箴言 第 21 章

1

(THR) Ông ê sim tī Iâ-hô-hoa ê chhiú-tiong; Chhin-chhiūⁿ chúi-kau, chiàu I ê só͘ ài phòa hō͘ i lâu.

(BCL) 王的心佇耶和華的手中，親像水溝照伊的所愛破互伊流。

2

(THR) Lâng ê só͘ kiâⁿ ka-kī khòaⁿ-chòe chèng-tı̍t, To̍k-to̍k Iâ-hô-hoa chhek-to̍k lâng ê sim.

(BCL) 人的所行，家己看做正直；獨獨耶和華測　人的心。

3

(THR) Kiâⁿ-gī péng-kong, Sī pí hiàn-chè koh khah tit-tio̍h Iâ-hô-hoa chiap-la̍p.

(BCL) 行義秉公，是比獻祭閣卡得著耶和華接納。

4

(THR) Ba̍k kôaiⁿ sim kiau, Í-kı̍p pháiⁿ-lâng ê teng lóng sī chōe.

(BCL) 目高心驕，以及歹人的燈攏是罪。

5

(THR) Un-khûn kè-e̍k-ê tit-tio̍h chhiong-sēng; To̍k-to̍k sò-sèng--ê ōe tì-kàu khiàm-kheh.

(BCL) 殷勤計劃的，得著昌盛；獨獨躁性者，會致到欠缺。

6

(THR) Ēng khúi-chà ê chı̍h lâi tit-tio̍h chîⁿ ê, Sī chhin-chhiūⁿ chhe-lâi chhe-khì ê phû-hûn, ka-kī chhú sí.

(BCL) 用詭詐的舌來得著錢的，是親像吹來吹去的浮雲，家己取死。

7

(THR) Pháiⁿ-lâng ê kiông-pō beh sàu-tû ka-kī; In-ūi in m̄-khéng kiâⁿ kong-pêng.

(BCL) 歹人的強暴欲掃除家己，因為呣肯行公平。

8

(THR) Tîm-le̍k tī chōe-ok ê, i ê lō͘ sī chin oan-oat; Chóng-sī chheng-kiat ê lâng, i ê só͘ kiâⁿ sī chèng-tı̍t.

(BCL) 沈溺佇罪惡的，伊的路是真彎越；總是清潔的人，伊的所行是正直。

9

(THR) Lêng-khó͘ tiàm tī chhù-téng ê kak-thâu, Bo̍h-tit kap chháu-nāu ê hū-jîn-lâng saⁿ-kap tòa tī khoan-khoah ê chhù.

(BCL) 寧可踮佇厝頂的角頭，莫得及吵鬧的婦仁人相及住佇寬闊的厝。

10

(THR) Pháiⁿ-lâng ê sim ài lâng pháiⁿ; I ê ba̍k-chiu pēng bô khó-lîn i ê chhù-piⁿ.

(BCL) 歹人的心愛人歹；伊的目睭並無可憐伊的厝邊。

11

(THR) Bú-bān ê lâng siū hêng-ho̍at, gōng-tı̍t ê lâng chiū tit-tio̍h tì-hūi; Tì-hūi ê lâng siū kà-sī, chiū tit-tio̍h chai-bat.

(BCL) 侮慢的人受刑罰，戇直的人就得著智慧；智慧的人受教示，就得著知識。

12

(THR) Gī-lâng chhún-to̍k pháiⁿ-lâng ê ke, Chai pháiⁿ-lâng ōe chhia-tó kàu bia̍t-bô.

(BCL) 義人忖　歹人的家，知歹人會捙倒，到滅無。

13

(THR) That-ba̍t hī-khang m̄-thiaⁿ sòng-hiong lâng ai-kiû ê, I chiong-lâi kiû-kiò iā bô tit-tio̍h thiaⁿ.

(BCL) 塞密耳孔呣聽喪鄉人哀求的，伊將來求叫也無得著聽。

14

(THR) Àm-chīⁿ sàng mı̍h at-chí siū-khì; Heng-chêng ê lé-mı̍h ōe soah tōa siū-khì.

(BCL) 暗靜送物遏止受氣；胸前的禮物會息大受氣。

15

(THR) Péng-kong kiâⁿ-gī tùi hó-lâng chòe hoaⁿ-hí; Tùi tī pháiⁿ-lâng chòe pāi-hōai.

