民數記 第 24 章

1

(THR) Pa-lân khòaⁿ-kìⁿ Iâ-hô-hoa hoaⁿ-hí sù-hok hō͘ Í-sek-lia̍t, chiū bô chhin-chhiūⁿ éng-pái khì chhē hoat-su̍t, sī bīn ǹg khòng-iá.

(BCL) 巴蘭看見耶和華歡喜賜福互以色列，就無親像往擺去尋法術，是面向曠野。

2

(THR) Pa-lân kia̍h-ba̍k, khòaⁿ-kìⁿ Í-sek-lia̍t lâng chiàu chi-phài khiā-khí, Siōng-tè ê sîn chiū lîm-kàu i.

(BCL) 巴蘭抬目，看見以色列人照支派徛起。上帝的神就臨到伊，

3

(THR) I chiū thê-khí i ê koa, kóng, Pí-jíⁿ ê kiáⁿ Pa-lân kóng, Ba̍k-chiu ha̍p-teh ê lâng kóng;

(BCL) 伊就提起伊的歌講：比珥的子巴蘭講，目睭合的人講，

4

(THR) Thiaⁿ-kìⁿ Siōng-tè ê ōe, Khòaⁿ-kìⁿ Chôan-lêng-ê ê īⁿ-siōng, Ba̍k-chiu thí-khui tó-teh ê lâng kóng;

(BCL) 聽見上帝的話，看見全能者的異象，目睭展開倒的人講：

5

(THR) Ngá-kok ah, lí ê pò͘-pîⁿ cháiⁿ-iūⁿ hiah súi! Í-sek-lia̍t ah, lí ê tiùⁿ-pâng cháiⁿ-iūⁿ hiah hó-khòaⁿ!

(BCL) 雅各啊，你的布棚怎樣許娞？以色列啊，你的帳房怎樣許好看！

6

(THR) Chhin-chhiūⁿ saⁿ-liân-sòa ê soaⁿ-kok, Chhin-chhiūⁿ hô-piⁿ ê hn̂g, Chhin-chhiūⁿ Iâ-hô-hoa só͘ chai ê tîm-hiuⁿ-chhiū, Chhin-chhiūⁿ chúi-piⁿ ê pek-hiuⁿ-chhiū.

(BCL) 親像相連續的山谷，親像河邊的園，親像耶和華所栽的沈香樹，親像水邊的柏香樹。

7

(THR) Chúi beh tùi i ê tháng lâu-chhut, Chéng-chí beh iā tī chōe-chōe chúi ê só͘-chāi, I ê ông beh pôaⁿ-kè A-kah, I ê kok beh heng-khí.

(BCL) 水欲對伊的桶流出；種子欲撒佇多多水的所在。伊的王欲過亞甲；伊的國欲興起。

8

(THR) Siōng-tè chhōa i chhut Ai-kı̍p, I chhin-chhiūⁿ ū iá-gû ê la̍t; I beh thun-chia̍h tùi-te̍k ê kok, At-chı̍h in ê kut-thâu; Ēng chìⁿ siā in, kàu thàng-kè.

(BCL) 上帝導伊出埃及；伊親像有野牛的力。伊欲吞食對敵的國，遏折的骨頭，用箭射到過。

9

(THR) I thìⁿ-kha, koh tó-teh chhin-chhiūⁿ kang ê sai, Iā chhin-chhiūⁿ bú ê sai; Chī-chūi káⁿ jiá-tio̍h i? Kìⁿ-nā chiok-hok lí ê, gōan i siū chiok-hok, Kìⁿ-nā chiù-chó͘ lí ê, gōan i siū chiù-chó͘.

(BCL) 伊撐腳閣倒親像公的獅，也親像母的獅，是誰敢惹著伊？見若祝福你的，願伊受祝福；見若咒詛你的，願伊受咒詛。

10

(THR) Pa-le̍k tōa siū-khì Pa-lân, chiū tah-chhiú; Pa-le̍k koh kā Pa-lân kóng, Góa kiò lí lâi chiù-chó͘ góa ê tùi-te̍k, lí kéng-jiân choan-choan chiok-hok in, kàu chí saⁿ-pái.

(BCL) 巴勒大受氣巴蘭，就搭手，巴勒閣給巴蘭講：「我叫你來咒詛我的對敵，你竟然專專祝福到此三擺。

11

(THR) Taⁿ lí cháu-khì pún só͘-chāi, góa pún siūⁿ beh hō͘ lí tit-tio̍h tōa chun-kùi, nā-sī Iâ-hô-hoa chó͘-tòng, hō͘ lí bô tit-tio̍h chun-kùi.

(BCL) 今你走去本所在！我本想欲互你得著大尊貴，若是耶和華阻擋互你無得著尊貴。」

12

(THR) Pa-lân tùi Pa-le̍k kóng, Góa kiám bô tùi lí só͘ chhe kàu góa hia ê sù-chiá kóng,

(BCL) 巴蘭對巴勒講：「我豈無對你所差到我遐的使者講：

13

(THR) Pa-le̍k chiū nā chiong i móa-chhù ê kim-gûn hō͘ góa, góa iā bōe-tit pôaⁿ-kè Iâ-hô-hoa ê bēng-lēng, pîn ka-kī ê sim lâi chòe-hó chòe-pháiⁿ; Iâ-hô-hoa só͘ kóng-ê, góa chiū kóng i.

