腓立比書 第 1 章

1

(THR) Ki-tok Iâ-so͘ ê lô͘-po̍k Pó-lô Thê-mô͘-thài phoe kià hō͘ khiā-khí Hui-lı̍p-pí, tiàm-tī Ki-tok Iâ-so͘, lóng-chóng ê sèng-tô͘, kap chiah ê kam-tok í-kı̍p chip-sū;

(BCL) 基督耶穌的奴僕保羅、提摩太批寄互徛起腓立比，佇基督耶穌攏總的聖徒，及諸個監督，以及執事。

2

(THR) gōan lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

(BCL) 願恁對咱的父上帝及主耶穌基督得著恩典、平安！

3

(THR) Góa kìⁿ-ū siàu-liām lín, chiū kám-siā góa ê Siōng-tè,

(BCL) 我見有數念恁，就感謝我的上帝；

4

(THR) ta̍k pái ūi-tio̍h lín chèng lâng kî-tó ê sî, siông-siông hoaⁿ-hí lâi kî-tó,

(BCL) 逐擺為著恁眾人祈禱的時，常常歡喜來祈禱。

5

(THR) in-ūi lín tùi thâu chı̍t jı̍t kàu taⁿ, saⁿ-kap ū hūn tī heng-khí hok-im;

(BCL) 因為恁對頭一日到今，相及有份佇興起福音。

6

(THR) góa iā chhim sìn khí-thâu chòe hó ê kang tī lín ê, beh chiâⁿ i kàu tī Iâ-so͘ Ki-tok ê jı̍t;

(BCL) 我也深信起頭做好的工佇恁的，欲成伊，到佇耶穌基督的日。

7

(THR) koh góa ūi-tio̍h lín chèng lâng ū chit hō sim-chì sī ha̍p-gî, in-ūi lín siông-siông tī góa ê sim-lāi, bô lūn góa tī thih-liān tiong, í-kı̍p piān-bêng lâi kian-kò͘ hok-im ê sî, lín chèng lâng kap góa ū hūn tī un-tián.

(BCL) 閣我為著恁眾人有此號心志是合宜；因為恁常常佇我的心內，無論我佇鐵鍊中，以及辯明來堅固福音的時，恁眾人及我有份佇恩典。

8

(THR) In-ūi Siōng-tè kā góa chòe kan-chèng, góa thé Ki-tok Iâ-so͘ ê sim, ū cháiⁿ-iūⁿ lôan-bō͘ lín chèng lâng.

(BCL) 因為上帝給我做干證，我體基督耶穌的心，有怎樣戀慕恁眾人。

9

(THR) Koh góa só͘ kiû ê chiū-sī hō͘ lín ê jîn-ài, tī tì-hūi í-kı̍p ta̍k iūⁿ ê hiáu-ngō͘, chhiong-móa iū-koh chhiong-móa,

(BCL) 閣我所求的，就是互恁的仁愛佇智慧以及逐樣的曉悟，充滿又閣充滿，

10

(THR) tì-kàu lín ōe giām-chhut hiah ê khah hó ê sū, hō͘ lín sûn-chôan bô that-gāi, kàu tī Ki-tok ê jı̍t;

(BCL) 致到恁會驗出許個卡好的事，互恁純全無塞礙，到佇基督的日；

11

(THR) ēng gī ê ké-chí móa-móa, chiū-sī tùi Iâ-so͘ Ki-tok ū ê, beh hō͘ Siōng-tè tit-tio̍h êng-kng o-ló.

(BCL) 用義的果子滿滿就是對耶穌基督有的，欲互上帝得著榮光謳咾。

12

(THR) Hiaⁿ-tī ah, góa ái lín chai góa só͘ tú-tio̍h ê tāi-chì tú-tú sī hō͘ hok-im khah chìn-pō͘;

(BCL) 兄弟啊，我愛恁知，我所抵著的代誌抵抵是互福音卡進步，

13

(THR) tì-kàu góa ê kòa thih-liān tī Ki-tok lâi hián-bêng tī chôan iâⁿ, kap kî-û ê chèng lâng;

(BCL) 致到我的掛鐵鍊佇基督來顯明佇全營，及其餘的眾人。

14

(THR) koh tì-kàu tiàm-tī Chú ê hiaⁿ-tī tōa pòaⁿ tùi góa ê kòa thih-liān lâi chhim sìn, it-hoat hó-táⁿ bô kiaⁿ, lâi kóng Siōng-tè ê tō-lí.

(BCL) 閣致到佇主的兄弟大半對我的掛鐵鍊來深信，益發好膽無驚，來講上帝的道理。

15

(THR) Taⁿ lâng teh thôan Ki-tok, ū-ê sī chhut tī òan-tò͘ oan-ke, ū-ê sī chhut tī hó ì-sù.

(BCL) 今人傳基督，有的是出佇怨妒冤家，有的是出佇好意思。

16

(THR) Chiah-ê sī chhut tī jîn-ài, in-ūi chai góa sī ūi-tio̍h piān-bêng hok-im lâi siat-lı̍p ê.

(BCL) 諸個是出佇仁愛，因為知我是為著辯明福音來設立的；

17

(THR) Hiah-ê teh pò-iông Ki-tok sī chhut tī kiat-tóng, m̄ sī sı̍t-sim; in ê ì-sù sī ài hō͘ góa tī thih-liān tiong lēng-gōa ke-thiⁿ kan-khó͘.

