民數記 第 33 章

1

(THR) Í-sek-lia̍t lâng chiàu kun-tūi, tī Mô͘-se A-lûn ê chhiú-ē, chhut Ai-kı̍p tōe só͘ kiâⁿ ê lō͘-chām, kì tī ē-bīn.

(BCL) 以色列人照軍隊，佇摩西、亞倫的手下出埃及地所行的路站記佇下面。

2

(THR) Mô͘-se chiàu Iâ-hô-hoa ê bēng-lēng kì-chài in khí-sin kiâⁿ ê lō͘-chām; in khí-sin kiâⁿ ê lō͘-chām chiū-sī án-ni.

(BCL) 摩西照耶和華的命令記載起身行的路站，起身行的路站就是按呢：

3

(THR) Chiaⁿ-ge̍h-kan, tī chiaⁿ-ge̍h cha̍p-gō͘ jı̍t, chiū-sī pôaⁿ-kè-choeh ê tē-jī jı̍t, Í-sek-lia̍t lâng tùi Lân-sek khí-sin, tī Ai-kı̍p chèng-lâng ê ba̍k-chiu-chêng , khò tōa kôan-lêng ê chhiú chhut-khì.

(BCL) 正月間佇正月十五日，就是過節的第二日，以色列人對蘭塞起身，佇埃及眾人的目睭前靠大權能的手出去。

4

(THR) Hit-sî Ai-kı̍p lâng teh bâi-chòng in lóng-chóng ê tōa-kiáⁿ, chiū-sī Iâ-hô-hoa tī in tiong-kan só͘ phah-sí-ê; Iâ-hô-hoa iā khiàn-chek in hiah ê siōng-tè.

(BCL) 彼時，埃及人埋葬攏總的大子，就是耶和華佇中間所拍死者；耶和華也譴責許個上帝。

5

(THR) Í-sek-lia̍t lâng tùi Lân-sek khí-sin, chat-iâⁿ tī So͘-kat.

(BCL) 以色列人對蘭塞起身，紮營佇疏割。

6

(THR) Tùi So͘-kat khí-sin, chat-iâⁿ tī kūn khòng-iá ê Í-thóng.

(BCL) 對疏割起身，紮營佇近曠野的以倘。

7

(THR) Tùi Í-thóng khí-sin, o̍at-tńg kàu Pí-hap-hi-lio̍k, chiū-sī tī Pa-le̍k-sé-hun ê tùi-bīn, chiū chat-iâⁿ tī Bı̍t-to̍at ê thâu-chêng.

(BCL) 對以倘起身，越轉到比哈希錄，就是佇巴力洗分的對面，就紮營佇密奪的頭前。

8

(THR) Tùi Hap-hi-lio̍k tùi-bīn khí-sin, keng-kè hái-tiong kàu khòng-iá; koh tī Í-thóng ê khòng-iá kiâⁿ saⁿ-jı̍t ê lō͘-chām, chiū chat-iâⁿ tī Má-la̍h.

(BCL) 對哈比錄對面起身，經過海中到曠野，閣佇以倘的曠野行三日的路站，就紮營佇瑪拉。

9

(THR) In tùi Má-la̍h khí-sin, lâi kàu Í-lîm; Í-lîm ū cha̍p-jī tiâu chúi-chôaⁿ, chhit-cha̍p châng chó-chhiū; chiū tī-hia chat-iâⁿ.

(BCL) 對瑪拉起身，來到以琳，（以琳有十二條水泉，七十欉棗樹），就佇遐紮營。

10

(THR) Tùi Í-lîm khí-sin, chat-iâⁿ tī Âng-hái kîⁿ.

(BCL) 對以琳起身，紮營佇紅海墘。

11

(THR) Tùi Âng-hái kîⁿ khí-sin, chat-iâⁿ tī Sìn ê khòng-iá.

(BCL) 對紅海墘起身，紮營佇汛的曠野。

12

(THR) Tùi Sìn ê khòng-iá khí-sin, chat-iâⁿ tī Thoat-ka.