(BCL) 秉公行義對好人做歡喜，對佇歹人做敗壞。

16

(THR) Lī-khui bêng-lí ê lō͘ ê, Hit ê lâng tiàm tī im-hûn ê hōe-tiong.

(BCL) 離開明理的路的，彼個人踮佇陰魂的會中。

17

(THR) Ài chhia-chhí-ê beh tì-kàu sòng-hiong; Hò͘ⁿ chiú kap iû-ê bōe-ōe hó-gia̍h.

(BCL) 愛奢侈的，欲致到喪鄉；好酒及油的，會好額。

18

(THR) Pháiⁿ-lâng chòe gī-lâng sio̍k-hôe ê kè-chîⁿ; Kan-chà ê lâng chòe chèng-tı̍t lâng ê thòe-sin.

(BCL) 歹人做義人贖回的價錢；奸詐的人做正直人的替身。

19

(THR) Lêng-khó͘ tiàm tī khòng-iá, M̄-thang kap chháu-nāu kāu-khôe ê hū-jîn-lâng saⁿ-kap tòa.

(BCL) 寧可踮佇曠野，呣通及吵鬧厚的婦仁人相及住。

20

(THR) Tì-hūi ê lâng chhù-lāi ū kùi-khì ê pó-mı̍h kap iû; Gōng-lâng chiū sńg-liáu-liáu.

(BCL) 智慧的人厝內有貴氣的寶物及油；戇人就損了了。

21

(THR) Tui-chhē kong-gī kap jîn-chû ê, Chiū chhē-tio̍h o̍ah-miā kap kong-gī kap êng-hián.

(BCL) 追尋公義及仁慈的，就尋著活命、及公義，及榮顯。

22

(THR) Tì-hūi ê lâng peh-chiūⁿ ióng-sū ê siâⁿ, Pāi-hōai i só͘ óa-khò ê sè-le̍k.

(BCL) 智慧的人絔上勇士的城，敗壞伊所倚靠的勢力。

23

(THR) Pó-siú i ê chhùi kap chı̍h ê, Chiū pó-siú i ê sîn-hûn bián siū chai-hāi.

(BCL) 保守伊的嘴及舌的，就保守伊的神魂免受災害。

24

(THR) Kiau-ngō͘ chū-ko ê lâng miâ kiò bú-bān, I ēng kiau-ngō͘ chhiong-kông chòe tāi-chì.

(BCL) 驕傲自高的人名叫侮慢；伊用驕傲猖狂做代誌。

25

(THR) Pîn-tōaⁿ ê lâng beh tùi tham-io̍k lâi sí; In-ūi i ê chhiú m̄-khéng chòe kang.

(BCL) 貧憚的人欲對貪慾來死；因為伊的手呣肯做工。

26

(THR) Ū lâng thong-jı̍t tham-io̍k put-ti-chiok; Nā-sī gī ê lâng siá-sì(**si), lóng bô kian-līn.

(BCL) 有人通日貪慾不知足；若是義的人捨施攏無堅吝。

27

(THR) Pháiⁿ-lâng ê chè-hiàn sī khó-ò͘ⁿ ê; Hô-hòng i chûn pháiⁿ ì-sù lâi hiàn ah?

(BCL) 歹人的祭獻是可惡的；何況伊存歹意思來獻啊？

28

(THR) Lām-sám kan-chèng ê lâng beh bia̍t-bô; To̍k-to̍k chhin-hī thiaⁿ lâi kóng-ê, bô lâng ōe piān-tó i.

(BCL) 濫糝干證的人欲滅無；獨獨親耳聽來講的，無人會辯倒伊。

29

(THR) Pháiⁿ-lâng bīn-phê kāu; Nā-sī chèng-tı̍t ê lâng kín-sīn i ê só͘-kiâⁿ.

(BCL) 歹人面皮厚；若是正直的人謹慎伊的所行。

30

(THR) Bô hit-hō tì-hūi chhang-miâ kè-e̍k, Thang tí-te̍k Iâ-hô-hoa.

(BCL) 無彼號智慧、聰明、計劃通抵敵耶和華。

31

(THR) Bé sī ūi-tio̍h kau-chiàn ê jı̍t lâi pī-pān--ê; Chóng-sī tek-sèng sī tùi Iâ-hô-hoa.

(BCL) 馬是為著交戰的日來備辦的；總是得勝是對耶和華。

Bible Color Mark

• 台語漢字羅馬本
• 巴克禮全羅