(BCL) 許個報揚基督是出佇結黨，呣是實心，的意思是愛互我佇鐵鍊中另外加添艱苦。

18

(THR) Án-ni chiū cháiⁿ-iūⁿ? He̍k-sī ké, he̍k-sī chin, bô lūn cháiⁿ-iūⁿ, kun-tú sī thôan Ki-tok; góa in-ūi án-ni chiū hoaⁿ-hí, iā beh hoaⁿ-hí.

(BCL) 按呢就怎樣？或是假，或是真，無論怎樣，根抵是傳基督。我因為按呢就歡喜，也欲歡喜；

19

(THR) In-ūi góa chai chit ê sū, tùi lín ê kî-tó, í-kı̍p Iâ-so͘ Ki-tok ê Sîn ê siúⁿ-sù, beh tì-kàu góa tit-tio̍h kiù,

(BCL) 因為我知此個事，對恁的祈禱以及耶穌基督的神的賞賜，欲致到我得著救。

20

(THR) chiàu góa só͘ chhiat-chhiat him-bō͘ kap ǹg-bāng ê, chiū-sī góa bô chı̍t hāng sū kiàn-siàu, hōan sū hó-táⁿ, hiān-kim iā chiàu pêng-siông án-ni, he̍k-sī tùi sí he̍k-sī tùi o̍ah, Ki-tok beh tī góa ê seng-khu tit-tio̍h êng-kng.

(BCL) 照我所切切欣慕及向望的，就是我無一項事見誚。凡事好膽，現今也照平常按呢，或是對死，或是對活，基督欲佇我的身軀得著榮光。

21

(THR) In-ūi lūn-kàu góa, o̍ah chiū-sī Ki-tok, sí chiū-sī lī-ek.

(BCL) 因為論到我，活就是基督，死就是利益。

22

(THR) Siat-sú o̍ah tī jio̍k-thé, che sī chòe góa ê kang ê ké-chí, góa iā m̄ chai beh cháiⁿ-iūⁿ kéng.

(BCL) 設使活佇肉體，這是做我的工的果子，我也呣知欲怎樣揀。

23

(THR) Góa tī lióng-lân ê tiong-kan, chin ài tò-khì kap Ki-tok saⁿ-kap tī-teh, sī put-chí khah hó.

(BCL) 我佇兩難的中間，真愛倒去及基督相及佇，是不止卡好。

24

(THR) Chóng-sī iû-gôan tòa tī jio̍k-thé, ūi-tio̍h lín ê iân-kò͘, sī koh khah iàu-kín.

(BCL) 總是猶原住佇肉體，為著恁的緣故是閣卡要緊。

25

(THR) Góa í-keng chhim sìn chit-ê, chiū chai góa beh iû-gôan tī-teh, iā kap lín chèng lâng saⁿ-kap tī-teh, tì-kàu lín ê sìn tit-tio̍h chìn-pō͘ koh hoaⁿ-hí;

(BCL) 我已經深信此個，就知我欲猶原佇，也及恁眾人相及佇，致到恁的信得著進步閣歡喜，

26

(THR) hō͘ lín tī Ki-tok Iâ-so͘ ê khoa-kháu ūi-tio̍h góa ōe ná chhiong-móa, sī tùi góa kap lín koh tī-teh.

(BCL) 互恁佇基督耶穌的誇口，為著我會愈充滿，是對我及恁閣佇。

27

(THR) To̍k-to̍k lín kiâⁿ tāi-chì tio̍h ha̍p tī Ki-tok ê hok-im; hō͘ góa kiám-chhái lâi kìⁿ-tio̍h lín, á-sī lī-khui lín, ōe thiaⁿ-kìⁿ lín ê tāi-chì, chiū-sī lín tī chı̍t ê sîn khiā-chāi, ēng chı̍t sim ūi-tio̍h hok-im ê sìn saⁿ-kap chhut-la̍t;

(BCL) 獨獨恁行代誌著合佇基督的福音，互我豈採來見著恁，抑是離開恁，會聽見恁的代誌，就是恁佇一個神徛在，用一心為著福音的信相及出力。

28

(THR) hōan tāi-chì bô hō͘ tùi-te̍k phah-kiaⁿ; che sī chòe in bia̍t-bô ê pîn-kù, iā sī chòe lín tit kiù ê pîn-kù; lóng sī tùi Siōng-tè.

(BCL) 凡代誌無互對敵拍驚，這是做滅無的憑據，也是做恁得救的憑據，攏是對上帝。

29

(THR) In-ūi í-keng siúⁿ-sù lín ūi-tio̍h Ki-tok, m̄ nā sìn-khò I, koh ūi-tio̍h I siū khó͘;

(BCL) 因為已經賞賜恁為著基督，呣若信靠伊，閣為著伊受苦。

30

(THR) lín chhut-la̍t kau-chiàn, kap chêng só͘ khòaⁿ-kìⁿ góa ê, hiān-kim só͘ thiaⁿ-kìⁿ góa ê, saⁿ-tâng.

(BCL) 恁出力交戰，及前所看見我的、現今所聽見我的相同。

Bible Color Mark

• 台語漢字羅馬本
• 巴克禮全羅