(BCL) 對汛的曠野起身，紮營佇脫加。

13

(THR) Tùi Thoat-ka khí-sin, chat-iâⁿ tī A-lio̍k.

(BCL) 對脫加起身，紮營佇亞錄。

14

(THR) Tùi A-lio̍k khí-sin, chat-iâⁿ tī Lī-hui-tèng; tī-hia bô chúi thang hō͘ peh-sìⁿ lim.

(BCL) 對亞錄起身，紮營佇利非訂；佇遐，無水通互百姓飲。

15

(THR) Tùi Lī-hui-tèng khí-sin, chat-iâⁿ tī Se-nái ê khòng-iá.

(BCL) 對利非訂起身，紮營佇西奈的曠野。

16

(THR) Tùi Se-nái ê khòng-iá khí-sin, chat-iâⁿ tī Ki-phok-lô-hap-tha-óa.

(BCL) 對西奈的曠野起身，紮營佇基博羅哈他瓦。

17

(THR) Tùi Ki-phok-lô-hap-tha-óa khí-sin, chat-iâⁿ tī Hap-sé-lio̍k.

(BCL) 對基博羅哈他瓦起身，紮營佇哈洗錄。

18

(THR) tùi Hap-sé-lio̍k khí-sin, chat-iâⁿ tī Lī-thê-má.

(BCL) 對哈洗錄起身，紮營佇利提瑪。

19

(THR) Tùi Lī-thê-má khí-sin, chat-iâⁿ tī Lîm-bûn-phàⁿ-lia̍t.

(BCL) 對利提瑪起身，紮營佇臨門帕烈。

20

(THR) Tùi Lîm-bûn-phàⁿ-lia̍t khí-sin, chat-iâⁿ tī Lı̍p-ná.

(BCL) 對臨門帕烈起身，紮營佇立拿。

21

(THR) Tùi Lı̍p-ná khí-sin, chat-iâⁿ tī Le̍k-sat.

(BCL) 對立拿起身，紮營佇勒撒。

22

(THR) Tùi Le̍k-sat khí-sin, chat-iâⁿ tī Ki-hi-la̍h-tha.

(BCL) 對勒撒起身，紮營佇基希拉他。

23

(THR) Tùi Ki-hi-la̍h-tha khí-sin, chat-iâⁿ tī Sa-húi soaⁿ.

(BCL) 對基希拉他起身，紮營佇沙斐山。

24

(THR) Tùi Sa-húi soaⁿ khí-sin, chat-iâⁿ tī Hap-la̍h-tāi.

(BCL) 對沙斐山起身，紮營佇哈拉大。

25

(THR) Tùi Hap-la̍h-tāi khí-sin, chat-iâⁿ tī Má-kiat-hi-lio̍k.

(BCL) 對哈拉大起身，紮營佇瑪吉希錄。

26

(THR) Tùi Má-kiat-hi-lio̍k khí-sin, chat-iâⁿ tī Tha-hap.

(BCL) 對瑪吉希錄起身，紮營佇他哈。

27

(THR) Tùi Tha-hap khí-sin, chat-iâⁿ tī Tha-la̍h.

(BCL) 對他哈起身，紮營佇他拉。

28

(THR) Tùi Tha-la̍h khí-sin, chat-iâⁿ tī Bı̍t-ka.

(BCL) 對他拉起身，紮營佇密加。

29

(THR) Tùi Bı̍t-ka khí-sin, chat-iâⁿ tī Hap-mô͘-ná.

(BCL) 對密加起身，紮營佇哈摩拿。

30

(THR) Tùi Hap-mô͘-ná khí-sin, chat-iâⁿ tī Mô͘-se-lio̍k.

(BCL) 對哈摩拿起身，紮營佇摩西錄。

31

(THR) Tùi Mô͘-se-lio̍k khí-sin, chat-iâⁿ tī Pí-nî-a-kan.

