘴內的話罩著，互嘴內的話擒著。

3

(THR) Góa ê kiáⁿ, lí kì-jiân lo̍h tī chhù-piⁿ ê chhiú-tiong, Taⁿ tio̍h án-ni kiâⁿ, lâi kiù ka-kī. Lí tio̍h khiam-pi khì khún-kiû lí ê chhù-piⁿ.

(BCL) 我的子，你既然落佇厝邊的手中，今著按呢行，來救家己：你著謙卑，去懇求你的厝邊。

4

(THR) M̄-thang hō͘ lí ê ba̍k-chiu khùn--khì, M̄-thang hō͘ lí ê ba̍k-chiu-phê pàng-khoeh.

(BCL) 呣通互你的目睭睏去；呣通互你的目睭皮放瞌。

5

(THR) Tio̍h kiù ka-kī, chhin-chhiūⁿ lo̍k thoat-lī phah-la̍h ê lâng ê chhiú; Chhin-chhiūⁿ chiáu thoat-lī lia̍h chiáu-á ê lâng ê chhiú.

(BCL) 著救家己，親像鹿脫離拍獵的人的手，親像鳥脫離掠鳥仔的人的手。

6

(THR) Pîn-tōaⁿ ê lâng ah, lí tio̍h khì khòaⁿ káu-hiā, Siūⁿ i ê kiâⁿ-chòe, thang tit-tio̍h tì-hūi.

(BCL) 貧憚的人啊，你著去看蚼蟻，想伊的行做通得著智慧。

7

(THR) I bô thâu-ba̍k, Bô kam(**kàm)-tok, bô sī-tōa,

(BCL) 伊無頭目，無監督，無序大，

8

(THR) Iáu-kú tī hē-thiⁿ pī-pān i ê chia̍h-mı̍h, Tī siu-koah ê sî chek-chū i ê bí-niû.

(BCL) 猶久佇夏天備辦伊的食物，佇收割的時積聚伊的米糧。

9

(THR) Pîn-tōaⁿ lâng ah, lí beh khùn kàu tī-sî ah? Lí sím-mı̍h sî khùn-chhíⁿ khí-lâi ah?

(BCL) 貧憚人啊，你欲睏到底時啊？你甚麼時睏醒起來啊？

10

(THR) Koh khùn tiap-á-kú, koh bîn tiap-á-kú, Sok-chhiú the tiap-á-kú;

(BCL) 閣睏霎仔久，閣眠霎仔久，束手撐霎仔久，

11

(THR) Lí ê sòng-hiong beh chhin-chhiūⁿ chha̍t lâi; Lí ê khiàm-kheh chhin-chhiūⁿ chhēng chiàn-kah--ê lâi.

(BCL) 你的喪鄉欲親像賊來，你的欠缺親像穿戰甲者來。

12

(THR) Bô hē-lo̍h ê pháiⁿ-lâng, Kiâⁿ-chòe chiū ēng kōai-biū ê chhùi,

(BCL) 無下落的歹人，行做就用乖謬的嘴，

13

(THR) Nih-ba̍k hōe-ì, ēng kha pí ì-sù, Ēng chńg-thâu-á chí-tiám.

(BCL) 　目會意，用腳比意思，用指頭仔指點，

14

(THR) Sim-lāi kōai-phiah, siông-siông kè-bô͘ pháiⁿ-sū; Sì-kòe so-lōng oan-ke.

(BCL) 心內乖僻，常常計謀歹事，四界唆弄冤家。

15

(THR) Só͘-í i ê chai-ē hut-jiân lîm-kàu; I beh hut-jiân pāi-hōai, bô hoat thang i-tī.

(BCL) 所以，伊的災禍忽然臨到；伊欲忽然敗壞，無法通醫治。

16

(THR) Ū la̍k-hāng sī Iâ-hô-hoa só͘ òan-hūn, Liân I ê sim só͘ iàm-ò͘ⁿ--ê, ū chhit-hāng;

(BCL) 有六項是耶和華所怨恨，連伊的心所厭惡的有七項：

17

(THR) Chiū-sī kiau-ngō͘ ê ba̍k-chiu, kóng pe̍h-chha̍t ê chı̍h, Chhiú thâi bô-chōe ê lâng;

(BCL) 就是驕傲的目睭，講白賊的舌，手無罪的人，

18

(THR) Sim tô͘-bô͘ pháiⁿ-sū, Kha kín-kín kiâⁿ hām-hāi;

(BCL) 心圖謀歹事，腳緊緊行陷害，

19

(THR) Kóng pe̍h-chha̍t ê ké kan-chèng, Tī hiaⁿ-tī tiong so-lōng oan-ke ê lâng.