(BCL) 『巴勒就若將伊滿厝的金銀互我，我也得過耶和華的命令，憑家己的心來做好做歹。耶和華所講的，我就講伊。』」

14

(THR) Khòaⁿ ah, taⁿ góa beh tò-khì pún-cho̍k; lí lâi, góa kā lí kóng, chiah ê peh-sìⁿ jı̍t-āu beh cháiⁿ-iūⁿ khóan-thāi lí ê peh-sìⁿ.

(BCL) 「看啊，今我欲倒去本族。你來，我給你講諸個百姓日後欲怎樣款待你的百姓。」

15

(THR) I chiū thê-khí i ê koa, kóng, Pí-jíⁿ ê kiáⁿ Pa-lân kóng, Ba̍k-chiu ha̍p-teh ê lâng kóng;

(BCL) 伊就提起伊的歌講：比珥的子巴蘭講：目睭合的人講，

16

(THR) Thiaⁿ-kìⁿ Siōng-tè ê ōe, Tit-tio̍h chai Chì-kôaiⁿ-ê ê chai-bat, Khòaⁿ-kìⁿ Chôan-lêng-ê ê īⁿ-siōng, Ba̍k-chiu thí-khui, tó-teh ê lâng kóng:

(BCL) 聽見上帝的話，得著知至高者的知識，看見全能者的異象，目睭展開倒的人講：

17

(THR) Góa khòaⁿ i, chóng-sī bô tī hiān-sî, Góa koan-khòaⁿ i, chóng-sī m̄-sī kūn-kūn; Ū chı̍t lia̍p chhiⁿ beh tùi Ngá-kok chhut, Ū chı̍t ê kôan-pèng, beh tùi Í-sek-lia̍t heng-khí, Beh phah-phòa Mô͘-ap ê piⁿ-kak, Húi-hōai jiáu-lōan ê lâng.

(BCL) 我看伊總是無佇現時；我觀看伊總是呣是近近。有一粒星欲對雅各出，有一個權柄欲對以色列興起，欲拍破摩押的邊角，毀壞擾亂的人。

18

(THR) Í-tong beh chòe-gia̍p, Se-jíⁿ iā beh chòe-gia̍p, hō͘ i ê tùi-te̍k, Í-sek-lia̍t beh kiâⁿ tāi-chì ióng-kám.

(BCL) 以東欲做業，西珥也欲做業互伊的對敵；以色列欲行代誌勇敢。

19

(THR) Ū chı̍t-ūi chiáng-kôan-ê beh tùi Ngá-kok chhut, I beh châu-bia̍t siâⁿ-tiong só͘ lâu ê.

(BCL) 有一位掌權的，欲對雅各出；伊欲剿滅城中所留的。

20

(THR) I koh khòaⁿ-kìⁿ A-má-le̍k, chiū thê-khí i ê koa, kóng, A-má-le̍k pún chòe chiah ê kok ê thâu, Chóng-sī i ê kiat-kio̍k beh éng-éng bia̍t-bô.

(BCL) 伊閣看見亞瑪力，就提起伊的歌講：亞瑪力本做諸個國的頭，總是伊的結局欲永永滅無。

21

(THR) I koh khòaⁿ Ki-nî lâng, chiū thê-khí i ê koa, kóng, Lí khiā-khí ê só͘-chāi sī kian-kò͘, Lí choh-siū tī soaⁿ-giâm;

(BCL) 伊閣看基尼人，就提起伊的歌講：你徛起的所在是堅固；你做巢佇山巖。

22

(THR) Chóng-sī Ki-nî beh tì-kàu soe-bî, Tı̍t-kàu hō͘ A-su̍t lia̍h lí khì.

(BCL) 總是基尼欲致到衰微，直到互亞述掠你去。

23

(THR) I koh thê-khí koa, kóng, Ai-ah, Siōng-tè kiâⁿ chit ê sū ê sî, Chī-chūi ōe tit-tio̍h o̍ah?

(BCL) 伊閣提起歌講：哀啊！上帝行此個事的時，是誰會得著活？

24

(THR) Beh ū chûn tùi Ki-thê hia lâi, Khó͘-chhó͘ A-su̍t, khó͘-chhó͘ Hi-pek; I iā beh éng-éng bia̍t-bô.

(BCL) 欲有船對基提遐來，苦楚亞述，苦楚希伯；伊也欲永永滅無。

25

(THR) Pa-lân chiū khí-lâi, tò-khì i pún só͘-chāi; Pa-le̍k iā kiâⁿ i ê lō͘.

(BCL) 巴蘭就起來，倒去伊本所在，巴勒也行伊的路。

Bible Color Mark

• 台語漢字羅馬本
• 巴克禮全羅