(BCL) 對摩西錄起身，紮營佇比尼亞干。

32

(THR) Tùi Pí-nî-a-kan khí-sin, chat-iâⁿ tī Hat-hap-kı̍p-kah.

(BCL) 對比尼亞干起身，紮營佇曷哈及甲。

33

(THR) Tùi Hat-hap-kı̍p-kah khí-sin, chat-iâⁿ tī Iok-pa-tha.

(BCL) 對曷哈及甲起身，紮營佇約巴他。

34

(THR) Tùi Iok-pa-tha khí-sin, chat-iâⁿ tī A-phok-ná.

(BCL) 對約巴他起身，紮營佇阿博拿。

35

(THR) Tùi A-phok-ná khí-sin, chat-iâⁿ tī Í-sûn-ka-pia̍t.

(BCL) 對阿博拿起身，紮營佇以旬迦別。

36

(THR) Tùi Í-sûn-ka-pia̍t khí-sin, chat-iâⁿ tī Sîm ê khòng-iá, chiū-sī Ka-te-su.

(BCL) 對以旬迦別起身，紮營佇尋的曠野，就是加低斯。

37

(THR) Tùi Ka-te-su khí-sin, chat-iâⁿ tī Hô-jíⁿ soaⁿ, Í-tong tōe ê piⁿ-kài.

(BCL) 對加低斯起身，紮營佇何珥山，以東地的邊界。

38

(THR) Í-sek-lia̍t lâng chhut Ai-kı̍p tōe ê sì-cha̍p nî, gō͘-ge̍h chhoe-it jı̍t, chè-si A-lûn chun-thàn Iâ-hô-hoa ê bēng-lēng, chiūⁿ Hô-jíⁿ soaⁿ, chiū sí tī-hia.

(BCL) 以色列人出埃及地的四十年，五月初一日，祭司亞倫遵趁耶和華的命令上何珥山，就死佇遐。

39

(THR) A-lûn sí tī Hô-jíⁿ soaⁿ ê sî, chı̍t-pah jī-cha̍p-saⁿ hè.

(BCL) 亞倫死佇何珥山的時一百二十三歲。

40

(THR) Khiā-khí tī Ka-lâm tōe lâm-hng ê Ka-lâm lâng A-la̍h-tek ông thiaⁿ-kìⁿ Í-sek-lia̍t lâng lâi lah.

(BCL) 徛起佇迦南地南方的迦南人亞拉得王聽見以色列人來啦。

41

(THR) Í-sek-lia̍t lâng tùi Hô-jíⁿ soaⁿ khí-sin, chat-iâⁿ tī Sat-mô͘-ná.

(BCL) 以色列人對何珥山起身，紮營佇撒摩拿。

42

(THR) Tùi Sat-mô͘-ná khí-sin, chat-iâⁿ tī Phó͘-lùn.

(BCL) 對撒摩拿起身，紮營佇普嫩。

43

(THR) Tùi Phó͘-lùn khí-sin, chat-iâⁿ tī O-pek.

(BCL) 對普嫩起身，紮營佇阿伯。

44

(THR) Tùi O-pek khí-sin, chat-iâⁿ tī Í-iâ-a-pa-lîm, Mô͘-ap ê piⁿ-kài.

(BCL) 對阿伯起身紮營佇以耶亞巴琳，摩押的邊界。

45

(THR) Tùi Í-ìn khí-sin, chat-iâⁿ tī Tí-pún-ka-tek.

(BCL) 對依因起身，紮營佇底本迦得。

46

(THR) Tùi Tí-pún-ka-tek khí-sin, chat-iâⁿ tī A-bûn-te-pí-la̍h-thài-im.

(BCL) 對底本迦得起身，紮營佇亞門低比拉太音。

47

(THR) Tùi A-bûn-te-pí-la̍h-thài-im khí-sin, chat-iâⁿ tī Nî-pho tùi-bīn ê A-pa-lîm soaⁿ.