(BCL) 講白賊的假干證，佇兄弟中唆弄冤家的人。

20

(THR) Góa ê kiáⁿ, tio̍h chip-siú lí ê lāu-pē ê bēng-lēng, M̄-thang khì-sak lí ê lāu-bú ê kà-sī.

(BCL) 我的子，著執守你的老父的命令；呣通棄拺你的老母的教示，

21

(THR) Tio̍h siông-siông kì-tiâu tī lí ê sim, Kòa tī lí ê ām-kún.

(BCL) 著常常記住佇你的心，掛佇你的頷頸。

22

(THR) Lí kiâⁿ-lō͘ ê sî chiū ín-chhōa lí; Lí khùn ê sî chiū pó-siú lí; Lí khùn-chhíⁿ chiū kap lí tâm-lūn.

(BCL) 你行路的時，就引導你；你睏的時，就保守你；你睏醒，就及你談論。

23

(THR) In-ūi bēng-lēng sī teng, kà-sī sī kng; Chiàu-hoat ê chek-pī sī o̍ah-miā ê lō͘;

(BCL) 因為命令是燈，教示是光，詔法的責備是活命的路，

24

(THR) Ōe pó-siú lí bô chhin-kūn pháiⁿ ê hū-jîn-lâng, Bô thiaⁿ kī-lú thiám-mī ê ōe.

(BCL) 會保守你無親近歹的婦仁人，無聽妓女諂媚的話。

25

(THR) Lí ê sim-lāi m̄-thang lôan-bō͘ i ê súi-sek; Iā m̄-thang hō͘ i ê ba̍k-chiu-phê ín-iú.

(BCL) 你的心內呣通戀慕伊的娞色，也呣通互伊的目睭皮引誘。

26

(THR) In-ūi kī-lú ōe hō͘ lâng chí-ū chhun chı̍t-tè-piáⁿ; Îm-hū ōe chhiúⁿ-to̍at lâng pó-kùi ê o̍ah-miā.

(BCL) 因為，妓女會互人只有剩一塊餅；淫婦會搶奪人寶貴的活命。

27

(THR) Lâng kiám ōe phō hé tī heng-chêng, I ê saⁿ ia̍h bô to̍h--khì mah?

(BCL) 人豈會抱火佇胸前，伊的衫亦無去嗎？

28

(THR) Lâng kiám ōe ta̍h tī jia̍t ê hé-thòaⁿ, I ê kha ia̍h bô sio--tio̍h mah?

(BCL) 人豈會踏佇熱的火炭，伊的腳亦無燒著嗎？

29

(THR) Chhin-kūn chhù-piⁿ ê bó͘--ê, ia̍h sī án-ni; Kìⁿ-nā bong i ê, bōe bián-tit siū-chōe.

(BCL) 親近厝邊的某者，亦是按呢；見若摸伊的，免得受罪。

30

(THR) Chha̍t in-ūi iau thau-the̍h mı̍h lâi chí-ki, Lâng bô khòaⁿ-khin i.

(BCL) 賊因為枵偷提物來止飢，人無看輕伊，

31

(THR) Siat-sú hō͘ lâng lia̍h-tio̍h, tio̍h pê chhit-pē; Tio̍h chiong ke-lāi só͘-ū--ê, lóng hō͘ lâng.

(BCL) 設使互人掠著，著賠七倍，著將家內所有的攏互人。

32

(THR) Kap lâng ê bó͘ kiâⁿ-îm--ê, chiū-sī bô tì-sek; Kiâⁿ chit ê sū--ê, beh sún-hāi ka-kī ê sìⁿ-miā.

(BCL) 及人的某行淫者，就是無智識；行此個事者，欲損害家己的生命。

33

(THR) I beh siū siong-hāi kap lêng-jio̍k; I ê kiàn-siàu bōe-ōe sóe-tû.

(BCL) 伊欲受傷害及凌辱；伊的見誚會洗除。

34

(THR) In-ūi tò͘-khī chiū-sī lâng ê tōa siū-khì; Pò-siû ê sî tek-khak bô khoan-iông.

(BCL) 因為妒忌就是人的大受氣，報讎的時的確無寬容。

35

(THR) Ēng gûn sio̍k-chōe, i iā m̄-tı̍h; Lí sui-jiân sàng chōe-chōe lé-mı̍h, i iā m̄ pàng lí soah.

(BCL) 用銀贖罪，伊也呣揲；你雖然送多多禮物，伊也呣放你息。

Bible Color Mark

• 台語漢字羅馬本
• 巴克禮全羅