(BCL) 對亞門低比拉太音起身，紮營佇尼波對面的亞巴琳山。

48

(THR) Tùi A-pa-lîm soaⁿ khí-sin, chat-iâⁿ tī Mô͘-ap ê pîⁿ-iûⁿ, Iok-tàn hô-piⁿ, Iâ-lī-ko tùi-bīn.

(BCL) 對亞巴琳山起身，紮營佇摩押的平洋約但河邊、耶利哥對面。

49

(THR) In chat-iâⁿ tī Iok-tàn ê hô-piⁿ, tùi Pek-iâ-se-bo̍at kàu A-pek-sı̍p-têng, tī Mô͘-ap pîⁿ-iûⁿ.

(BCL) 紮營佇約但的河邊，對伯耶施末到亞伯什亭佇摩押平洋。

50

(THR) Iâ-hô-hoa tī Mô͘-ap pîⁿ-iûⁿ, Iok-tàn hô-piⁿ, Iâ-lī-ko tùi-bīn, hoan-hù Mô͘-se kóng,

(BCL) 耶和華佇摩押平洋──約但河邊、耶利哥對面吩咐摩西講：

51

(THR) Lí tio̍h hoan-hù Í-sek-lia̍t lâng kā in kóng, Lín kè Iok-tàn hô jı̍p Ka-lâm tōe ê sî,

(BCL) 「你著吩咐以色列人給講：恁過約但河入迦南地的時，

52

(THR) chiū tio̍h tùi lín bīn-chêng kóaⁿ-chhut hia só͘ ū khiā-khí ê peh-sìⁿ, húi-bia̍t in it-chhè phah-chiâⁿ ê chio̍h-siōng, koh húi-bia̍t in it-chhè iûⁿ-chù ê ngó͘-siōng, koh thiah-húi in it-chhè ê soaⁿ-thâu-tôaⁿ.

(BCL) 就著對恁面前趕出遐所有徛起的百姓，毀滅一切拍成的石像閣毀滅一切鎔鑄的偶像，閣拆毀一切的山頭壇。

53

(THR) Lín tio̍h chiàm hit só͘-chāi, iā tio̍h khiā-khí tī-hia, in-ūi Góa chiong hit só͘-chāi siúⁿ-sù lín chòe-gia̍p.

(BCL) 恁著佔彼所在，也著徛起佇遐，因為我將彼所在賞賜恁做業。

54

(THR) Lín tio̍h chiàu ta̍k-ke liam-khau sêng-chiap hit ê tōe; lâng chōe-ê, tio̍h pun sán-gia̍p khah-chōe hō͘ in, lâng chió-ê tio̍h pun sán-gia̍p khah-chió hō͘ in; khòaⁿ lâng liam-tio̍h sím-mı̍h só͘-chāi, hit só͘-chāi chiū kui i; chiàu lín chó͘-kong ê chi-phài lín tio̍h sêng-chiap i.

(BCL) 恁著照逐家拈鬮，承接彼個地；人多的，著分產業卡多互；人少的，著分產業卡少互。看人拈著甚麼所在，彼所在就歸伊。照恁祖公的支派恁著承接伊。

55

(THR) Siat-sú lín bô kóaⁿ-chhut hit só͘-chāi khiā-khí ê peh-sìⁿ, chiū lín só͘ iông-ún i tiàm-teh ê peh-sìⁿ, beh chòe lín ba̍k-chiu-tiong ê chhì, hia̍p-ē ê chháu-chhì; in iā beh tī lín só͘ khiā-khí ê tōe khún-pek lín.

(BCL) 設使恁無趕出彼所在徛起的百姓，就恁所容允伊踮的百姓，欲做恁目睭中的茦，　下的草茦，也欲佇恁所徛起的地窘迫恁。

56

(THR) Koh Góa beh khóan-thāi lín, chhin-chhiūⁿ Góa bat siūⁿ beh khóan-thāi in ê.

(BCL) 閣我欲款待恁，親像我曾想欲款待的。」

Bible Color Mark

• 台語漢字羅馬本
• 巴克禮全羅